ށ. ނަލަންދޫ ރިސޯޓެއްގެ ގޮތުގައި ތަރައްޤީކުރުމުގެ މަޝްވަރާތައް ފަށައިފި
ތަން ސަރުކާރުން ނަގާނަމަ ތަން ހިންގާ ފަރާތަށް ބަދަލު ދޭން ޖެހޭނެ
ރައީސް މިހެން ވިދާޅުވީ ށ. ފޯކައިދޫ ދަނޑުވެރިންނާއި މަސްވެރިންނާ ރައީސް ބައްދަލުކުރައްވައި ވާހަކަފުޅު ދައްކަވަމުން
ށ. ނަލަންދޫ ރިސޯޓެއްގެ ގޮތުގައި ތަރައްޤީކުރުމުގެ މަޝްވަރާތައް ފަށާފައިވާ ކަަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
ބުދަ ދުވަހުގެ ހެނދުނު ށ. ފޯކައިދޫ މަސްވެރިންނާއި ދަނޑުވެރިންނާ ބައްދަލުކުރައްވައި ވާހަކަފުޅުދައްކަވަމުން ރައީސް ވިދާޅުވީ ނަަލަންދޫ ރިސޯޓަަކަށް ހެދުމަށް ރަށް ހިންގާ ފަރާތާއެކު މަޝްވަރާތައް ފަށާފައިވާ ކަމަށާއި އެތަން ސަރުކާރުން ނަގާނަމަ ތަން ހިންގާ ފަރާތަށް ބަދަލު ދޭން ޖެހޭނެ ކަމަށެވެ. އަދި ބަދަލު ދޭން ޖެހޭނެ އަގު ހޯދައި ދިނުމަށް މިނިވަން ފަރާތަކާ ހަވާލުކޮށްފައިވާ ކަމަށް ވެސް ރައީސް ވިދާޅުވިއެވެ.
ނަލަންދޫ މިވަގުތު ބޭނުންކުރަމުން އަންނަނީ ލަނޑާ މަސްވެރިކަން ކަހަލަ މަސައްކަތެއް ކުރުމަށް ކަމަށްވާއިރު އެ ރަށަކީ ށ. އަތޮޅުގެ ވަރަށް ގިނަ ބައެއްގެ އާމްދަނީއާ ގުޅިފައިވާ ރަށެކެވެ. އެ ރަށުގެ ބޮޑުމިން 90 ހެކްޓަރަށް ވުރެ ބޮޑެވެ.
މި ބައްދަލުވުމުގައި ރައްޔިތުން ވަނީ ވަރަށް ގިނަ ކަންބޮޑުވުންތަކުގެ ވާހަކަތައް ހިއްސާކޮށްފައެވެ. އެގޮތުން ރަށް ގިރުމުގެ މައްސަލަ ފާހަގަކޮށްފައިވެއެވެ. މިކަމާބެހޭ ގޮތުން ރައީސް ވިދާޅުވީ ރަށް ގިރިމުގެ މައްސަލައިގައި ޕްލޭނިންގ މިިނިސްޓްރީއާއެކު ސަރވޭއެއް ކުރިއަށް ގެންދަވާނެ ކަމަށާއި ރަށުގައި ޗަސް ބިން އޮތުމުން އެތަންތަނަށް ފަސް އަޅާނެ ކަމަށެވެ. އަދި ދަނޑުވެރިކަން ތަރައްޤީ ކުރުމަށް ހާއްސަ ސަމާލުކަމެއް ސަރުކާރުންދޭކަން ފާހަގަކުރައްވައި ރައީސް ވިދާޅުވީ ދަނޑުވެރިކަމަކީ ވަރަށް ރަނގަޅަށް ތަރައްްޤީ ކުރެވޭނެ ސިނާއަތެއް ކަމަށެވެ.
ކުދި ތަންތާނގައި ވެސް ދަނޑުވެރިކަން ކުރެވޭނެކަމުގެ ޔަޤީންކަން މިހާރު ލިބިފައިވާއިރު އެކަމަށް ބާރު އަޅުއްވާނެ ކަމަށާއި ދަނޑުވެރިން އުފައްދާތަކެތި ތާޒާކަންމަތީގައި ފޯރުކޮށްދީ އެތަކެއްޗަށް ހަމަައަގު ހޯދައިދީ، އިންވެސްޓް ކުރެވޭނެ މަގު ފަހިކޮށް އެކަަމަށް ލޯނެއް ސަރުކާރުން ހަމަޖައްސައިދޭނެ ކަމަށް ރައީސް ވަނީ ވިދާޅުވެފައެވެ. އަދި ދަނޑުވެރިކަމަށް އެކަށީގެންވާ ބަދަލެއް ގެންނާނެ ކަމަށް ވެސް ވިދާޅުވިއެވެ.
