ފައިރޫޝް ރިޓަޔަރ ކުރެއްވި މައްސަލައިގެ ކޮމިޓީ ރިޕޯޓް: ޝަރަފުވެރިކަމާއެކު ރިޓަޔަރކުރުމަށް ނިންމާފައިވާ ނިންމުން ފުރިހަމައަށް ބެލިފައެއް ނުވޭ
ރިޓަޔަރ ކުރުމަށް 2020 ވަނަ އަހަރުގެ ޖޫން މަހުގެ 2 ވަނަ ދުވަހު ހުށަހަޅާފައިވާތީ 2021 ޖެނުއަރީ 2 ވަނަ ދުވަހު ފުލުހުންގެ ވަޒީފާއިން ވަކިކޮށްފައިވޭ
އެސިސްޓެންޓް ކޮމިޝަނަރ އޮފް ޕޮލިސްގެ މަގާމުގައި ހުންނެވި ޑރ އަބްދުﷲ ފައިރޫޝް
އެސިސްޓެންޓް ކޮމިޝަނަރ އޮފް ޕޮލިސްގެ މަގާމުގައި ހުންނެވި ޑރ އަބްދުﷲ ފައިރޫޝް ފުލުހުންގެ ވަޒީފާއިން ޝަރަފުވެރިކަމާއެކު ރިޓަޔަރ ކޮށްފައިވާ މައްސަލަ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީން ދިރާސާކޮށް ނިންމާ ތަޅުމަށް ފޮނުވައިފިއެވެ.
މިމައްސަލައަކީ ދިވެހި ފުލުހުންގެ ޚިދުމަތުގެ ގާނޫނު އެކުލަވާލާ ތަސްދީގުކޮށް، އެ ގާނޫނަށް އަމަލުކުރަން ނުފެށިވަނިކޮށް އެސިސްޓެންޓް ކޮމިޝަނަރ އޮފް ޕޮލިސްގެ މަގާމުގައި ހުންނެވި ޑރ އަބްދުﷲ ފައިރޫޝް ފުލުހުންގެ ވަޒީފާއިން ޝަރަފުވެރިކަމާއެކު ރިޓަޔަރ ކުރައްވާފައިވާތީ އެ މައްސަލަ ބައްލަވައި ދެއްވުމަށް އެދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެދިވަޑައިގެން ރައްޔިތުންގެ މަޖިލީހުގެ އިދާރާއިން 241 ކޮމިޓީއަށް ފޮނުވާފައިވާ މައްސަލައެކެވެ.
މިމައްސަލަ ދިރާސާކުރުމަށްޓަކައި 241 ކޮމިޓީން ވަނީ ފައިރޫޝް ފުލުހުންގެ ވަޒީފާއިން ޝަރަފުވެރިކަމާއެކު ރިޓަޔަރ ކުރައްވާފައިވާ ގޮތުގެ ތަފްސީލު ފުލުހުންގެ ފަރާތުން ހޯދާފައެވެ. އެގޮތުން ދިވެހި ފުލުހުންގެ ޚިދުމަތުގެ ގާނޫނު އެކުލަވާލާ ތަސްދީގުކޮށް އަދި އެގާނޫނަށް އަމަލުކުރަން ނުފެށި ވަނިކޮށް އެސިސްޓެންޓް ކޮމިޝަނަރ އޮފް ޕޮލިސްގެ މަގާމުގައި ހުންނެވި ޑރ އަބްދުﷲ ފައިރޫޝް ފުލުހުންގެ ވަޒީފާއިން ޝަރަފުވެރިކަމާއެކު ރިޓަޔަރ ކުރައްވާފައިވާ ގޮތާއި އޭގެ ސަބަބުތަކާއި އަދި ރިޓަޔަރ ކުރުމުގައި އަމަލުކޮށްފައިވާ ގާނޫނުތަކާއި ގަވާއިދުތަކާއި ގުޅޭ އުސޫލުތަކާއި މައުލޫމާތުތައް ކޮމިޓީން ވަނީ ހޯދާފައެވެ. އަދި މިމައްސަލާގައި އިތުރު މައުލޫމާތު ހޯދުމަށް ފުލުހުން ވަނީ ހޯމް މިނިސްޓަރ އިމްރާން އަބްދުﷲއާ ވެސް ބައްދަލުކޮށްފައެވެ.
