ފްރާންސާއި ޕޯޗުގަލަށް މޮޅެއް

ފީފާ ވޯލްޑް ކަޕުގެ ޔޫރަޕް ކޮލިފައިންގައި އަންގާރަ ދުވަހުގެރޭ ކުޅުނު މެޗުތަކުން ދުނިޔޭގެ ޗެމްޕިއަން ފްރާންސާއި ޕޯޗުގަލް މޮޅުވެއްޖެއެވެ.

ކޮލިފައިންގެ ގްރޫޕް ޑީގައި ހިމެނޭ ފްރާންސް މޮޅުވީ ފިންލެންޑް އަތުން 2-0 ގެ ނަތީޖާއަކުންނެވެ. މި މެޗުން ފްރާންސް މޮޅުވިއިރު، ކޮލިފައިންގައި މީގެ ކުރިން ކުޅުނު ދެ މެޗުންވެސް އެ ގައުމު ވަނީ އެއްވަރުވެފައެވެ.

އަމިއްލަ ގައުމުގައި ކުޅުނު މެޗުގައި ފްރާންސުން މޮޅު ކުޅުމެއް ދެއްކިއިރު، މެޗުގެ 25 ވަނަ މިނެޓުގައި އެ ގައުމުން ވަނީ ލީޑު ނަގާފައެވެ. ކަރީމް ބެންޒެމާގެ އެހީއާއެކު މި ލަނޑު ފްރާންސަށް ކާމިޔާބުކޮށްދިނީ އެންޓޮއިން ގްރީޒްމަނެވެ. އަދި ދެވަނަ ހާފު ފަށައިގެން އަށްވަނަ މިނެޓުގައި ގްރީޒްމަން ވަނީ ފްރާންސަށް ލީޑު ފުޅާކޮށްދީފައެވެ.

މި މެޗުގައި ގްރީޒްމަން ދެ ލަނޑު ޖެހިއިރު، އޭނާ މިހާރު ވަނީ 41 ލަނޑާއެކު ފްރާންސަށް އެންމެ ގިނަ ލަނޑު ޖަހައިދިން ލިސްޓުގެ ތިންވަނައިގައި އޮތް ފުޓްބޯޅަ ލެޖެންޑް މިޝެލް ޕްލެޓިނީއާ އެއްވަރުކޮށްފައެވެ. މި ލިސްޓުގެ އެއްވަނައިގައި އޮތް ތިއަރީ އޮންރީ 51 ލަނޑު ޖަހާފައިވާއިރު، ދެވަނައިގައި އޮތީ 46 ލަނޑު ހަމަކޮށްފައިވާ އޮލިވިއޭ ޖިރޫޑެވެ.

އަންގާރަ ދުވަހުގެރޭ ހޯދި މޮޅާއެކކު ގްރޫޕް ޑީގެ އެއްވަނައިގައި ފްރާންސް އޮތީ ކުޅުނު ހަ މެޗުން ލިބުނު 12 ޕޮއިންޓާއެކުއެވެ. ދެވަނައިގައި އޮތީ ފަސް މެޗުން ފަސް ޕޮއިންޓް ހޯދާފައިވާ ޔޫކްރޭނެވެ. އަދި ތިންވަނައިގައި އޮތް ފިންލެންޑަށް ވަނީ ހަތަރު މެޗުން ފަސް ޕޮއިންޓް ލިބިފައެވެ.

މީގެ އިތުރުން ކޮލިފައިންގެ ގްރޫޕް އޭގައި ހިމެނޭ ޕޯޗުގަލް މޮޅުވީ އަޒަބައިޖާން އަތުން 3-0 ގެ ނަތީޖާއަކުންނެވެ.

އަޒަބައިޖާނުގައި ކުޅުނު މި މެޗުގައި ސަސްޕެންޝަނުގެ ސަބަބުން ޕޯޗުގަލުގެ ތަރި ކްރިސްޓިއާނޯ ރޮނާލްޑޯ ކުޅެފައެއް ނުވެއެވެ. މި މެޗުގައި ޕޯޗުގަލުން ލީޑު ނަގާފައިވަނީ މެޗުގެ 26 ވަނަ މިނެޓުގައެވެ. މި ލަނޑު އެ ގައުމަށް ކާމިޔާބުކޮށްދިނީ ބެނާޑޯ ސިލްވާއެވެ. އޭގެ ފަސް މިނެޓު ފަހުން އަންޑްރޭ ސިލްވާ ޕޯޗުގަލަށް ލީޑު ފުޅާކޮށްދިންއިރު، އެ ޓީމުގެ ތިންވަނަ ލަނޑު ދެވަނަ ހާފުގައި ކާމިޔާބުކޮށްދިނީ ޑިއޯގޯ ޖޮޓާއެވެ.

މި މޮޅާއެކު ގްރޫޕް އޭގެ އެއްވަނައިގައި ޕޯޗުގަލް އޮތީ ފަސް މެޗުން 13 ޕޮއިންޓާއެކުއެވެ. ދެވަނައިގައި އޮތް ސާބިއާއަށް ފަސް މެޗުން ވަނީ 11 ޕޮއިންޓް ލިބިފައެވެ. ކޮލިފައިންގައި އަންގާރަ ދުވަހުގެރޭ ކުޅުނު މެޗުން ސާބިއާ ވަނީ އަޔަލެންޑާ 1-1 ގެ ނަތީޖާއަކުން އެއްވަރުވެފައެވެ. މީގެ އިތުރުން މި ގްރޫޕުގެ ތިންވަނައިގައި އޮތީ ހަތަރު މެޗުން ހަ ޕޮއިންޓް ހަމަކޮށްފައިވަ ލަގްޒަމްބާގެވެ.