އަލިފުށީ އައު ހޮސްޕިޓަލްގެ މަސައްކަތް މި އަހަރުގެ ފަހު ކުއަރޓަރގައި ފަށާނެ
ޕްލޭނިން މަރުހަލާ ކުރިއަށް ގެންދެވިފައިވަނީ އަލިފުށީ ދާއިރާގެ މެމްބަރާ ފުޅާ ދާއިރާއެއްގައި މަޝްވަރާ ކުރުމަށްފަހު
ރ. އަލިފުށީގައި ހޮސްޕިޓަލެއް އެޅުމަށް ނިންމައި މިހާރު ވަނީ ކޮންޓްރެކްޓް ކުރެވިފައި
ރ. އަލިފުށީގައި އަޅާ ހޮސްޕިޓަލްގެ މަސައްކަތް މިއަހަރުގެ ފަހު ކުއަރޓަރގައި ފެށޭނެ ކަމަށް މިނިސްޓަރ އޮފް ހެލްތް އަޙްމަދު ނަސީމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ރ. އަލިފުށީގައި އެޅުމަށް ހަމަޖެހިފައިވާ ހޮސްޕިޓަލް ޑިޒައިންކޮށް ނިމި، އެ ހޮސްޕިޓަލް އެޅުމުގެ މަސައްކަތް ފެށޭނެ ތާރީޚެއް ހޯދުމަށް އިނގުރައިދޫ ދާއިރާގެ މެމްބަރު ހަސަން އަހުމަދު ފޮނުއްވި ސުވާލަށް ލިޔުމުން ޖަވާބު ދެއްވަމުންނެވެ.
ރައްޔިތުންގެ މަޖިލީހުގެ ރައީސަށް އެޑްރެސް ކުރައްވައި ފޮނުއްވި ސިޓީގައި މިނިސްޓަރު ވިދާޅުވެފައިވަނީ އަލިފުށީގައި އެޅުމަށް ހަމަޖެހިފައިވާ 30 އެނދުގެ ހޮސްޕިޓަލްގެ ޑިޒައިނާއި ބިލް އޮފް ކުއަންޓިޓީ ނިމިފައިވާ ކަމަށެވެ. އަދި ޕްލޭނިން މަރުހަލާ ކުރިއަށް ގެންދެވިފައިވަނީ އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިންއާ ފުޅާ ދާއިރާއެއްގައި މަޝްވަރާ ކުރެވިގެން ކަމަށް ވެސް މިނިސްޓަރު ވިދާޅުވެފައިވެއެވެ.
ހޮސްޕިޓަލް އެޅުމަށް ބޭރުގެ ކުންފުޏަކާ 30 ޖޫން 2021ގައި ހަވާލުކޮށްފައިވާ ކަމަށާއި، އަމަލީ މަސައްކަތް މި އަހަރުގެ ފަހު ކުއާޓަރގައި ކުރުމަށް ހަމަޖެހިފައިވާ ކަމަށް ވެސް މިނިސްޓަރު ވަނީ ވިދާޅުވެފައެވެ.
ސިއްޙީ ދާއިރާ އިތުރަށް ހަރުދަނާ ކުރުމުގެ ގޮތުން ރާއްޖޭގެ އެކިކަންކޮޅުތަކުގައިހުރި 5 ހޮސްޕިޓަލެއް ޓާޝަރީ ފެންވަރަށް ބަދަލުކުރުމުގެ މަސައްކަތް ސަރުކާރުން އަންނަނީ ކުރަމުންނެވެ.
