ޢިލްމު ކުރިއެރޭނީ މުނާޒަރާއިން - އެޑިއުކޭޝަން މިނިސްޓަރ
ރަސްމީޔާތު ޝަރަފުވެރި ކޮއްދެއްވައި ފޮތް ނެރެދެއްވީ އަލްއަޚް ޢަބްދުﷲ ޞާދިޤް (ސޯދުބެ)
ޤައުމަށް ބޭނުންތެރި ފޮތް ޝާއިޢުކުރުމާބެހޭ ސިޔާސަތުގެ ދަށުން ދިވެހިރާއްޖޭގެ ޤައުމީ ޔުނިވަރސިޓީން ނެރޭ ފުރަތަމަ ފޮތް
ޢިލްމު ކުރިއެރޭނީ މުނާޒަރާއިންކަމަށް އެޑިއުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ދިވެހިރާއްޖޭގެ ތަޢުލީމީ ތާރީޚުގެ މައްޗަށް ބިނާކޮށް ތައްޔާރުކޮށްފައިވާ ފޮތް "އެޑިއުކޭޝަން އިން ދަ މޯލްޑިވްސް 1900-2015" އިފްތިތާޙުކުރުމަށް މޯލްޑިވްސް ނެޝަނަލް ޔުނިވަރސިޓީގައި ބޭއްވި ޚާއްސަ ހަފުލާގައި ވާހަކަދައްކަވަމުންނެވެ.
މިނިސްޓަރ މިހެން ވިދާޅުވީ އެމްއެންޔޫއިން މި ނެރުނު ފޮތަށް އެކިމީހުންގެ ފާޑުކިޔުންތައް އަންނާނެތީ ކަމަށް މިނިސްޓަރ ވިދާޅުވިއެވެ. އެހެންނަމަވެސް އެމީހުންގެ ފާޑުކިޔުންތައް ދެކެވަޑައިގަންނަވަނީ ތަޢުލީމީ ދިރާސާ ކުރައްވާ ފަރާތްތަކަށް ދެވޭ ޢިނާޔަތެއް އަދި ކުރިއެރުމެއްގެ ގޮތުގައި ކަމަށް މިނިސްޓަރ ވިދާޅުވިއެވެ.
މި ރަސްމިއްޔާތު ޝަރަފުވެރި ކޮއްދެއްވައި ފޮތް ނެރުއްވައިދެއްވީ އަލްއަޚް ޢަބްދުﷲ ޞާދިޤް (ސޯދުބެ)އެވެ. އަދި މި ފޮތް ނެރެދެއްވުމަށް ސޯދުބެ ފިޔަވައި ލާއިޤު އެއްވެސް ފަރާތެއް ނެތް ކަމަށާއި, އެއީ ވަރަށް ގިނަ ސަބަބުތަކާހުރެ ކަމަށްވެސް މިނިސްޓަރ ވިދާޅުވިއެވެ.
އެމްއެންޔޫއިން މި ނެރުނު ފޮތަކީ "އެޑިއުކޭޝަން އިން ދަ މޯލްޑިވްސް -2015-1900" ނަމުގައި އެ ޔުނިވަރސިޓީން ނެރުނު ފޮތެކެވެ. އަދި މިއީ ދިވެހި ރާއްޖޭގެ ތަޢުލީމީ ތާރީހުގެ މައްޗައް ނެރުނު ފޮތެއްކަމަށް މިނިސްޓަރ ވިދާޅުވިއެވެ. އަދި މި ފޮތުގެ މައިގަޑަކީ، 20ވަނަ ޤަރުނުގައި ތަޢުލީމުގެ ކަންތައްތައް ބައްޓަން ކުރި ސިޔާސަތުތަކާއި، އެ ސިޔާސަތުތައް ވުޖޫދުވެގެން އައި ސަބަބުތަކާއި، ސިޔާސަތުތައް އެކުލަވާލެވިފައިވާ ގޮތާއި، ސިޔާސަތުތައް ތަންފީޒުކުރުމުން ނުކުތް ނަތީޖާތައް ކަމަށް މިނިސްޓަރ ވިދާޅުވިއެވެ.
އެމްއެންޔޫއިން ފޮތްތެރިކަން ކުރިއެރުވުމުގެ ގޮތުން ފޮތް ލިޔަން ބޭނުންވާ, ޔުނިވަރސިޓީގެ މުވައްޒަފުންނާއި ދަރިވަރުންނަށް ބައެއްކަންކަން ފަހި ކުރުމުގެ ގޮތުން ފައިސާގެ އެހީދިނުން, އަދި ފޮތް ޝާއިޢުކުރުމުގެ މަސައްކަތް އެމްއެންޔޫއިން ވަނީ މިއަހަރު ފަށައިފައެވެ.