މީގެއިތުރުން ފައިރޫޝް ފުލުހުންގެ ވަޒީފާގައި ހުންނެވިއިރު ތައުދީބީ އެއްވެސް ފިޔަވަޅެއް އަޅާފައިވޭތޯ އާއި ވަޒީފާއިން ވަކިކުރުމަށްފަހު ނުވަތަ ވަޒީފާއިން ވަކިވުމަށްފަހު އަލުން ވަޒީފާއަށް އަނބުރާ ރުޖޫޢަ ކުރެވިފައިވޭތޯ އާއި އެކަމާއި ގުޅޭ މައުލޫމާތު ކޮމިޓީއަށް ހޯދާ އެމައުލޫމާތުތައް ކޮމިޓީން ބަލާ ދިރާސާކޮށްފައިވެއެވެ. ކޮމިޓީން ވަނީ 10 ހޯދުމެއް މިކަމުގައި ހޯދާފައެވެ.
އެގޮތުން ފައިރޫޝް ފުލުހުންގެ ޚިދުމަތުގައި 20 އަހަރު ޚިދުމަތް ކުރުމަށްފަހު ވަޒީފާއިން ރިޓަޔަރ ކުރުމަށް 2020 ވަނަ އަހަރުގެ ޖޫން މަހުގެ 2 ވަނަ ދުވަހު ސިޓީއަކުން ހުށަހަޅާފައިވާތީ 2021 ވަނަ އަހަރުގެ ޖެނުއަރީ މަހުގެ 2 ވަނަ ދުވަހު ފުލުހުންގެ ވަޒީފާއިން ފައިރޫޝް ޝަރަފުވެރިކަމާއެކު ރިޓަޔަރ ކޮށްފައިވާކަމަށް ކޮމިޓީ ރިޕޯޓްގައި ބުނެއެވެ.
ކޮމިޓީ ރިޕޯޓްގައި ބުނެފައިވަނީ ފައިރޫޝް ރިޓަޔަރ ކޮށްފައިވަނީ ފުލުހުންގެ ގާނޫނާއި އެގާނޫނުގެ 17 ވަނަ މާއްދާގެ ނ ގެ ދަށުން އެކުލަވާލާފައިވާ ގަވާއިދުކަމުގައިވާ ފުލުހުން ރިޓަޔަރ ކުރުމާއި ބެހޭ ގަވާއިދުގެ 4 ވަނަ މާއްދާގެ ނ ގައިވާ ގޮތުގެ މަތިން ފުލުހެއްގެ ގޮތުގައި 20 އަހަރު ޚިދުމަތްކުރުމަށްފަހު އަމިއްލައަށް ރިޓަޔަރކުރުމަށް އެދިގެން ކަމަށެވެ. އަދި ފައިރޫޝް ރިޓަޔަރ ކުރެއްވިއިރު އަމަލުކުރަމުންދަނީ ފުލުހުންގެ ގާނޫނަށް ކަމަށާއި ފަހުން އެކުލަވާލެވުނު ދިވެހި ފުލުހުންގެ ޚިދުމަތުގެ ގާނޫނު ތަސްދީގުކޮށް ގެޒެޓްގައި ޝާއިއުކޮށްފައިވަނީ 2020 ވަނަ އަހަރުގެ ޑިސެމްބަރ މަހުގެ 27 ވަނަ ދުވަހު ކަމަށާއި އެގާނޫނަށް އަމަލުކުރަން ފަށާނީ ގާނޫނު ތަސްދީގުކޮށް ގެޒެޓްގައި ޝާއިއުކުރާތާ 3 މަސްދުވަސް ހަމަވާ ތާރީޚުންކަމަށް އެގާނޫނުގައި ބަޔާންކޮށްފައިވާއިރު އެގާނޫނަށް އަމަލުކުރަން ނުފެށި އޮތުމަކީ ފައިރޫޝް ފުލުހުންގެ ވަޒީފާއިން ރިޓަޔަރ ކުރުމަށް ހުރަސް އެޅޭ ސަބަބެއްކަމަށް ފުލުހުންގެ ޚިދުމަތުން ނުދެކޭކަމަށް ފުލުހުން ބުނެފައިވާކަމަށް ރިޕޯޓްގައި ފާހަގަކޮށްފައިވެއެވެ.
