އިހަވަންދިއްޕޮޅު ޕޯޓް އަލުން ބިޑަށް ހުޅުވާލާފައިވާ ކަމަށް ސަރުކާރުން ބުނެފިއެވެ.

ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، ފުރަތަމަ ބިޑަށް ހުޅުވާލުމުން ކުރިމަތި ލެއްވި ފަރާތްތަކަކީ، އެ މަސައްކަތަށް އެކަށީގެންވާ ފަރާތްތަކަކަށް ނުވާތީ އަލުން ބިޑަށް ހުޅުވާލާފައިވާ ކަމަށެވެ.

"ރާއްޖެއެމްވީ" އަށް އެނގިފައިވާ ގޮތުގައި މި މަސައްކަތުގެ ފީސިބިލިޓީ އާއި ކޮންސެޕްޓް ޕްލޭން އެކުލަވާލައި، އޭރު މި މަސައްކަތުގެ ކޮންސަލްޓެންސީ އެއްބަސްވުމުގައި ނެދަރލެންޑްސްގެ އެމް.ޓީ.ބީ.އެސް އަދި ޑެންމާރކްގެ ނީރާސްގެ ޖޮއިންޓްވެންޗަރއާ 860،626 (އައްލައްކަ ފަސްދޮޅަސް ހާސް ހަސަތޭކަ ސައްބީސް) އެމެރިކާ ޑޮލަރަށް ސޮއިކޮށްފައިވެއެވެ.

އިހަވަންދިއްޕޮޅު ޕޯޓް ތަރައްގީކުރުމަށް ބަޔަކު ހޯދަން ފުރަތަމަ އިއުލާންކުރީ މާޗް މަހުގެ ތެރޭގައެވެ. ފުރުސަތު ހުުޅުވާލުމުން 6 ފަރާތަކުން ޝައުޤުވެރިކަން ފާޅުކުރިއެވެ. އެހެންނަމަވެސް، މި ޕްރޮޖެކްޓް ހިންގުމަށްޓަކައި ޝަރުތު ހަމަވާ ފަރާތެއް ހޯދުމަށް ކުރިއަށް ގެންދިޔަ އިވެލުއޭޝަނުން އެއްވެސް ފަރާތެއް ފާސްވެފައި ނުވާތީ، ޕްރޮޖެކްޓް އޮތީ މަޑުޖައްސާލާފައެވެ.

ޕަބްލިކް ޕްރައިވެޓް ޕާޓްނާޝިޕްގެ އުސޫލުން ތަރައްގީކުރަން ހަމަޖެހިފައިވާ މި މަޝްރޫއު ޕްލޭންކޮށްފައި ވަނީ ދުނިޔޭގެ އެންމެ ބޮޑެތި ކޮންޓެެއިނަރ ބޯޓު ފަހަރަށް ޚިދުމަތް ދިނުމުގެ ގާބިލްކަން ލިބިފައިވާ، ޒަމާނީ ބަނދަރެއްގެ ގޮތުގައެވެ.

އިކޮނޮމިކް މިނިސްޓްރީން ބުނެފައިވަނީ، މި މަޝްރޫއުގެ ފުރަތަމަ ފިޔަވަހީގައި 900 މީޓަރުގެ މަގަތު ފާލަމެއް ގާއިމްކުރާނެ ކަމަށެވެ. އަދި އެ ބަނދަރަކީ، އަހަރަކު 1.8 މިލިއަން ކޮންޓެއިނަރު އުފުލުމުގެ ގާބިލްކަން ލިބޭގޮތަށް ތަރައްގީކުރާ ތަނެއް ކަމަށެވެ. އިހަވަންދިއްޕޮޅަކީ ދުނިޔޭގެ އިރުމަތީ ބިތުން ފެށިގެން ހުޅަނގަށް ބޯޓުފަހަރު ދަތުރުކުރާ މައިގަނޑު ޝިޕިން ރޫޓްތަކާ ކައިރި ސަރަހައްދަކަށް ވުމުން، މިއީ މި ކަމަށް އެންމެ އެކަށީގެންވާ ސަރަހައްދު ކަމަށް ކުރެވުނު ދިރާސާތަކުން ދައްކާ ކަމަށް ވެސް މިނިސްޓްރީން ބުންޏެވެ.

އަދި މި މަޝްރޫއު ސަބަބުން އިޤުތިޞާދު ފުޅާވެ, ޑައިވަސިފައިކުރަން މަގުފަހިވާނެ ކަމަށާއި، އިޤުތިޞާދީ ތަރައްގީ، ލާމަރުކަޒު ކުރުމުގެ ސިޔާސަތުގެ ދަށުން ރާއްޖޭގެ އުތުރުގައި އިޤުތިޞާދީ ހަބެއް ގާއިމުކުރެވިގެންދާނެ ކަމަށް ވެސް އިކޮނޮމިކް މިނިސްޓްރީންވަނީ ބުނެފައެވެ.

މި މަޝްރޫއަށް 466 މިލިއަން ޑޮލަރު ހޭދަވާނެ ކަމަށްވަނީ އަންދަޒާ ކޮށްފައެވެ.