ކާބުލްގެ އެއަރޕޯޓް ހުޅުވާލައިފި ކަމަށް ގަތަރުން އަފްޣާނިސްތާނަށް ކަނޑައަޅުއްވާފައި ހުންނަވާ ސަފީރު ވިދާޅުވެއްޖެއެވެ.

ސަފީރު ވިދާޅުވީ، އެހީ ފޯރުކޮށްދޭ ފަރާތްތަކަށް ކާބުލްގެ އެއަރޕޯޓް ހުޅުވާލާފައިވާ ކަމަށާއި، އާއްމު ދަތުރުތައް ވަރަށް އަވަހަށް ފަށާނެ ކަމަށެވެ. އެއަރޕޯޓްގެ ރަންވޭ މަރާމަތުކުރުމުގައި އަފްޣާންގެ ކަމާގުޅުންހުރި އިދާރާތަކުގެ އެހީތެރިކަން ލިބުނު ކަމަށެވެ.

އަފްޣާނިސްތާނަށް އެހީތެރިކަން ފޯރުކޮށްދިނުމާ ގުޅޭ ގޮތުން ޚާއްސަ މަޝްވަރާ ބައްދަލުވުމަކަށް އދ އިިން ވެސް އަންނަނީ ތައްޔާރުވަމުންނެވެ. އެގޮތުން އދގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ސެޕްޓެމްބަރ މަހުގެ 13 ވަނަ ދުވަހު ޖެނީވާގައި މި ބައްދަލުވުން ކުރިއަށްގެންދެވުމަށް ވަނީ ނިންމަވާފައެވެ.

ތާލިބާނުން އަންނަނީ އަފްޣާނިސްތާނުގައި އައު ސަރުކާރެއް އެކުލަވާލުމުގެ މަސައްކަތް ކުރަމުންނެވެ. ތާލިބާނުން އެކުލަވާލާ ސަރުކާރުގެ ވެރިޔަކަށް ހުންނަވާނީ، އެ ޖަމާއަތުގެ އެއް ބާނީ، އަދި ސިޔާސީ އޮފީހުގެ އެންމެ އިސްވެރިއެއްގެ ގޮތުގައި ހުންނެވި މުއްލާ ބަރާދަރު ކަމަށް މީޑިއާ ރިޕޯޓުތައް ބުނެއެވެ. ތާލިބާން ސަރުކާރުގެ އެންމެ އިސް މަގާމުތައް ފުރާނޭ މީހުންގެ ތެރޭގައި، އެ ޖަމާއަތުގެ އެއް ބާނީ ކަމުގައިވާ މުއްލާ އުމަރުގެ ދަރިފުޅު މުއްލާ މުހައްމަދު ޔައުގޫބާއި، ޝޭރު މުހައްމަދު އައްބާސް ސްޓަނެޒާއީވެސް ހިމެނޭކަމަށް ރިޕޯޓުތައް ބުނެއެވެ.

އަފްޣާނިސްތާނުގެ އެކި ސިޔާސީ ފިކުރުތަކަށް ނިސްބަތްވާ ސަރުކާރެއް އެކުލަވާލާނެކަމަށް ތާލިބާން ޖަމާއަތުން ބުނެފައިވީ ނަމަވެސް، މިހާރު އެޖަމާއަތުން އިސްކަން ދެމުންދަނީ، ހަމަ އެކަނި އެޖަމާއަތުގެ ވެރިކަމެއް އެކުލަވާލުމަށް ކަމުގެ ޚަބަރުތައް ދަނީ ފެތުރެމުންނެވެ. ސަރުކާރުގައި 25 ވުޒާރާއެއް ހިމެނޭއިރު، 12 ދީނީ އިލްމުވެރިންގެ މައްޗަށް އެކުލެވޭ މަޝްވަރާ މަޖިލީހެއް އޮންނާނެ ކަމަށް ރިޕޯޓުތައް ބުނެއެވެ.