ފާއިތުވި 24 ގަޑިއިރު 120 މީހުން ޕޮޒިޓިވްވެ، ކޮވިޑަށް ޕޮޒިޓިވްވީ މީހުންގެ ޖުމްލަ އަދަދު 82،099ށް އަރައިފި
6 ސެޕްޓެމްބަރު 2021 | ހޯމަ 17:53ރިސޯޓްތަކުން 20 މީހުން ވަނީ ޕޮޒިޓިވްވެފައި
ކޮވިޑަށް ޓެސްޓު ކުރުމަށް ސާމްޕަލް ނެގުން
ފާއިތުވި 24 ގަޑިއިރު ރާއްޖެއިން 120 މީހުން ކޮވިޑް-19ށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ޖުމްލަ 5228 ސާމްޕަލެއް ވަނީ ޓެސްޓްކޮށްފައެވެ. މީގެތެރެއިން 120 ސާމްޕަލް ޕޮޒިޓިވްވިއިރު މާލެ ސަރަހައްދުން 30 މީހުން ޕޮޒިޓިވްވެފައިވެއެވެ. އަތޮޅުތަކުން 70 މީހުން ޕޮޒިޓިވްވިއިރު ރިސޯޓްތަކުން 20 މީހުން ވަނީ ޕޮޒިޓިވްވެފައެވެ.
މިއާއެކު މުޅި ޖުމްލަ ރާއްޖެއިން ކޮވިޑަށް ޕޮޒިޓިވްވި މީހުންގެ އަދަދު ވަނީ 82،099ށް އަރާފައެވެ. މިވަގުތު އެކްޓިވް ކޭހުގެ ގޮތުގައި ގުނަމުންދަނީ 2064 ކޭހެވެ. މީގެތެރެއިން 20 މީހުންނަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.
މިހާތަނަށް 79،795 މީހުން ބަލިން ފަސޭހަވެފައިވާއިރު 227 މީހުން ވަނީ މިބަލީގައި ނިޔާވެފައެވެ.
ފާއިތުވި 24 ގަޑިއިރު 120 މީހުން ކޮވިޑަށް ޕޮޒިޓިވްވިއިރު މިއީ އޮގަސްޓް މަހުގެ 30ގެ ފަހުން 150ން ދަށުން މީހުން ކޮވިޑަށް ޕޮޒިޓިވްވި ފުރަތަމަ ދުވަހެވެ.
އޮގަސްޓް މަހުގެ 30ން ފެށިގެން ރާއްޖޭގައި ކޮވިޑަށް ޕޮޒިޓިވްވާ މީހުން ރިޕޯޓްކުރަމުން އަންނަނީ 150ން މަތިންނެވެ. ވަކިން ޚާއްސަކޮށް އަތޮޅުތަކުގައި ކޮވިޑަށް ޕޮޒިޓިވްވާ މީހުންގެ އަދަދު އަންނަނީ އިތުރުވަމުންނެވެ.
