އިސްރާއީލުގެ ޖަލުން ފިލި ގައިދީން ހޯދުމަށް ކުރާ މަސައްކަތް ނާކާމިޔާބު

އިސްރާއީލުން ސަލާމަތީ ގޮތުން އެންމެ ވަރުގަދަ ފިޔަވަޅުތައް އަޅާފައިވާ ޖަލުކަމަށްވާ ޖަލްބޫއު ޖަލުން ފިލި ފަލަސްތީނުގެ ހަ ގައިދީން ހޯދުމަށް މިހާތަނަށް ކުރި މަސައްކަތް ނާކާމިޔާބުވެފައިވާ ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާ ގޮތުން އިސްރާއީލުގެ ސަލާމަތީ ގޮތުން އެންމެ ވަރުގަދަ ޖަލުން ފަލަސްތީނުގެ ހަ ގައިދީން ފިލުމާއެކު އިސްރާއީލުން އެގައުމުގެ ދުޝްމަނުންގެ ސިކުނޑިއަށް ވައްދާފައިވާ "ސެކިއުރިޓީ ލެޖެންޑް"ގެ އިތުބާރު ވަނީ ގެއްލިފައެވެ. އަދި މިއީ އިސްރާއީލުގެ އަމަނާއި ސަލާމަތަށް ނުރައްކަލެއްކަމަށް އެގައުމުން ވަނީ ބުނެފައެވެ.

މީގެ ކުރިންވެސް އިސްރާއީލުގެ ޖަލުތަކުގެ ސެކިއުރިޓީ ފެއިލްވެފައިވާ ކަމަށް އެގައުމުގެ މީޑިއާތަކުން ވަނީ ރިޕޯޓްކޮށްފައެވެ.

އިސްރާއީލުގެ މީޑިއާތަކުން ރިޕޯޓްކޮށްފައިވާ ގޮތުން ޖަލްބޫއު ޖަލުން ފިލި ފަލަސްތީނުގެ ހަ މީހުން ހޯދުމަށް އެގައުމުގެ ސިފައިންނާއި އަސްކަރިއްޔާއިން ކުރި މަސައްކަތްވެސް މިހާތަނަށް ކާމިޔާބުވެފައެއް ނުވެއެވެ.

އަނެކޮއްޅުން ޖަލުންފިލި ގައިދީން ބިންގަރާސް ކޮނެފައިވަނީ ފިލްމުތަކުންވެސް ނުފެންނަހާ ފުރިހަމައަށް ކަމަށް އެގައުމުގެ ޖަލު އޮފިސަރަކު މީޑިއާއާ ވާހަކަ ދައްކަމުން ވަނީ ބުނެފައެވެ.