ޑެލްޓާ ވޭރިއަންޓާ ދެކޮޅަށް ވެކްސިން ރަނގަޅަށް މަސައްކަތްކުރާކަމަށް އެމެރިކާގައި ކުރިޔަށްގެންދިޔަ ތިން ދިރާސާއަކުން ހާމަވެއްޖެ

ކޮވިޑުން ދިފާއުވުމަށް އުފައްދާފައިވާ ވެކްސިންތައް ކޮވިޑް-19ގެ އެންމެ ހަލުވިމިނުގައި ފެތުރެމުން އަންނަ ޑެލްޓާ ވޭރިއަންޓާ ދެކޮޅަށްވެސް ރަނގަޅަށް މަސައްކަތްކުރާ ކަމަށް އެމެރިކާގައި ކުރިޔަށް ގެންދިޔަ ތިން ދިރާސާއަކުން ހާމަވެއްޖެއެވެ.

މިދިރާސާތަކުން އެނގިފައިވާ ގޮތުގައި ކޮވިޑް ޖެހިގެން ހޮސްޕިޓަލްތަކުގައި އެޑްމިޓްކުރުމާއި މަރުވުމާހަމައަށް ދިޔުމަށް ވެކްސިން ޖެހުމުގެ ސަބަބުން އެމީހަކަށް ރައްކާތެރިކަން ލިބެއެވެ. އެހެންނަމަވެސް ވެކްސިނުން ދޭ ރައްކާތެރިކަން އުމުރުން ދުވަސްވީ މީހުންނަށް ވަކިން ޚާއްސަކޮށް އުމުރުން 75 އަހަރުން މަތީގެ މީހުންގެ މެދުގައި ދަށްކަމަށް ދިރާސާއިން ވަނީ އެނގިފައެވެ.

އެމެރިކާގެ 9 ސްޓޭޓެއްގައި ކޮވިޑް ޖެހިގެން ހޮސްޕިޓަލްތަކުގައި އެޑްމިޓްކުރަމުންދިޔަ މީހުން މޮޑާނާ ވެކްސިން ޖަހާފައިވާ މީހުންގެ މެދުގައި މަދުކަމަށް ތަފާސްހިސާބުތަކުން ދައްކައެވެ. ފައިޒަރ އާއި ޖޯންސަން އެންޑް ޖޯންސަން ވެކްސިން ޖަހާފައިވާ މީހުންނަށްވުރެ މޮޑާނާ ވެކްސިން ޖަހާފައިވާ މީހުން ހޮސްޕިޓަލްތަކުގައި އެޑްމިޓްކުރަން ޖެހިފައިވާ މިންވަރު ވަނީ ދަށްވެފައެވެ.

ދިރާސާއަކުން ހާމަވެފައިވާ ގޮތުގައި ބަލިޖެހިގެން ބޮޑުވަރުވެގެން އެމަރޖެންސީގައި ހޮސްޕިޓަލާއި އެމެރޖެންސީ ރޫމަށް އަދި އެފަދަ ސެންޓަރުތަކަށް ދިޔަ މީހުންގެ ތެރެއިން ހާލު ދަށްވުމުން މޮޑާނާ ވެކްސިން ޖަހާފައިވާ މީހުންގެ 95 އިންސައްތަ މީހުން ވަނީ ސަލާމަތްވެފައެވެ. ފައިޒަރ ވެކްސިން ޖަހާފައިވާ މީހުންގެ މިއިންސައްތަ ހުރީ 80 ގައެވެ. އަދި ޖޯންސަން އެންޑް ޖޯންސަން ވެކްސިން ޖެހި މީހުންނަށް ރައްކާތެރިކަން ލިބިފައިވަނީ 60 އިންސައްތަ އަށެވެ.