ކުރިމަގުގައި އޮތީ މަރުވުން، ހައްޔަރު ކުރުން ނުވަތަ އަންނަ އަހަރުގެ އިންތިޚާބު ކާމިޔާބުކުރުން – ބޮލްސޮނާރޯ
31 އޯގަސްޓު 2021 | އަންގާރަ 02:16ގައުމުގައި މުޒާހަރާ ކުރަމުންދަނީ ކޮން ސަބަބަކާހުރެ ކަމެއް އެނގިވަޑައި ނުގަންނަވާ ކަމަށް ބޮލްސޮނާރޯ ވިދާޅުވި
ބްރަޒިލްގެ ރައީސް ބޮލްސޮނާރޯ ސަޕޯޓަރުންނާއެކު
ކުރިމަގުގައި އޮތީ ވެދާނެ ތިންކަމެއް ކަމަށާއި، އެއީ މަރުވުން، ނުވަތަ ހައްޔަރު ކުރުން ނޫނީ 2022 ވަނަ އަހަރުގެ ރިޔާސީ އިންތިޚާބު ކާމިޔާބުކުރުން ކަމަށް ބްރެޒިލްގެ ރައީސް ޖެއިރް ބޮލްސޮނާރޯ ވިދާޅުވެއްޖެއެވެ.
ބޮލްސޮނާރޯ މިހެން ވިދާޅުވީ ހޮނޮހިރު ދުވަހު ސޯޝަލް މީޑިއާ މެދުވެރިކޮށް ލައިވްކުރި ކްރިސްޓިއަން ދީނުގެ ފާދިރީންނާއެކު ބޭއްވި ބައްދަލުވުމަކަށްފަހުއެވެ. އޭނާ ވިދާޅުވީ ފުރަތަމަ ކަމެއްގެ ގޮތުން އޭނާ ހައްޔަރު ނުކުރެވޭނެ ކަމުގެ ޔަގީންކަން އެބައޮތް ކަމަށާއި، މި ދުނިޔޭގައި އޭނާ ބިރުގަންނަ އެއްވެސް މީހަކު ނެތް ކަމަށެވެ. އަދި ކުރައްވަމުން ގެންދަވަނީ ރަނގަޅު މަސައްކަތްޕުޅުތަކެއް ކަމަށް އަމިއްލަފުޅަށް ގަބޫލުކުރައްވާ ކަމަށެވެ. އަދި އެއްވެސް މީހަކަށް ދަރާފައި ނުވާނެކަމަށް ވެސް ވިދާޅުވިއެވެ.
ބޮލްސަނާރޯ ހުންނެވީ ބްރެޒިލްގެ މެދުތެރޭގެ ރަށެއްކަމަށްވާ ގޮއިއަސްގައި، ސިޔާސީ ލީޑަރުންނާއި، ވިޔަފާރިވެރިންނާއި ބައްދަލުކުރައްވަން ވަޑައިގެންނެވެ. އަދި މި ބައްދަލުވުމުގައި ގައުމުގެ މަސްލަހަތާ ގުޅުން ހުރި ކަންތައްތަކާއި، އިޤްތިޞާދާއި ކޮވިޑްގެ ހާލަތުގެ އިތުރުން ބްރެޒިލްގައި ދިގުދެމިގެންދާ ހަނަފަސްކަމާ ގުޅޭ ގޮތުން މަޝްވަރާ ވެސް ކޮށްފައިވެއެވެ.
މީގެ އިތުރުން ބްރެޒިލްގައި ކުރިއަށްދާ މުޒާހަރާތަކަކީ ކޮންކަމާ ގުޅިގެން ކުރިއަށް ގެންދާ މުޒާހަރާތަކެއް ކަމެއް އެނގިވަޑައިނުގަންނަވާ ކަމަށާއި، މުޒާހަރާ ކުރަން ޖެހޭ ސަބަބެއް ވެސް އެނގިވަޑައި ނުގަންނަވާ ކަމަށް ބޮލްސޮނާރޯ ވަނީ ވިދާޅުވެފައެވެ.