އަދި ފަހުން ފާސްކުރި ފުލުހުންގެ އައު ގާނޫނަށް އަމަލުކުރަން ފެށުމުގެ ކުރިން ފުލުހުން ރިޓަޔަރ ކުރުމުގައި އަމަލުކުރަން ޖެހެނީ ފުލުހުންގެ ގާނޫނާއި އެގާނޫނުގެ ދަށުން އެކުލަވާލާފައިވާ ފުލުހުން ރިޓަޔަރ ކުރުމާއި ބެހޭ ގަވާއިދުގެ ދަށުންކަމަށް ފުލުހުން ބުނެފައިވާކަމަށް ރިޕޯޓްގައިވެއެވެ.
މިމައްސަލާގައި ހޯމް މިނިސްޓަރ އިމްރާން އަބްދުﷲ އާ ބާއްދަލުކޮށް ކޮމިޓީން މައުލޫމާތު ސާފުކުރިއިރު ފައިރޫޝް ފުލުހުންގެ ވަޒީފާއިން ރިޓަޔަރ ކުރުމުގައި ފުލުހުން އަމަލުކޮށްފައިވަނީ ފުލުހުންގެ ގާނޫނާއި އެގާނޫނުގެ ދަށުން އެކުލަވާލާފައިވާ ފުލުހުން ރިޓަޔަރ ކުރުމާބެހޭ ގަވާއިދާ އެއްގޮތަށް ކަމަށް މައުލޫމާތު ދެއްވާފައިވާކަމަށް ރިޕޯޓްގައިވެއެވެ.
މީގެއިތުރުން ފައިރޫޝް ފުލުހުންގެ ވަޒީފާގައި ހުރިއިރު 2017 ވަނަ އަހަރުގެ ސެޕްޓެމްބަރ މަހުގެ 24 ވަނަ ދުވަހު އޭނާގެ މައްޗަށް ޑިސިޕްލިނަރީ މައްސަލައެއް ހުށަހެޅުނު ކަމަށާއި އެމައްސަލަ ޕްރޮފެޝަނަލް ސްޓޭންޑަރޑްސް ކޮމާންޑުން ތަހުގީގުކޮށް ޑިސިޕްލިނަރީ ބޯޑުން ފައިރޫޝް އެސިސްޓަންޓް ކޮމިޝަނަރ އޮފް ޕޮލިސްގެ މަގާމުން ވަކިކުުރުމަށް ނިންމާފައިވާކަމަށް ފުލުހުންގެ ޚިދުމަތުން މައުލޫމާތު ދީފައިވާކަމަށް ރިޕޯޓްގައި ފާހަގަކޮށްފައިވެއެވެ. އަދި އެމައްސަލަ އިސްތިއުނާފު ކޮމިޓީއަށް ހުށަހެޅުމުން އެނިންމުމަށް ބަދަލެއް ގެންނަން ނުފެންނަ ކަމަށް ނިންމާފައިވާތީ 2017 ވަނަ އަހަރުގެ ނޮވެމްބަރ މަހުގެ 20 ވަނަ ދުވަހު ފައިރޫޝް އެސިސްޓަންޓް ކޮމިޝަނަރ އޮފް ޕޮލިސްގެ މަގާމުން ވަކިކޮށްފައިވާކަމަށް ވަނީ ކޮމިޓީ ރިޕޯޓްގައި ބުނެފައެވެ.
އަދި އެސިސްޓަންޓް ކޮމިޝަނަރ އޮފް ޕޮލިސްގެ މަގާމުން ވަކިކޮށްފައިވާ މައްސަލަ ފައިރޫޝް ސިވިލް ކޯޓަށް ހުށަހެޅުމުން ވަޒީފާއިން ވަކިކުރުން އަނބުރާ ރުޖޫޢަކުރުމަށް ހުކުމްކޮށްފައިވާތީ 2017 ވަނަ އަހަރުގެ ނޮވެމްބަރ މަހުގެ 20 ވަނަ ދުވަހުން ފެށިގެން އަލުން އަނބުރާ އެމަގާމަށް ފައިރޫޝް ވަނީ ހަމަޖައްސާފައެވެ.
