މިނިސްޓަރުގެ އިލްތިމާސް: ތައުލީމީ ކަންކަން ސިޔާސީ ނުކުރައްވާ
އިތުބާރު ގެއްލޭފަދަ ކަންކަން ކުރުމުން އަންނަން އޮތް ޖީލުތަކަށް ނޭދެވޭ އަސަރު ދެމިގެންދާނެ
އެޑިއުކޭޝަން މިނިސްޓަރ ޑރ އާއިޝަތު އަލީ
ދަރިވަރުންނަށް ކިޔަވައިދޭ ބައެއް ފޮތްތަކުގައި ގުރުއާނުގެ އާޔަތެއް ނުބައިކޮށް ލިޔެވިފައިވާ މައްސަލައާ އަދި އެ ނޫންވެސް ކަންތައްތަކާއި ގުޅިގެން ތައުލީމީ ކަންތައްތައް ބައެއް މީހުން ސިޔާސީކޮށްގެން ވާހަކަ ދައްކަމުންދާތީ އެކަން އެގޮތަށް ނުކުރުމަށް އެޑިއުކޭޝަން މިނިސްޓަރ ޑރ އާއިޝަތު އަލީ އިލްތިމާސް ކުރައްވައިފިއެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ވިދާޅުވީ ތައުލީމީ ކަންކަމަށް ބެލެނިވެރިންގެ އިތުބާރު ގެއްލޭފަދަ ކަންކަން ކުރުމުން އެފަދަ ކަންކަމުގެ ނޭދެވޭ އަސަރު އަންނަން އޮތް ޖީލުތަކަށް ދެމިގެންދާނެ ކަމަށެވެ. ތައުލީމަކީ ސިޔާސީ ކަންކަމެއް ނޫންކަމަށް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ ދަރިވަރުންނަށް ކިޔަވައިދޭ މާއްދާތަކުގައި ވަކި ގައުމެއްގެ ސަގާފަތް ޕްރޮމޯޓްކުރުމަށް ސަރުކާރުން އެއްވެސް އިރެއްގައި މަސައްކަތް ކޮށްފައިނުވާނެ ކަމަށެވެ. އަދި ދަރިވަރުންނަށް އުނގަންނައިދިނުމުގެ މަރުހަލާގައި ހުރިހާ ގައުމަކާއި ބެހޭ މައުލޫމާތު ވެސް ދަރިވަރުންނަށް ފޯރުކޮށްދެވިގެންދާނެ ކަމަށެވެ. ކަރިކިއުލަމްގައި ވެސް ވަކި ގައުމެއް ޕްރޮމޯޓްކޮށް އުނގަންނައިދިނުމެއް ނޯންނާނެ ކަމަށާއި ދަރިވަރުންނަށް ވަށާ ޖެހޭ ތައުލީމެއް ފޯރުކޮށްދޭއިރު ވަކި ގައުމެއް ފާހަގަކޮށް އެކަން ބޮޑުކޮށް ވާހަަކަ ނުދެއްކެވުމަށް މިނިސްޓަރ އެދިވަޑައިގެންނެވިއެވެ.
ކަރިކިއުލަމް ބިނާވެފައިވަނީ 8 ގާބިލިއްޔަތުގެ މައްޗަށް ބިނާކޮށްކަން ފާހަގަކޮށް އެޑިއުކޭޝަން މިނިސްޓްރީން ބުނީ އޭގެ ތެރެއިން ޕްރޮކްޓިންސިންގ އިސްލާމް ހިމަނާފައިވާނެ ކަމަށެވެ. އެހެންކަމުން ވަކި ގައުމަކަށް އަމާޒުކޮށް ވަކި ގައުމެއް ޕްރޮމޯޓް ކުރުމަށް މިނިސްޓްރީން އެއްވެސް އިރެއްގައި މަސައްކަތް ކޮށްފައިނުވާނެ ކަމަށެވެ.
ގުރުއާނުގެ އާޔަތްތައް ގަސްތުގައި ބަދަލުކުރުމަށް މިނިސްޓްރީން މަސައްކަތް ކުރާކަމަށް ތުހުތަމު ކޮށް، ބައެއް މީހުން ސޯޝަލް މީޑިއާގައި ވާހަކަ ދައްކަމުންދާތީ އެކަމަށް ރައްދު ދެއްވައި މިނިސްޓަރ ވިދާޅުވީ އެ ދައްކަނީ ކަނޑައެޅިގެން ދޮގު ވާހަކަތަކެއް ކަމަށާއި އެކަން އެ ކުރަނީ ސިޔާސީ ބޭނުމެއްގައި ކަމަށެވެ.
ގައުމެއް ރަނގަޅަށް ބިނާކުރުމަށް މަސައްކަތް ކުރަމުން ގެންދާއިރު އެކަމުގެ ތެރެއަށް ސިޔާސީ ކަންތައްތައް ވެއްދުމަށް މަސައްކަތް ކުރުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަަމަށް ވެސް ވިދާޅުވިއެވެ.