މަސްވެރިކަމުގެ ސިނާއަތަށް އަލިއަޅުއްވާލައްވައި ރައީސް ވިދާޅުވީ ޕްރައިވެޓް ސެކްޓަރގެ ކުންފުނިތަކުން މަސް ގަންނަނީ އެންމެ ރަނގަޅު އަގުގައި ނޫން ކަމަށެވެ. ސަރުކާރުން އެކަމަށް ނުވަދެ މަޑު ކުރަނީ ޕްރައިވެޓް ސެކްޓަރއަށް ޖާގަދިނުމަށް ކަމަށާއި ޕްރައިވެޓް ސެކްޓަރއާ ވާހަކަ ދައްކައިގެން އެކަން ހައްލުކުރުމުގެ މަސައްކަތް ސަރުކާރުން ކުރަމުންދާ ކަމަށް ރައީސް ފާހަގަކުރެއްވިއެވެ. މި ބައްދަލުވުމުގައި ވާހަކަ ދައްކަވަމުން ބައެއް މަސްވެރިން ވަނީ ރަށުގައި އައިސްޕްލާންޓެއް ނެތުމުން އެކަމުގެ ކަންބޮޑުވުން ފާޅުކުރައްވައި މަހުގެ ހަމަ އަގު ސަރުކާރުން ކަނޑައަޅައިދިނުމަށް އެދިފައެވެ. މަސްވެރިންގެ މި ކަންބޮޑުވުންތަކާ ގުޅޭގޮތުން ރައީސް ވިދާޅުވީ އެކަން ބައްލަވާނެ ކަމަށާއި އެކަމަށް އަވަސް ހައްލެއް ހޯއްދަވައިދެއްވާނެ ކަމަށެވެ. އަދި އެކަމަށް ސަރުކާރުން އިންވެސްޓް ކުރާނެ ކަމަށާއި ކުރީ ސަރުކާރުން މަސް ގަންނަމުންދިޔައީ ގެއްލުމުގައި ކަަމަށެވެ. އޭރު މަސްވެރިންނާ ބައްދަލުކުރެއްވި ކަމަށާއި ބައެއް މަސްވެރިން މަހުގެ އަގު ދަށްވިޔަސް އެންމެ ރަނގަޅު ކަމަށް ބުނި ކަމަށާއި މިފްކޯ އިން މަސްވެރިންނަށް ދޭން ޖެހޭ ފައިސާ މަސްވެރިންނަށް ދިނުމުގެ މަސައްކަތް ފެށި ކަމަށެވެ. އަދި މިފްކޯއިން މީގެ ކުރިން މަސް ބޭރުކުރަމުން ދިޔައީ ޗާޓަރ ބޯޓެއްގައިި ކަމަށާއި އެހެންނަމަވެސް މިހާރު މިފްކޯ އިން މަސް ބޭރު ކުރަނީ އަމިއްލަ އުޅަނދެއްގައި ކަމަށް ރައީސް ވިދާޅުވިއެވެ. މިކަމުގެ ސަބަބުން ޚަަރަދު ކުޑަކުރެވުނު ކަމަށް ވެސް ވިދާޅުވިއެވެ.
މަސްވެރިން ބާނާ މަހަަށް ހަމަ އަގު ސަރުކާރުން ހަމަޖައްސައިދޭނެ ކަމަށާއި ސަރުކާރުން މިހާރު ފަށާފައިވާ ކަންތައްތަކުގެ ނަތީޖާ ފެންނަން ކުޑަ ދުވަސްކޮޅެއް ދެއްވުމަށް ރައީސް ވަނީ އެދިވަޑައިގެންފައެވެ.
މި ބައްދަލުވުމުގައި ވާހަކަ ދައްކަވަމުން އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވީ އެގްރޯނެޓްގެ ފަރާތުން މަސައްކަތް ކުރަނީ ދަނޑުވެރިން އުފައްދާ ތަކެތި ވިކޭނެ މަގު ފަހިކޮށްދިނުމަށް ކަމަށާއި އެކަމުގެ ޔަޤީންކަން ދަނޑުވެރިންނަށް އަރުވާކަމަށެވެ. އަދި ކުރިއަތް އޮތް ދެ އަހަރު ދުވަހުގެ ތެރޭގައި ސަރުކާރުން މަސްވެރިކަމުގެ ސިނާއަތަށް އިންޤިލާބީ ބަދަލެއް ގެންނާނެ ކަމަށް މިނިސްޓަރު ވިދާޅުވިއެވެ