ކޮމިޓީގެ ހޯދުންތަކުގައި ދެން ފާހަގަކޮށްފައިވަނީ ހޯމް މިނިސްޓާރ އިމްރާން ކޮމިޓީއަށް ދެއްވި މައުލޫމާތުގައި ފައިރޫޝް ރިޓަޔަރ ކުރުމާއި ގުޅޭގޮތުން އެއްވެސް ފަރާތަކުން ސުވާލު އުފައްދައި އެއްވެސް މައްސަލައެއް ފުލުހުންގެ ޚިދުމަތަށް ހުށަހަޅާފައި ނުވާކަމަށް ވިދާޅުވެފައިވީނަމަވެސް ފުލުހުންގެ ޚިދުމަތުގެ ގާނޫނުގެ 112 ވަނަ މާއްދާގައި އެއްވެސް ތައުދީބީ މައްސަލައެއް އުފުލިފައިނެތް ހާލަތުގައި އަދި އެފަދަ މައްސަލައެއް އުފުލުމުގެ ހާލަތުވެސް އުފެދިފައި ނެތި ފައިރޫޝްގެ އަމަލުތައް ރަސްމީ ޕާލަމަންޓްރީ ރިކޯޑިން ތަކުންނާއި އާންމުވެފައިވާ އޯޑިއޯ އަދި ވީޑިއޯ ރިކޯޑިން ތަކުން ފެންނަންހުރި މަންޒަރުތަކުން ޝަރަފުވެރިކަމާއެކު ފައިރޫޝް ވަޒީފާއިން ރިޓަޔަރކުރުމަށް ނިންމާފައިވާ ނިންމުން ފުރިހަމައަށް ބެލިފައިވާކަމަށް ކޮމިޓީއަށް ގަބޫލު ނުކުރެވޭކަމަށެވެ.
މިކަމާއި ގުޅިގެން ކޮމިޓީން ވަނީ ދެ ހުށަހެޅުމެއް ހުށަހަޅާފައެވެ. އެގޮތުން ފުރަތަމަ ކަމަކަށް ކޮމިޓީން ހުށަހަޅާފައިވަނީ މިމައްސަލާގައި ބަޔާންކޮށްފައިވާ ބާވަތްތަކުގެ ތުހުމަތުތަކަކީ އާންމު އިޖުތިމާއީ މިންގަނޑުތަކުން ބަލާއިރު ބޮޑެތި ތުހުމަތުތަކެއް ކަމަށްވާތީ ކުރިޔަށް އޮތް ތަނުގައި އެފަދަ ތުހުމަތުތަކެއް ކުރެވިފައިވާ ފަރާތެއް މަގާމުން ރިޓަޔަރ ކުރުމަށް އެދުމުން އެފަދަ ފަރާތެއް ޝަރަފުވެރިކަމާއެކު ރިޓަޔަރ ކުރުމުގައި އެތުހުމަތުތަކަށް ރިއާޔަތްކުރުމަށް ދިވެހި ފުލުހުންގެ ޚިދުމަތުގައި ދެންނެވުމަށެވެ.
ދެ ވަނަ ހުށަހަޅުމަކަށް ކޮމިޓީން ހުށަހަޅަނީ ކުރިޔަށް އޮތް ތަނުގައި މިބާވަތުގެ މައްސަލައެއް ތަކުރާރުވިޔަ ނުދިނުމަށާއި އެކަމުގައި އަމަލުކުރެވޭނެ ގޮތް ހަރުދަނާކުރުމަށްޓަކައި އަމަލުކުރާނެ ގޮތުގެ އުސޫލެއް ނުވަތަ ގަވާއިދެއް ހަދައި އެގަވާއިދަށް އަމަލުކުރަމުން ގެންދިޔުމަށާއި އެގަވާއިދު ތައްޔާރުކޮށް ނިންމުމުން އެކަން ކޮމިޓީއަށް ހުށަހެޅުމަށް ފުލުހުންނަށް ދެންނެވުމަށެވެ.
މިރިޕޯޓް މަޖިލީހުގެ ފްލޯރ އަށް ހުށަހެޅުމަށްފަހު ފާސްކުރުމަށް ފެނޭތޯ ވޯޓަށް އަހާނެއެވެ.
