ނިޒާމީ ވޯޓަކަށްދާން އެއްވެސް އިރެއްގައި އެއްބަސްވެފައި ނޯންނާނެކަމަށް އެމްއާރްއެމްއާއި ޢަދާލަތުން ބުނެފި
ނިޒާމީ ވޯޓަކަށް ދާން އެއްވެސް އިރެއްގައި އެއްބަސްވެފައެއް ނޯންނާނެ
ކޯލިޝަން ލީޑަރުންގެ ބައްދަލުވުމެއްގެ ތެރެއިން
ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް ވޯޓަކަށް ދިއުމަށް, ވެރިކަމަށް އައުމުގެ ކުރިން އެކުލަވާލި ކޯލިޝަންގައި ހިމެނޭ ޕާޓީތަކުގެ ތެރެއިން ޖުމްހޫރީ ޕާޓީފިޔަވައި ދެން ހުރި ޕާޓީތަކުން އެއްބަސްވިކަމަށް އެމްޑީޕީގެ ރައީސް މުޙައްމަދު ނަޝީދު ވިދާޅުވިނަމަވެސް އެފަދަ އެއްބަސްވުމެއް ވެފައި ނޯންނާނެކަމަށް އެމްއާރްއެމްއާއި ޢަދާލަތުން ބުނެފިއެވެ.
އެމްއާރްއެމްގެ ލީޑަރު އަދި ކުރީގެ ރައީސް މައުމޫން ޢަބްދުލް ޤައްޔޫމް ވިދާޅުވީ، ކޮންމެ ބޭފުޅަކު ކޮންމެ އެއްޗެއް ވިދާޅުވިނަމަވެސް އަލުން ނިޒާމީ ވޯޓަކަށް ދާކަށް އެއްވެސް އިރެއްގައި އެމްއާރްއެމްއިން އެއްބަސް ވެފައި ނޯންނާނެ ކަމަށެވެ. ޢަދާލަތު ޕާޓީގެ އިސް ތަރުޖަމާނު ޢަލީ ނަޒީރު ވިދާޅުވީ، ނިޒާމީ ވޯޓަކަށް ދާން އެއްވެސް އިރެއްގައި އެއްބަސްވެފައި ނޯންނާނެ ކަމަށެވެ. އަދި އެއްބަސްވި ކަންކަން, ގުޅިފައިވާ ޕާޓީތަކުގެ މެނިފެސްޓޯގައި ހިމެނިފައި އޮންނާނެ ކަމަށެވެ.
މޭ 6 ވަނަ ދުވަހު ދިން ނުރައްކާތެރި ހަމަލާއަށްފަހު ރާއްޖެއިން ބޭރުގައި ބޭސްފަރުވާ ހޯއްދަވަމުން ގެންދަވާ ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ނޫސްވެރިންނާ ބައްދަލު ކުރައްވައި ވާހަކަ ދައްކަވަމުން ވިދާޅުވީ, ކޯލިޝަންގައި ހިމެނޭ ބޭފުޅުންގެ ތެރެއިން އެމްއާރްއެމް ލީޑަރ އަދި ކުރީގެ ރައީސް މައުމޫނާއި، ޢަދާލަތުގެ ރައީސް ޝައިޚު ޢިމްރާން ޢަބްދުﷲ، ވެރިކަމުގެ ނިޒާމު ބަދަކުރުމަށް ވޯޓަކަށް ދިއުމަށް ތާއީދު ކުރެއްވިކަމަށެވެ.
ރައީސް ނަޝީދު ވިދާޅުވީ ނިޒާމީ މައްސަލައެއްގައި ރައްޔިތުންގެ ފެންނަ ނުފެންނަ ވޯޓެއް ނެގުނަކީ ރައީސް ޞާލިޙުވެސް ދެކޮޅު ކަމެއް ނޫންކަމަށެވެ. އަދި މިކަން ކުރެވެން އޮތީ ނިޒާމުގެ ވޯޓު ނަގައިގެން ރައްޔިތުންގެ ޚިޔާލު ހުރިގޮތް އެގުމުންކަމަށް ރައީސް ނަޝީދު ވިދާޅުވިއެވެ. ނަޝީދު ވިދާޅުވީ ރައީސް ޞާލިޙް ނުކުންނެވި މެނިފެސްޓޯއަކީ ކޯލިޝަންގެ ޕާޓީތަކުން އެދުނު ގޮތަށް އެއްބަސްވި މެނިފެސްޓޯއެއް ކަމަށެވެ. ނަަމަވެސް ފެންނަ ނުފެންނަ ވޯޓަކަށް ދާން އެއްބަސްނުވީ ޖުމްހޫރީ ޕާޓީން އެކަނި ކަމަށެވެ.
ސަރުކާރުން ބުނެފައިވަނީ، ޢަމަލު ކުރަމުންދަނީ ކޯލިޝަން މެނިފެސްޓޯއަށް ކަމަށާއި، އެ މެނިފެސްޓޯގައި ބަރުލަމާނީ ނިޒާމުގެ ވާހަކައެއް ނެތްކަމަށެވެ. އެމްޑީޕީގެ ރައީސް ނަޝީދަށް ތާއީދު ކުރައްވާ ބޭފުޅުން ގެންދަވަނީ ބަރުލަމާނީ ނިޒާމަށް ތާއީދުކޮށް ޕެޓިޝަނެއްގައި ސޮއި ކުރަމުންނެވެ.
ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސް ޞާލިޙްވަނީ ވިދާޅުވެފައެވެ.
ވެރިިކަމުގެ ނިޒާމު ކަނޑައެޅުމަށް 2007 ވަނަ އަހަރު އޮތް "ނިޒާމީ ވޯޓު"ގައި ރައްޔިތުންވަނީ ރައީސް ނަޝީދު ޕްރޮމޯޓު ކުރައްވައި "ބަރުލަމާނީ" ނިޒާމަށް ނޫނެކޭ ބުނެފައެވެ. ނިޒާމު ކަނޑައެޅުމަށް ނެގުނު ވޯޓްގައި 95،619 މީހުން ވޯޓް ދީފައިވަނީ ރިޔާސީ ނިޒާމު އޮންނަން ފެންނަ ކަމަށެވެ. ބަރުލަމާނީ ނިޒާމު އޮންނަން ފެންނަ ކަމަށް ވޯޓް ދީފައިވަނީ 58،504 މީހުންނެވެ.
މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.
