ތަރައްގީވެފައިވާ ޚިދުމަތްތަކެއް މުޅި ރާއްޖެއަށް ފޯރުކޮށްދޭ މުއައްސަސާއަކަށް ފުލުހުންގެ ޚިދުމަތް ބަދަލުކުރަން ޖެހޭ: ސީޕީ

ތަރައްގީވެފައިވާ ފުލުހުންގެ ޚިދުމަތްތަކެއް މުޅި ރާއްޖެއަށް ފޯރުކޮށްދޭ މުއައްސަސާއަކަށް ދިވެހި ފުލުހުންގެ ޚިދުމަތް ބަދަލުކުރަން ޖެހޭ ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.

ނ. މަނަދޫ ޕޮލިސް ސްޓޭޝަނުގެ ބިންގާ އެޅުމަށް މަނަދޫގައި ބުދަ ދުވަހު ބޭއްވި ރަސްމިއްޔާތުގައި ޙަމީދު ވިދާޅުވީ, ރައްޔިތުންނާ ގުޅިގެން ޚިދުމަތް ދިނުމުގެ ކަންކަން އެންމެ ފުރިހަމައަށް ފޯރުކޮށްދޭ ފުލުހުންގެ މަރުކަޒުތަކާއި ރަށްތައް އަދި އަވަށްތައް ފާހަގަކޮށް, މިއަންނަ އަހަރުން ފެށިގެން ޚާއްސަ އެވޯޑެއް ދިނުމަށް ނިންމާފައިވާ ކަމަށެވެ. އަދި މިހާރު އަމަލުކުރަމުންދާ ދިވެހި ފުލުހުންގެ ޚިދުމަތުގެ ގާނޫނުގައި، ރައްޔިތުންނާއި ފުލުހުންގެ މެދުގައި އޮންނަ ގުޅުން ދެމެހެއްޓުމަށް ވަރަށް ބޮޑަށް ބާރުއަޅާފައިވާ ކަމަށެވެ. ކައުންސިލުތަކާއި އެހެނިހެން މުއައްސަސާތަކާ އަދި ރައްޔިތުންނާ އެކުގައި މަސައްކަތްކުރުމަށް ޚާއްސަ އޮނިގަނޑެއް، މި ހިނގާ ސެޕްޓެމްބަރ މަހުގެ 27 ގެ ނިޔަލަށް އެކުލަވާލަންޖެހޭ ކަމާއި އެކަމުގެ އިންތިޒާމުތައް މިހާރުވެސް ކުރަމުން އަންނަ ކަމަށް ސީޕީ ވިދާޅުވިއެވެ.

މީގެ އިތުރުން ނ. އަތޮޅުގައި އިންޓަރނޭޝަނަލް އެއާޕޯޓެއް އޮތުމާއެކު އެ އަތޮޅަކީ ލޯކަލް ޓުއަރިޒަމް ފުޅާވަމުން އަންނަ އަތޮޅަކަށް ވުމާއި ޓޫރިސްޓު ރިސޯޓުތައް ވެސް ހިންގަމުން އަންނަ އަތޮޅެއްކަން ފާހަގަ ކުރެއްވިއެވެ. އެހެންކަމުން ސިނާއީ މަސައްކަތްކުރާ ފަރާތްތަކަށާއި ވިޔަފާރިކުރާ ފަރާތްތަކަށާއި ފަތުރުވެރިކަމުގެ ދާއިރާއަށާ އަދި ވަކިން ހާއްސަކޮށް ނ. އަތޮޅުގެ ރައްޔިތުންނަށް ދެމުންގެންދާ ޚިދުމަތް އިތުރަށް ފުޅާކުރަންޖެހޭ ކަމަށް ސީޕީ ވިދާޅުވިއެވެ. އަދި ބުދަ ދުވަހު އެޅިގެން މި ދިޔަ ބިންގާއަކީ ނ. އަތޮޅުގެ އިޤްތިޞާދީ ޞިނާޢަތާއި އިޖުތިމާޢީ ފޭރާން ވަރުގަދަކުރުމަށް ފުލުހުންގެ ފަރާތުން ބޭނުންވާ ރައްކާތެރިކަން އިތުރުކުރުމަށް އެޅިގެންދިޔަ ބިންގަލެއް ކަމަށް ސީޕީ ވިދާޅުވިއެވެ.

