އެޗްއާރުސީއެމުން ކަންކަން ނިންމާނީ ވަކި ފަރާތަކަށް ބުރަނުވެ، ގާނޫނާ އެއްގޮތަށް: ޑރ. އަދުހަމް
ކުޅުދުއްފުށީގައި އިންސާނީ ހައްގުތަކަށް ހޭލުންތެރިކުރުމުގެ މުހިންމު ޕްރޮގްރާމެއް ވަނީ ފަށާފައި
ކޮމިޝަނަރ ޑރ. އަހުމަދު އަދުހަމް އަބްދުﷲ
ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ކަންކަން ނިންމާނީ އެއްވެސް ފަރާތަތަކަށް ބުރަވުމެއްނެތި، ގާނޫނުތަކާ އެއްގޮތަށް ކަމަށް ކޮމިޝަނަރ ޑރ. އަހުމަދު އަދުހަމް އަބްދުﷲ ވިދާޅުވެއްޖެއެވެ.
އަދުހަމް މިފަދައިން ވިދާޅުވީ އިންޓަގްރޭޓެޑް ހިއުމަން ރައިޓްސް ޕްރޮގްރާމް ހދ. ކުޅުދުއްފުށީގައި ފެށުމުގެ ރަސްމިއްޔާތުގައި ވާހަކަދައްކަވަމުންނެވެ. މި ރަސްމިއްޔާތުގައި ވާހަކަދައްކަވަމުން އަދުހަމް ވިދާޅުވީ ދިވެހި ޖުމްހޫރިއްޔާގެ ގާނޫނުއަސާސީގެ 189 ވަނަ މާއްދާގައި ވާގޮތަށް ހިއުމަން ރައިޓްސް ކޮމިޝަނަކީ އިންސާނީ ހައްގުތައް ކުރިއެރުވުމުގައި އެއްވެސް ފަރާތަކަށް ބުރަވުމެއް ނެތި، ތަޢައްސުބުން އެއްކިބާވެ ތިބެ މަސައްކަތްކުރާ ކޮމިޝަނެއް ކަމަށެވެ.
އެ ކޮމިޝަނުން ކަންކަން ނިންމާނީ ޤާނޫނުއަސާސީއާ ގުޅުން ހުރި ޤާނޫނުތަކާއި ދިވެހިރާއްޖެ ތަސްދީގުކޮށްފައިވާ ބައިނަލްއަގުވާމީ މުއާހަދާތަކާއި މި މުއާހަދާތަކުގެ އިޚްތިޔާރީ ޕްރޮޓޮކޯލްތަކުގައި ހިމެނޭ ކަންކަން ބަލައި، ދިރާސާ ކުރުމަށްފަހު، ކަމާ ގުޅުންހުރި އުންސުރުތަކަށް ރިއާޔަތްކޮށް، އިންޓަރނޭޝަނަލް ބެސްޓް ޕްރެކްޓިސްއާ އެއްގޮތަށް ކަމަށް އަދުހަމް ވަނީ ވިދާޅުވެފައެވެ.
ކުޅުދުއްފުށީގައި މި އިފްތިތާހު ކުރެވުނު ޕްރޮގްރާމަކީ ހިއުމަން ރައިޓްސް ކޮމިޝަނުން ދެމުންދާ ޚިދުމަތްތައް ރައްޔިތުންނާ ގާތުން ފޯރުކޮށްދިނުމުގެ ގޮތުން އިންސާނީ ހައްގުތަކަށް ހޭލުންތެރިކުރުމުގެ ޕްރޮގްރާމްތައް ޚާއްސަކޮށް އަތޮޅުތެރެއަށް ފުޅާކުުރުމަށް ފެށިގެންދާ މުހިންމު މަސައްކަތެއް ކަމަށް އަދުހަމް ވިދާޅުވިއެވެ.
