އަތޮޅު ފެރީގެ ޓެސްޓު ދަތުރުތައް މިމަހު ފަށާނެ: އެމްޓީސީސީ
މީގެ ކުރިން ބުނެފައިވަނީ ޓެސްޓު ދަތުރު އޮގަސްޓު މަހު ފަށާނެ ކަމަށް
އަތޮޅު ފެރީ ނިޒާމަށް ބޭނުންކުރާ ފެރީގެ މަސައްކަތް ކުރިއަށްދަނީ
"އިންޓަރގްރޭޓެޑް ނެޝަނަލް ޕަބްލިކް ފެރީ ނެޓްވޯރކް"ގެ ފުރަތަމަ ޓެސްޓު ދަތުރުތައް މި ސެޕްޓެމްބަރު މަހު ފަށާނެކަމަށް އެމްޓީސީސީން ބުނެފިއެވެ.
މުޅި ރާއްޖެ ގުޅުވައިދޭ ހައި ސްޕީޑް ފެރީގެ ނިޒާމަށް ބޭނުންވާ ފެރީތައް ބަނުމުގެ މަސައްކަތް ގަލްފް ކްރާފްޓާ ހަވާލުކޮށްފައިވާއިރު، ޕްލޭނިން މިނިސްޓަރާއި މިނިސްޓްރީގެ ޓީމުގެ އިތުރުން, އެމްޓީސީސީގެ ސީއީއޯ އާދަމް ޢާޒިމާއި އެމްޓީސީސީގެ ޓީމުން ވަނީ މި މަސައްކަތް ކުރިއަށްދިޔަ ހިސާބު ބައްލަވާލައްވާފައެވެ.
މި މަސައްކަތް ބައްލަވާލެއްވުމަށްފަހު ނޫސްވެރިންނަށް މައުލޫމާތުދެއްވަމުން އެމްޓީސީސީގެ ސީއީއޯ އާދަމް ޢާޒިމް ވިދާޅުވީ, މި ނިޒާމަށް ބޭނުންވާ ފެރީގެ ޓެސްޓު ދަތުރުތައް ސެޕްޓެމްބަރު މަހުގެ ތެރޭގައި ފަށާނެ ކަމަށެވެ. އެމްޓީސީސީން މަސައްކަތްކުރަމުންދަނީ މިމަގުން ކަމަށާއި، ޓެސްޓު ދަތުރުތައް ނިންމައި، ނޮވެމްބަރު މަހުގެތެރޭގައި ދަތުރުތައް ރަސްމީކޮށް ފަށާނެ ކަމަށެވެ.
މި މަސައްކަތް އެންމެ ފުރަތަމަ ފަށާނީ ހދ. އަތޮޅުގައި ކަމަށާއި، އެއަށްފަހު ހއ. އަދި ށ. އަތޮޅުގައި މި މަސައްކަތް ފެށޭނީ ޖެނުއަރީ މަހުގައި ކަމަށް ޢާޒިމް ވަނީ ވިދާޅުވެފައެވެ.
އާޒިމް ވިދާޅުވީ މި މަސައްކަތް ފުރަތަމަ ފަށާނީ 6 ލޯންޗާއިއެކު ކަމަށެވެ. އަދި މި މަޝްރޫޢުގެ މަސައްކަތް އެއްކޮށް ނިމޭއިރު، މި މަޝްރޫޢަށް ބޭނުންކުރަން ހަމަޖެހިފައިވާ އަދަދަށް ލޯންޗު ހުންނާނެ ކަމަށެވެ. މި މަސައްކަތް އެއްކޮށް ނިމޭއިރު 50 ނުވަތަ 60 ލޯންޗު ބާއްވާނެ ކަމަށް އެމްޓީސީސީން މީގެ ކުރިން ބުނެފައިވެއެވެ.
މި މަސައްކަތް ކުރިއަށްދާގޮތް އެމްޓީސީސީގެ މުވައްޒަފުން ކޮންމެ ދުވަހަކުވެސް ބަަލަމުންދާކަމަށް ޢާޒިމް ވިދާޅުވިއެވެ. ސަރުކާރުންވެސް މި މަސައްކަތް ކުރިއަށްދާގޮތް ކޮންމެ ދުވަހަކުވެސް ބަލަމުންދާކަމަށާއި, ސަރުކާރުގެ ފަރާތުން މިކަމަށް ފުރިހަމަ އެއްބާރުލުން ލިބެމުންދާކަންވެސް ޢާޒިމް ވަނީ ފާހަގަކުރައްވާފައެވެ.
މުޅި ރާއްޖެ ގުޅުވައިދޭ ހައި ސްޕީޑް ފެރީގެ ނިޒާމެއް ޤާއިމުކުރުމާއި، ފަސޭހަކަމާއެކު ރައްޔިތުންނަށް އެއްރަށުން އަނެއް ރަށަށް ދަތުރުކުރެވޭނެ އިންތިޒާމު ޤާއިމުކުރުމަކީ މި ސަރުކާރުގެ މުހިންމު އެއް އަމާޒަށް ވާއިރު، މި އަމާޒަށް ވާސިލްވުމަށް މި މަޝްރޫޢުގެ ފުރަތަމަ ޒޯންގައި ހިމެނޭ ހއ. ހދ އަދި ށ އަތޮޅުގެ ޖުމްލަ 41 ރަށަކަށް މި ޚިދުމަތް ދިނުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީއާ ވަނީ ހަވާލުކޮށްފައެވެ.
މުޅިއެކު 3 ޒޯނާއި 6 ރީޖަން, ހައި ސްޕީޑް ފެރީގެ ނިޒާމުން ގުޅައިދިނުމަށް ސަރުކާރުން ނިންމާފައިވާއިރު، މިމަސައްކަތުގެ ފުރަތަމަ މަރުހަލާގައި މަސައްކަތް ކުރަމުންދާނީ ހއ. ހދ އަދި ށ އަތޮޅު ގުޅާލައި ފެރީގެ ޚިދުމަތް ދިނުމަށެވެ. އެމްޓީސީސީން މި މަސައްކަތުގެ ފުރަތަމަ ޒޯންގެ މަސައްކަތް ފަށާފައިވާއިރު، މި 3 ޒޯނުގެ މަސައްކަތް 2023 ވަނަ އަހަރުގެ ކުރިން ނިންމާލުމަކީ ސަރުކާރުގެ އަމާޒެކެވެ.
