ރޭޕްގެ ތުހުމަތުން އަލީބާބާގެ މެނޭޖަރު ސަލާމަތްވެއްޖެ
7 ސެޕްޓެމްބަރު 2021 | އަންގާރަ 08:47ރޭޕްކޮށްފައިވާކަމަށް ބުނެ ވެރިންގެ މައްޗަށް ބޮޑެތި ތުހުމަތުތަކެއް ކޮށްފައިވޭ
ޗައިނާގެ އަލީބާބާ ފައުންޑޭޝަން
ރޭޕްގެ ބޮޑެތި ތުހުމަތުތަކެއް ކުރެވުނު ޗައިނާގެ އަލީބާބާ ފައުންޑޭޝަންގެ މެނޭޖަރުގެ މައްސަލަ ކޯޓުން ބޭރުކޮށްލައިފިއެވެ.
އަލީބާބާ ފައުންޑޭޝަނުގައި މަސައްކަތްކުރާ އަންހެން މުވައްޒަފަކު ވަނީ އޭނާ ހޮޓަލެއްގެ ކޮޓަރިއެއްގެ ތެރޭގައި ރޭޕްކޮށްފައިވާކަމަށް ބުނެ، އޭނާގެ ވެރިންގެ މައްޗަށް ބޮޑެތި ތުހުމަތުތަކެއް ކޮށްފައެވެ. އެގޮތުން ކްލައިންޓަކާ ބައްދަލުކުރުމަށް ކަމަށްބުނެ، އޮޅުވާލައިގެން ގެންގޮސް ރޭޕްކޮށްފައިވާކަމަށް ބުނާ މި މައްސަލަ ފުލުހުން ވަނީ ތަހުގީގުކޮށްފައެވެ.
އެކަމާ ގުޅޭގޮތުން ކުންފުނީގެ ޗީފް އެގްޒެކެޓިވް ޑޭނިއަލް ޒަންގް ވިދާޅުވީ، ތުހުމަތު ކުރެވުނު 2 މީހަކު މިހާރު މަގާމުން އިސްތިއުފާ ދީފައިވާ ކަމަށެވެ. އަދި އިތުރު މެނޭޖަރަކަށް ވެސް ތުހުމަތު ކުރެވޭއިރު، އެކަމަށް ބާރު ލިބިދޭ ގޮތަކަށް އޭނާ ވާހަކަ ދައްކާފައިވާކަމަށް ވިދާޅުވިއެވެ. އަދި އޭނާ ވަޒީފާއިން ވަކި ކުރާނީ ދުވަހަކުވެސް އަލީބާބާގެ ވަޒީފާއަކަށް އަލުން ނުގުޅެވޭ ގޮތަށް ކަމަށް ޑޭނިއަލް ވިދާޅުވިއެވެ. ޑޭނިއަލް ސޮއި ކުރައްވައި ފޮނުއްވި މެމޯއެއްގައި ވަނީ މި ހާދިސާގައި ރޭޕްގެ ޝިކާރައަކަށްވި ކަމަށް ބުނާ އަންހެން މީހާއަށް ފޯރުކޮށްދޭންޖެހޭ ރައްކާތެރިކަން އެންމެ މަތީ ދަރަަޖައަށް ފޯރުކޮށްދޭނެ ކަމުގެ ޔަގީންކަން ދީފައެވެ.
އެންމެ ފަހުން މިހާރު މި މައްސަލައިގައި ޖިނާއީ ކުށެއް ކޮށްފައި ނުވާކަމަށް ބުނެ، ކޯޓުން މި ވަނީ މި މައްސަލަ ބޭރުކޮށްލާފައެވެ. އެހެންނަމަވެސް، 15 ދުވަސް ވަންދެން އޭނާ ބަންދުގައި ބަހައްޓާނެކަމަށް ފުލުހުން ވަނީ ބުނެފައެވެ.
