މަގާމުގައި މިހުރީ އެއްވެސް ޕާޓީއެއްގެ ސްލޮޓެއްގައި ނޫންކަމަށް ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް ޢަލީ ޒާހިރު ވިދާޅުވެއްޖެއެވެ.
އާދީއްތަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި އޭނާ ވިދާޅުވީ، ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފުގެ މަގާމުގައި ހުންނެވީ އެއްވެސް ޕާޓީއެއް ތަމްސީލު ކުރެއްވުމުގެ ގޮތުން ނޫންކަމަށާއި، އެ މަގާމަކީ ކޯލިޝަން އެގްރީމެންޓުގެ ދަށުން، ވަކި ޕާޓީއަކަށް ލިބިގެންވާ ޕަސެންޓޭޖުގެ ތެރެއިން ސްލޮޓެއް ފުރިހަމަ ކުރަން ހުންނަވާ މަގާމެއް ނޫން ކަމަށެވެ.
އޭނާ އިތުރަށް ވިދާޅުވީ، ޗީފް އޮފް ސްޓާފުގެ މަގާމަށް ރައީސުލްޖުމްހޫރިއްޔާ އޭނާ އައްޔަނު ކުރެއްވީ، ރައީސުލްޖުމްހޫރިއްޔާ އޭނާއަށް އިތުބާރު ކުރައްވާތީ ކަމަށެވެ. އަދި ރައީސް އޭނާއަށް ކުރައްވާ އިތުބާރު ގެއްލޭ ދުވަހެއް އަތުވެއްޖެ ނަމަ އެ މަގާމުން ވަކި ކުރައްވާނެ ކަމަށާއި، އެގޮތަށް އެމަގާމުގައި ނުވެސް ހުރެވޭނެ ކަމަށެވެ. ރައީސްގެ އިތުބާރު އޭނާގެ މައްޗަށް ނެތް ދުވަހެއްގައި މަގާމުގައި ހުންނަވަން ބޭނުން ނުވާ ކަމަށްވެސް ޢަލީ ޒާހިރު ވިދާޅުވިއެވެ.
ޝަރުޢީ ދާއިރާއަށް އޭނާ ނުފޫޒު ފޯރުވާކަމަށް ކުރެވެމުންދާ ތުހުމަތުތަކާ ގުޅިގެން މިހާތަނަށް އެއްވެސް ފަރާތަކުން އޭނާއާ ސުވާލު ކޮށްފައި ނުވާކަމަށާއި، އަދި އެފަދަ ތަހުގީގެއް ހިނގާކަން އެނގިފައި ނުވާކަމަށް ވިދާޅުވިއެވެ. އެހެންނަމަވެސް، މިހާރު ލީކުވެގެން އުޅޭ އޯޑިއޯތަކުގެ ހަގީގަތް ހޯދުމަށް، ރައީސް އޮފީހުގެ ފަރާތުން ޖުޑީޝަލް ސަރވިސް ކޮމިޝަނަށާއި، އަދި މޯލްޑިވްސް ޕޮލިސް ސާވިސްއަށްވެސް ރަސްމީކޮށް ލިޔުއްވާފައިވާނެ ކަމަށާއި، މި ތަހުގީގު ތެރެއިން އޭނާއާއި ސުވާލެއް ކުރަން ޖެހޭ ކަމަށްވާނަމަ ސުވާލު ކުރާނެކަމަށެވެ. އަދި އެފަދަ ތަހުގީގެއްގައި ސުވާލު ކޮށްފިނަމަ، ސުވާލުތަކަށް ޖަވާބުދޭން ތައްޔާރަށް ހުންނެވި ކަމުގައިވެސް ވިދާޅުވިއެވެ.
ފަނޑިޔާރުންނާއި، އިދިކޮޅު ފަރާތްތަކުން ދައްކަމުންދާ ވާހަތަކާ ގުޅިގެން ޢަލީ ޒާހިރު ވިދާޅުވީ، މިކަމުގެ ޚަބަރުތައް ވަރަށް ޒިންމާދާރުކަން ކުޑަކޮށް ބައެއް މީޑިއާތަކުން ފަތުރަމުންދާކަމަށެވެ. އޭނާ ވަނީ މިބައްދަލުވުމުގައި، އޯޑިއޯތަކުގައިވެސް އަދި އިދިކޮޅު ފަރާތްތަކުންވެސް އޭނާގެ ނަން އެވަރަށް ބޭނުން ކުރަމުންދަނީ ދައްކާނެ އިތުރު މީހެއްގެ ވާހަކަތަކެއް ނެތުމުން ކަމުގައި ވިދާޅުވެފައެވެ. އަދި އެއީ ވަރަށް ފިނޑި ޢަމަލެއްގެ ގޮތުގައި ވިދާޅުވިއެވެ. ޢަލީ ޒާހިރު ވިދާޅުވީ، ރައީސް ޞާލިޙު ދުވަހަކުވެސް ފަނޑިޔާރުންނަށް ގުޅުއްވައިގެން ވަކި މައްސަލައަކަށް ނުފޫޒު ފޯރުވަން އަންގަވާފައި ނުވާކަމަށެވެ. ސަރުކާރަށް ނިސްބަތްވާ ވަޒީރުންނާއި އެހެނިހެން ބޭފުޅުންގެ މައްސަލަތައް ކޮމިޝަންތަކާއި ކޯޓުތަކުގައި ހިނގަމުން އަންނަ އައުމުން ދޭހަވަނީ މުއައްސަސާތައް އޭގެ ޒާތުގައި މިނިވަންކަމާއެކު މަސައްކަތްކުރާކަން ކަމުގައި އޭނާ ވިދާޅުވިއެވެ.
އޭނާ ވިދާޅުވީ މި ދަނޑިވަޅުގައި މި ފަތުރާ ވާހަކަތަކަކީ ރައީސް ޔާމީންގެ ޝަރީޢަތަށް ނުފޫޒު ފޯރުވުމުގެ ގޮތުން ބަޔަކު މީހުން ސިޔާސީ ގޮތުން ދައްކާ ވާހަކައެއް ކަމަށާއި، ސިޔާސީ ގޮތުން ފާޑު ކިޔުމަކީ އުފަލާއެކު ބަލައިގަންނަކަމެއް ކަމަށެވެ. އަދި ސަރުކާރުގައި ހުރި އުނި ކަންތަކުގެ ވާހަކަ ބަލައިގަންނާނެ ކަމަށެވެ. އެހެންނަމަވެސް އެއްވެސް އަސްލެއް ނެތް ވާހަކަތަކަށް ރައްދު ދޭން ވަގުތު ހޭދަކުރުމަކީ ސަރުކާރުގެ އަސްލު ފޯކަސް ގެއްލޭނެކަމެއް ކަމަށެވެ.
ޢަލީ ޒާހިރުވަނީ އޯޑިއޯތަކާ ގުޅުވައި ދައްކަމުން ގެންދާ ވާހަކަތަކާ އޭނާއާ އެއްވެސް ގުޅުމެއް ނެތް ކަމަށް ތަކުރާރުކޮށް ވިދާޅުވެފައެވެ.
