ފުވައްމުލަކުގައި ކޮވިޑް-19 އަށް ޓެސްޓް ކުރެވެން ނެތް މައްސަލަ މަޖިލީހަށް ހުށަހަޅައިފި
7 ސެޕްޓެމްބަރު 2021 | އަންގާރަ 10:38ކޮވިޑް 19 އާ ގުޅިގެން މޮނިޓަރިންގެ ހާލަތުގައި ބާއްވަން ޖެހުމުގެ ސަބަބުން ގިނަގުނަ ދަތިތަކަކާއި އުނދަގޫތަކެއް ކުރިމަތިވޭ
އާދަމް ޝަރީފް - މަޑުއްވަރީ ދާއިރާގެ މެމްބަރު
ފުވައްމުލަކުގައި ކޮވިޑް-19 އަށް ޓެސްޓް ކުރެވޭނެ ވަސީލަތެއް ނެތް މައްސަލަ މަޖިލީހަށް ހުށަހަޅައިފިއެވެ.
މި މައްސަލަ މަޖިލީހަށް ހުށަހެޅުއްވީ އިދިކޮޅު ޕީއެންސީގެ ނާއިބް ރައީސް މަޑުއްވަރީ ދާއިރާގެ މެމްބަރު އާދަމް ޝަރީފް އުމަރެވެ. މަޖިލީހުގެ ރައީސް މުހައްމަދު ނަޝީދަށް އެޑްރެސްކޮށް އާދަމް ޝަރީފް ފޮނުވާފައިވާ ސިޓީގައި ބުނެފައިވަނީ ކޮވިޑް-19 އާގުޅިގެން މޮނިޓަރިންގެ ހާލަތުގައި ބާއްވަން ޖެހުމުގެ ސަބަބުން ގިނަގުނަ ދަތިތަކަކާއި އުނދަގޫތަކެއް ފުވައްމުލަކު ސިޓީގެ ރައްޔިތުން އަންނަނީ ތަހައްމަލު ކުރަމުން ކަމަށެވެ. އަދި ޕީ.ސީ.އާރ ޓެސްޓް ފުވައްމުލަކު ސިޓީގައި ހެދޭނެ އިންތިޒާމު މިހާތަނަށް އައި އިރުވެސް ހަމަޖެހިފައި ނެތުމުގެ ސަބަބުން، ދަތުރުފަތުރު ކުރަން ދަތިވެ، އިޤުތިޞާދީގޮތުންނާއި މާލީގޮތުން ބޮޑެތި ގެއްލުންތައް އެ ސިޓީއަށް ލިބެމުން ދާކަމަށެވެ.
ފުވައްމުލަކު ސިޓީއަކީ ވެސް ދައުލަތުން "ސިޓީ"ގެ ދަރަޖަ ދީފައިވާ ރަށެއް ކަމަށާއި، އެހެންނަމަވެސް، ފުވައްމުލަކު ސިޓީގެ ރައްޔިތުން ޕީ.ސީ.އާރ ޓެސްޓް ހަދަން ސާމްޕަލް ނެގުމަށްފަހު އެ ސާމްޕަލް ފޮނުވަންޖެހެނީ އެހެން ސިޓީއަކަށް ކަމަށް ބުނެފައިވެއެވެ. އަދި ޓެސްޓްގެ ސާމްޕަލް އެހެން ސިޓީއަކަށް ފޮނުވުމަށްފަހު، އެ ސިޓީއަކުން ޓެސްޓްގެ ނަތީޖާ ލިބެންދެން، ތިން ހަތަރު ދުވަހު މަޑުކުރަންޖެހުމަކީ ނިހާޔަތަށް ކަންބޮޑުވާ ކަމެއް ކަަމަށް ސިޓީގައި ބުނެފައިވެއެވެ.
ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރުބަލާ ކޮމިޓީއަށް މި މައްސަލަ ހުށަހަޅުއްވައިގެން، ފުވައްމުލަކު ސިޓީގައި ޕީ.ސީ.އާރ ޓެސްޓް ހެދޭނެ އިންތިޒާމު މިހާ ދުވަސްވީއިރުވެސް ހަމަޖެހިފައި ނުވަނީ ކީއްވެކަމާއި ޕީ.ސީ.އާރ ޓެސްޓް ހެދޭނެ އިންތިޒާމު ފުވައްމުލަކުގައި ހަމަޖެހޭނެ ތާރީޚު ސާފުކޮށްދެއްވުމަށް އާދަމް ޝަރީފްވަނީ މި ސިޓީގައި އެދިފައެވެ.
