ބޮޑު މުސާރައަކަށް ސަލާހު ޑިމާންޑުކުރި ވާހަކަ ދޮގުކޮށްފި

ލިވަޕޫލާއެކު ހަދާފައި އޮތް އެއްބަސްވުން އާކުރަން މިސްރުގެ ތަޖުރިބާކާރު ފޯވާޑް މުހައްމަދު ސަލާހު ބޭނުންވަނީ ބޮޑު މުސާރައަކަށް ކަމަށް ބުނެ ދެކެވޭ ވާހަކަތައް ލިވަޕޫލުގެ ޚަބަރުތައް ގެނެސްދޭ މިޑީއާތަކުން ދޮގުކޮށްފިއެވެ.

ލިވަޕޫލުން އުމުރުން 29 އަހަރުގެ ސަލާހު ގަތީ 2017 ވަނަ އަހަރުގެ ޖޫން މަހު ރޯމާއަށް 35 މިލިޔަން ޕައުންޑް ދެއްކުމަށްފަހުއެވެ. އޭގެ ފަހުން 2018 ވަނަ އަހަރު ސަލާހު ލިވަޕޫލުގެ އެއްބަސްވުން އާކުރިއިރު، އެ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ހޫނު މޫސުމުގައެވެ.

ލިވަޕޫލުން ސަލާހުގެ އެއްބަސްވުން އާކުރުމުގެ މަޝްވަރާތައް ކުރިއަށްގެންދާއިރު، އޭނާ މި ވަގުތު ލިވަޕޫލާއެކު ހަދާފައިވާ އެއްބަސްވުމުގެ ދަށުން މުސާރައިގެ ގޮތުގައި ހަފުތާއަކު ދެ ލައްކަ ޕައުންޑް ލިބެއެވެ. އެކަމަކު އައު އެއްބަސްވުމުގައި ސޮއިކުރަން ސަލާހު ބޭނުންވަނީ މުސާރަ ބޮޑުކުރުމުން ކަމަށާއި، އެގޮތުން ހަފުތާއަކު ފަސް ލައްކަ ޕައުންޑުގެ މުސާރައެއް ދޭން ސަލާހު ޑިމާންޑުކޮށްފައިވާ ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.

އެކަމަކު ލިވަޕޫލުގެ ޚަބަރުތައް ގެނެސްދޭ މީޑިއާތަކުން ވަނީ އެ ކުލަބުގެ އޮފިޝަލުންނާ ހަވާލާދީ އެ ވާހަކަތައް ދޮގުކޮށްފައެވެ. މީގެ އިތުރުން "ޓޯކްސްޕޯޓް" އަށް ދިން އިންޓަވިއުއެއް ލިވަޕޫލުގެ ކުރީގެ މިޑްފީލްޑަރު ޑެނީ މާފީ ބުނީ ސަލާހަކީ އޭނާއަށް ލިބޭ މުސާރައެއްގެ ދެ ގުނަ އިތުރަށް ހޯދަން މަސައްކަތްކުރާނެ ކުޅުންތެރިއެއް ނޫން ކަމަށެވެ. އަދި އެ ފަދަ ކަމެއް ސަލާހުގެ ފަރާތުން ފެނިއްޖެނަމަ ހައިރާންވާނެ ކަމަށްވެސް މާފީ ވަނީ ބުނެފައެވެ.

ރިޕޯޓުތައް ބުނާ ގޮތުން ލިވަޕޫލުން އަންނަނީ ސަލާހުގެ އެއްބަސްވުން އިތުރު ތިން އަހަރަށް އާކުރަން މަސައްކަތް ކުރަމުންނެވެ. އެކަމަކު އޭނާ ހޯދަން ރެއާލް މެޑްރިޑާއި ޕީއެސްޖީން މަސައްކަތްކުރަމުން އަންނަ ކަމަށްވެސް ރިޕޯޓުތައް ބުނެއެވެ.

ލިވަޕޫލަށް ބަދަލުވެ ސަލާހު ގިނަ ރިކޯޑުތަކެއް މުގުރާލާފައިވާއިރު، އޭނާ ވަނީ މިހާތަނަށް ލިވަޕޫލަށް ކުޅެދިން 206 މެޗުގައި 127 ލަނޑު ޖަހާފައެވެ. އަދި މި ފަހުން ލިވަޕޫލުން ހޯދި ކާމިޔާބީތަކުގައި ސަލާހު ވަނީ މުހިންމު ދައުރެއް އަދާކޮށްފައެވެ. އެގޮތުން ސަލާހު ވަނީ ލިވަޕޫލާއެކު އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕުގެ އިތުރުން ފީފާ ކުލަބު ވޯލްޑް ކަޕުވެސް ކާމިޔާބުކޮށްފައެވެ.

ލިވަޕޫލުން ސަލާހުގެ އެއްބަސްވުން އާކުރުމުގެ މަސައްކަތްކުރަމުން އަންނައިރު، އެ ޓީމަށް ކުޅެމުން އަންނަ އިންގްލެންޑުގެ ޒުވާން ތަރި ޓްރެންޓް އަލެކްސަންޑަ-އާނޯލްޑާއި، ބްރެޒިލުގެ މިޑްފީލްޑަރު ފަބީނިއޯ އާއި، ބްރެޒިލުގެ ތަޖުރިބާކާރު ގޯލްކީޕަރު އެލިސަން ބެކާ އާއި، ނެދަލެންޑްސްގެ އިތުބާރު ޑިފެންޑަރު ވާޖިލް ވެން ޑައިކާއި، ސްކޮޓްލެންޑުގެ ޑިފެންޑަރު އެންޑީ ރޮބަޓްސަން އަދި އެ ޓީމުގެ ކެޕްޓަން ޖޯޑަން ހެންޑަސަން ވަނީ ދާދި ފަހުން އެއްބަސްވުން ދިގު މުއްދަތަކަށް އާކޮށްފައެވެ.