ރ. އެއްތިގިލީގައި ފަތުރުވެރިކަން ތަރައްގީކުރުމަށް އޮކްޓޯބަރ މަހު ބިޑަށް ހުޅުވާލާނެ ކަމަށް ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ، ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު ލިޔުމުން ޖަވާބު ހޯއްދެވުމަށް ފޮނުއްވި ސުވާލަށް ޖަވާބު ދެއްވައި މަޖިލީހަށް ފޮނުއްވި ސިޓީގައެވެ. އިނގުރައިދޫ ދާއިރާގެ މެންބަރު ޙަސަން އަޙްމަދު، މިނިސްޓަރ އޮފް ޓޫރިޒަމް ޑޮކްޓަރ ޢަބްދުالله މަޢުޞޫމްއާ ލިޔުމުން ޖަވާބު ހޯއްދެވުމަށް ކުރައްވާފައިވާ ސުވާލަކީ، ރ. އަލިފުށި ހިއްކައިގެން އެޅުމަށް ހަމަޖެހިފައިވާ ޓޫރިސްޓު ރިޒޯޓުގެ މަސައްކަތް ފެއްޓޭނެ ތާރީޚަކީ ކޮބައިތޯ އެވެ.

ޖަވާބުގައި މިނިސްޓަރު ވިދާޅުވެފައިވަނީ، ރ. އަލިފުށީ ފަޅުން ހިއްކުމަށް ހަމަޖެހިފައިވާ 10 ހެކްޓަރާއެކު ރ. އެއްތިގިލި ފަތުރުވެރިކަން ތަރައްގީކުރުމަށް 25 އޮކްޓޯބަރ 2021ގައި ހުޅުވާލެވޭ ބީލަމުގައި އިއުލާން ކުރެވޭނެ ކަމަށެވެ.

އެއްތިގިއްޔަކީ އަލިފުއްޓާ އެއް ފަޅެއްގައި އޮންނަ ފަޅު ރަށެކެވެ.

އެ ރަށް ފަތުރުވެރިކަމަށް ހުޅުވާލައި ރިސޯޓެއް ތަރައްގީކުރައްވާނެ ކަމަށް ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ވަނީ 2018 ވަނަ އަހަރު އޮގަސްޓު މަހުގެ ތެރޭގައި އަލިފުއްޓަށް ކުރެއްވި ދަތުރުފުޅުގައި ވިދާޅުވެފައެވެ.

އަލިފުށީ ފަޅުގައި ރިސޯޓެއް ތަރައްގީކުރުމަށް ހުޅުވާލާނެ ކަމަށް މިނިސްޓަރު ވިދާޅުވެފައިވާއިރު، އަލިފުށީގައި އެއާޕޯޓެއް އެޅުމަށް މި މަހުގެ އެއްވަނަ ދުވަހު ވަނީ އެމްޓީސީސީއާ ހަވާލުކޮށްފައެވެ.