ނަފްރަތުގެ ޢަމަލުތަކަކީ ޖިނާއީ ކުށެއްގެ ގޮތުގައި ކަނޑައެޅުމަށްޓަކައި ޤާނޫނުލްޢުޤޫބާތަށްގެނައުމަށް ސަރުކާރުގެ ފަރާތުން ހުށަހެޅި އިޞްލާޙު، ރައްޔިތުންގެ މަޖިލީހުގެ ޖުޑީޝަރީ ކޮމިޓީން ދިރާސާކުރެއްވުމަށްފަހު، އެ ބިލަށް ގެންނެވުމަށް ފާސްކުރައްވާފައިވާ އިޞްލާޙުތަކާ ގުޅޭގޮތުން މަޝްވަރާކުރުމަށްޓަކައި ބަންޑާރަ ނައިބު ބާއްވަވާ ސިލްސިލާ ބައްދަލުވުންތައް ނިންމާލައިފިއެވެ.
އޭޖީ އޮފީހުން ހާމަކޮށްފައިވާ ގޮތުގައި އަންގާރަ ދުވަހު ބޭއްވި ބައްދަލުވުމުގައި، އެ ބިލަށް ކޮމިޓީން ގެނެސްފައިވާ އިޞްލާޙުތައް އިތުރަށް ފުރިހަމަ ކުރުމަށްޓަކައި، ހުށަހެޅިދާނެ އިޞްލާޙުތަކާ ގުޅޭގޮތުން މިނިސްޓްރީ އޮފް އިސްލާމިކް އެފެއާޒްއާ އެއްކޮށް ވަނީ މަޝްވަރާކުރެވިފައެވެ. އަދި މި ބައްދަލުވުމުގައި އެއްބަސްވެވުނު އިޞްލާޙުތައް މިހާރު ވަނީ ރައްޔިތުންގެ މަޖިލީހުގެ ޖުޑީޝިއަރީ ކޮމިޓީއާ ޙިއްޞާކުރެވިފައި ކަމަށް އޭޖީ އޮފީހުން ބުނެއެވެ.
މިމަޝްވަރާތަކަކީ އޭޖީ އަލްއުސްތާޛު އިބްރާހީމް ރިފްޢަތުގެ އިސްނެންގެވުމާއެކު ކުރިޔަށް ގެންދިޔަ މަޝްވަރާތަކެކެވެ.
ސަރުކާރުގެ ފަރާތުން ތުޅާދޫ ދާއިރާގެ މެމްބަރ ޙިސާން ޙުސައިން ހުށަހަޅުއްވާފައިވާ މިބިލް ފާސްކުރުމަށް ތަޅުމަށް ފޮނުވުމުން ނިމިގެންދިޔަ ދެވަނަ ދައުރުގެ ފަހު ޖަލްސާގައިވަނީ އެބިލް އަލުން އަނބުރާ ކޮމިޓީއަށް ފޮނުވާލާފައެވެ. މިބިލް ހުށަހެޅުމާއެކު ސަރުކާރަށް ބޮޑެތި ފާޑުކިޔުންތައް އަމާޒުވެފައިވާއިރު ބިލް ހުށަހެޅުއްވި މެމްބަރަށްވެސް ބޮޑެތި ފާޑުކިޔުންތައް އަމާޒުވިއެވެ.
މިބިލް ޖުޑީޝަރީ ކޮމިޓީން ދިރާސާކުރުމަށްފަހު ބިލަށް ބޮޑެތި ބަދަލުތަކެއް ގެނައެވެ. އަދި އެ ބަދަލުތައް ކަމުނުގޮސްގެން ފަހު ވަގުތު ތަޅުމުންވެސް ބިލަށް ބޮޑެތި އިސްލާހުތަކެއް ހުށަހެޅިއެވެ. ނަމަވެސް ބިލް އަނބުރާ ކޮމިޓީއަށް ފޮނުވާލީ އެދުވަހު ތަޅުމުގައި އެމްޑީޕީގެ ދެ ފެކްޝަންގެ ދެމެދުގައި ބޮޑެތި ދެ ބަސްވުންތަކެއް ހިނގުމަށްފަހުއެވެ. ބިލް އަނބުރާ ދިރާސާކުރުމަށް ކޮމިޓީއަށް ފޮނުވާލާފައިވަނީ ބިލާ ގުޅޭގޮތުން ހުރި ކަންބޮޑުވުންތަކަށް ހައްލު ހޯދުމުގެ ގޮތުންނެވެ
ކޮމިޓީން ބިލު ދިރާސާކޮށް ނިންމީ އެކަމުގައި ލަފާ ހޯދަން ޖެހޭ ފަރާތްތަކުގެ ލަފާ ހޯދުމަށްފަހުގައި ކަމަށާއި، އިސްލާމިކް މިނިސްޓްރީގެ ލަފަޔާ އެއްގޮތަށް ބިލަށް ބަދަލުވެސް ގެންނެވި ކަމަށް ޖުޑީޝަރީ ކޮމިޓީގެ މުޤައްރިރު އިމްތިޔާޒު ފަހުމީ ވަނީ ވިދާޅުވެފައެވެ.
މިބިލް ހުށަހެޅުމުގެ މައިގަނޑު މަގުސަދަކީ އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުމަކީ ކުށެއް ކަމަށް ކަނޑައެޅުމެވެ.