ސީޕީ ވިދާޅުވީ ކުށާއި ކުށުގެ ބިރުވެރިކަމުން ނ. އަތޮޅާއި ރަށުގެ މުޖުތަމައު ސަލާމަތްކޮށް ރައްކާތެރިކަން ދެމެހެއްޓުމަށް ފުލުހުން ގާއިމުވެތިބުން މުހިންމު ކަމަށެވެ. އެގޮތުން މަނަދޫގައި ބިންގާ އެޅިގެންދިޔަ ޕޮލިސް ސްޓޭޝަނުން ފުލުހުންގެ ޚިދުމަތްދޭން ފެށުމުން ރައްޔިތުންނާއި ރައްޔިތުންގެ މުދަލަށް ދޭންޖެހޭ ރައްކާތެރިކަން ފޯރުކޮށްދިނުމަށް އިތުރު ފަސޭހަތަކެއް ވެގެންދާނެ ކަމަށެވެ. އަދި ފުލުހުންގެ ޚިދުމަތުގެ އައު ގާނޫނަށް 2021 މާރިޗު 27 ގައި އަމަލުކުރަން ފަށާފައިވާއިރު އެ ގާނޫނުން، ފުލުހުންގެ މަސައްކަތްތައް އިންތިޒާމުވެގެންވާ ގޮތް ވަަރަށް ސާފުކޮށް ކަނޑައަޅައިދީފައިވާ ކަމަށާއި ލާމަރުކަޒީ ޚިދުމަތް ދިނުމަށާއި މުޖުތަމައުއާ އޮންނަ ގުޅުން ދެމެހެއްޓުމަށް ބާރުއަޅާފައިވާ ކަމަށް ވިދާޅުވިއެވެ.

އެހެންކަމުން، ފުލުހުންގެ މަސައްކަތްތައް އަމާޒުކުރެވިފައިވަނީ ރައްޔިތުންނަށް ފުލުހުންދޭ ޚިދުމަތް އަލުން ތަރުތީބުކޮށް، ޑިމޮކްރެޓިކް ވެއްޓަކަށް އެކަށޭނަ އަދި ތަރައްގީވެފައިވާ ފުލުހުންގެ ޚިދުމަތްތަކެއް މުޅި ރާއްޖެއަށް ފޯރުކޮށްދޭ މުއައްސަސާއަކަށް ދިވެހި ފުލުހުންގެ ޚިދުމަތް ބަދަލުކުރަން ޖެހޭ ކަމަށް ސީޕީ ވިދާޅުވިއެވެ. ދިވެހި ފުލުހުންގެ ޚިދުމަތުގެ ސްޓްރެޓީޖިކް ޕްލޭންގައި ކަނޑައަޅާފައިވާ 6 ލަނޑުދަނޑީގެ ތެރޭގައި ލޯކަލް ޕޮލިސިންގ ކަނޑައަޅާފައިވަނީ އަތޮޅު ތެރޭގައި ދެވޭ ޚިދުމަތަށް އިތުރު އަހަންމިއްޔަތުކަމެއް ދިނުމުގެ މަގުސަދުގައި ކަމަށް ވިދާޅުވިއެވެ.

ފުލުހުންގެ ޚިދުމަތަށް ގެނެވޭ ބަދަލުތަކުގެ ތެރެއިން އެއް އިންޤިލާބީ ބަދަލަކީ ނެއިބަރހުޑް ޕޮލިސް ނުވަތަ އަވައްޓެރި ފުލުހުންގެ މަސައްކަތްކަމާއި ނ. އަތޮޅުގައި ވެސް ވަރަށް އަވަހަށް އެ ޚިދުމަތް ފެށިގެންދާނެކަން ސީޕީ ފާހަގަކުރެއްވިއެވެ.