ހުކުރު ދުވަހު ވެކްސިން ޖެހީ 226 މީހުން
4 ސެޕްޓެމްބަރު 2021 | ހޮނިހިރު 18:05ފުރަތަމަ ޑޯޒް ޖެހި މީހުންގެ އަދަދު ވަނީ 385،554ށް އަރާފައި
ކޮވިޑް-19 ވެކްސިން ޖެހުމުގެ ޕްރޮގްރާމްގެ ތެރެއިން
ހުކުރު ދުވަހު 226 މީހުން ކޮވިޑުން ދިފާއުވުމަށް ވެކްސިން ޖަހައިފިއެވެ.
ހުކުރު ދުވަހު މާލެ ސަރަހައްދުގައި ވެކްސިން ޖެހުން ކުރިޔަކަށް ނުގެންދެއެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ ތަފާސް ހިސާބުތަކަށް ބަލާއިރު ހުކުރު ދުވަހު ފުރަތަމަ ޑޯޒް ޖަހާފައިވަނީ 171 މީހުންނެވެ. މިއާއެކު ފުރަތަމަ ޑޯޒް ޖެހި މީހުންގެ އަދަދު ވަނީ 385،554ށް އަރާފައެވެ. އަދި ހުކުރު ދުވަހު ދެވަނަ ޑޯޒް 55 މީހުން ވަނީ ޖަހާފައެވެ. މިއާއެކު ދެވަނަ ޑޯޒް ޖެހި މީހުންގެ އަދަދު ވަނީ 303،485ށް އަރާފައެވެ.
މިދިޔަ އޮގަސްޓު މަސް ނިމުމުގެ ކުރިން ރާއްޖޭގެ އާބާދީގެ 90 އިންސައްތަ މީހުންނަށް ވެކްސިން ޖެހުމަކީ މި ސަރުކާރުގެ އަމާޒެކެވެ. މި އަމާޒަށް ވާސިލުވުމަށް ކެމްޕޭނެއް ވެސް ކުރިއަށް ގެންގޮސްފައި ވެއެވެ. އެހެންނަމަވެސް އޮގަސްޓު މަސް ނިމުނުއިރު ވެކްސިން ޖެހުނީ އާބާދީގެ 85 އިންސައްތަ މީހުންނަށް ކަމަށް ސަރުކާރުން ވަނީ ބުނެފައެވެ. މި ވެކްސިން ޕްރޮގްރާމުތައް އަދިވެސް ކުރިއަށްދާއިރު، ވީހާވެސް އަވަހަކަށް ވެކްސިން ފުރިހަމަކުރުމަށް ސަރުކާރުން ގެންދަނީ ބާރު އަޅަމުންނެވެ.
ވެކްސިން ފުރިހަމަނުކުރާ މީހުންނާމެދު ފިޔަވަޅު އަޅަން ސަރުކާރުން ނިންމާފައިވާއިރު، ސެޕްޓެމްބަރ މަހުން ފެށިގެން ވަނީ ވެކްސިން ނުޖަހާ މީހުންނަށް އެތެރޭގެ އުދުހުންތަކުން ދަތުރުނުކުރެވޭގޮތަށް ނިންމާފައެވެ. ވެކްސިންގެ އެއްވެސް ޑޯޒްއެއް ނުޖަހާ މީހުންނަށް ކެފޭ ރެސްޓޯރަންޓްތަކުގެ އެތެރޭގައި ޚިދުމަތް ދިނުން މަނާކުރުމަށް ނިންމާފައިވީނަމަވެސް އެ މީހުންނަށް ޓޭކްއަވޭގެ ޚިދުމަތް ލިބޭނެއެވެ.
