އަލިފުށީ އެއަރޕޯޓްގެ ސުވާލަށް މިނިސްޓަރު އަސްލަމްގެ ޖަވާބެއް ނެތް
8 ސެޕްޓެމްބަރު 2021 | ބުދަ 05:18އަލިފުށީ ބިން ހިއްކުމާއި އެއަރޕޯޓް އެޅުމަށް 1 ސެޕްޓެމްބަރ 2021ގައި ވަނީ ހަވާލުކޮށްފައި
މުޙައްމަދު އަސްލަމް - މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ
އަލިފުށީ އެއަރޕޯޓްގެ މަސައްކަތް ފެށޭނެ ތާރީޚާބެހޭ ގޮތުން އިނގުރައިދޫ ދާއިރާގެ މެމްބަރު ހަސަަން އަހުމަދު ކުރެއްވި ސުވާލަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ޖަވާބެއް ނުދެއްވިއެވެ.
ލިޔުމުން ޖަވާބު ހޯދުމަށް އިނގުރައިދޫ ދާއިރާގެ މެމްބަރު ހަސަން އަހުމަދު ފޮނުއްވާފައިވާ ސުވާލުގައި ވަނީ، ބިން ހިއްކަން ފެށޭނެ ތާރީޚާއި އެއަރޕޯޓް މަސައްކަތް ފެށޭނެ ތާރީޚަކީ ކޮބައިތޯއެވެ. މި ސުވާލުގެ ޖަވާބު މިނިސްޓަރު މަޖިލީހަށް ފޮނުއްވި އިރު އެއަރޕޯޓްގެ ވާހަކަ ހިމަނާފައެއް ނެތެވެ.
އަލިފުށީ ބިން ހިއްކުމާއި އެއަރޕޯޓް އެޅުމަށް 1 ސެޕްޓެމްބަރ 2021ގައި ވަނީ ހަވާލުކުރެވިފައެވެ.
ބިން ހިއްކުމުގެ މަސައްކަތުގެ އީއައިއޭ އަދި ޑިޒައިން މަސައްކަތަށް 6 މަސްދުވަހުގެ މުއްދަތެއް ނަގާނެ ކަމަށް ވެސް މިނިސްޓަރު އަސްލަމް ވިދާޅުވެފައިވެއެވެ. އަދި ބިން ހިއްކަން ފަށާނެ ދުވަހެއް ޝެޑިއުލް ކުރެވޭނީ އެމްޓީސީސީގެ މަހާ ޖައްރާފާގެ މަސައްކަތަށް ބެލުމަށް ފަހު ކަމަށް ވެސް މިނިސްޓަރު ވަނީ ވިދާޅުވެފައެވެ. މިނިސްޓަރު ވިދާޅުވީ، އަދި ބިން ހިއްކަން ފަށާނެ ވަކި ތާރީޚެއް އެނގޭނީ ޑިޒައިން މަރުހަލާ ނިމުމުން ކަމަށެވެ. ރ. އަލިފުށީގައި ހިއްކުމަށް ހަމަޖެހިފައިވަނީ 50.6 ހެކްޓަރުގެ ބިމެވެ.
އަލިފުށްޓަކީ ފެނާ ނަރުދަމާގެ މަސައްކަތް ކޮންޓްރެކްޓް ކުރެވި އެ މަސައްކަތް ކުރިއަށް ދާ ރަށެއްކަމަށާއި، މަގު ހެދުމުގެ މަސައްކަތް ފެށުމަށް ނިންމާފައިވަނީ ފެނާއި ނަރުދަމާގެ މަސައްކަތް ނިމުމުން ކަމަށް މިނިސްޓަރު ވިދާޅުވިއެވެ. މި މަސައްކަތް ނިމޭމެ ކަމަށް ލަފާ ކުރެވެނީ 2022 ވަނަ އަހަރުގެ ދެވަނަ ކުއަރޓާރގައި ކަމަށާއި، މަގު ހެދުމުގެ މަސައްކަތުގެެ އަމަލީ މަސައްކަތް ފެށޭނީ އޭގެ ފަހުން ކަމަށް މިނިސްޓަރު ވިދާޅުވިއެވެ.