އަދި މިހާރު ހިނގަމުންދާ 5 ވަނަ ކޮމިޝަންގެ 2021 ވަނަ އަހަރުން 2025 ވަނަ އަހަރަށް އެކުލަވާލާފައިވާ ސްޓްރެޓެޖިކް ޕްލޭންގެ މުހިންމު އެއް ދާއިރާއަކީ، އިންސާނީ ހައްގުތަކަށް ހޭލުންތެރިކަން އިތުރުކުރުމާއި ކޮމިޝަނުން ކުރަމުންދާ މަސައްކަތްތައް ރައްޔިތުންނަށް އަންގައިދިނުންކަމަށް ވެސް އަދުހަމް ވިދާޅުވިއެވެ.
ކުޅުދުއްފުށީގައި ފެށި އިންޓަރގްރޭޓެޑް ހިއުމަންރައިޓްސް އެވެއަރނަސް ޕްރޮގްރާމަކީ 7 ސެޕްޓެންބަރުން 13 ސެޕްޓެމްބަރަށް ކުރިއަށްގެންދާ ޕްރޮގްރާމެކެވެ. މި ޕްރޮގްރާމުގެ ދަށުން ކައުންސިލަރުންނަށް ބާއްވާ މަސައްކަތު ބައްދަލުވުމަކާއި، ހިއުމަންރައިޓްސް ޑިފެންޑަރުންނަށްއަމާޒުކޮށް އިންސާނީ ހައްޤުތަކުގެ ޓްރެއިނިންގ އޮފް ޓްރެއިނަރސް ޕްރޮގްރާމް ބޭއްވުމާއި، ކުޅުދުއްފުށި ސިޓީގައި ދިރިއުޅޭ އުމުރުންދުވަސްވީ ފަރާތްތަކާއި ނުކުޅެދުންތެރިކަން ހުންނަ ފަރާތްތަކުގެ ގޭގެއަށް ޒިޔާރަތްކުރުމާއި، ކޮމިއުނިޓީ ނައިޓްއަކާއި ހިއުމަންރައިޓްސްފެއަރއެއް ބޭއްވުމަށް ވަނީ ހަމަޖެހިފައެވެ.
މީގެ އިތުރުން ދައުލަތުގެ އިދާރާތަކުގައި މަސައްކަތްކަތްކުރާ މުވައްޒަފުން ވިސްލްބްލޯ ޤާނޫނަށް ހޭލުންތެރިކުރުމަށް ކުރިއަށްގެންދާ ސެޝަންތަކާއި، އެކިއެކި ވިޔަފާރިތައް އަދި ކުންފުނިތައް ހިންގާ ފަރާތްތަކަށް ވިޔަފާރިއާއި އިންސާނީ ޙައްޤާ ގުޅޭގޮތުން މަޢުލޫމާތުދިނުމާއި، އެންޓިޓޯޗަރ ޤާނޫނަށް އަހުލުވެރިކުރުވުމާއި، ކުޅުދުއްފުށި ސިޓީގެ ސަރަހައްދެއްގައި ކޮމިޝަންގެ އިންފޯމޭޝަން ޑެސްކެއް ބަހައްޓައި އިންސާނީ ހައްޤުތަކާ ގުޅޭ އެކިއެކި މައުލޫމާތު ދިނުން ހިމެނެއެވެ.
އެޗްއާރުސީއެމުން ބުނީ އިންޓަގްރޭޓެޑް ހިއުމަންރައިޓްސް ޕްރޮގްރާމަކީ ހިއުމަން ރައިޓްސް ކޮމިޝަނާއި ކައުންސިލްތަކާ ގުޅިގެން އަތޮޅުތެރޭގައި ދޭ އިޖްތިމާއީ އަދި އިޤުތިސާދީ ޚިދުމަތްތައް ހަރުދަނާކުރުމަށާއި އިންސާނީ ހައްޤުތަކަށް ހުރުމަތްތެރިކޮށް ހިތާ މުޖްތަމަޢެއް ބިނާކުރުމުގެ ގޮތުން ހިންގާ ޕްރޮގްރާމެއް ކަމަށެވެ.
