ކާބުލްް އެއާޕޯޓަށް ދަތުރުކުރަމުންދިޔަ ވެހިކަލަކަށް އެމެރިކާ ސިފައިން ޑްރޯން މެދުވެރިކޮށް ދިން ހަމަލާގައި ވެހިކަލާއި ކައިރީގައި ހުރި ގެއެއްގައި ރޯވެ، 9 މީހަކު މަރުވެއްޖެއެވެ.

ރިޕޯޓުތައް ބުނާގޮތުން ޑްރޯން ހަމަލާ ދީފައިވަނީ ގޮވާތަކެތި ހަރުކޮށްގެން ކާބުލް އެއާޕޯޓަށް ދަތުރުކުރި ވެހިކަލެއްގައި އިން މީހަކަށެވެ. ޑްރޯން ހަމަލާ ދިންއިރު، އެ ވެހިކަލް އޮތީ މީހުން ދިރިއުޅޭ ގެއެއް ކައިރީގައި ކަމަށާއި، އެގޭގައި އަލިފާން ރޯވެ، އެ އާއިލާއަށް ނިސްބަތްވާ 9 މެމްބަރަކު މަރުވެފައިވާކަމަށް ރިޕޯޓުތައް ބުނެއެވެ.

މި ހާދިސާގައި މަރުވި މީހުންގެ ތެރޭގައި ދެ އަހަރުގެ ކުޑަ ކުއްޖަކުވެސް ހިމެނެއެވެ. މަރުވި މީހުންގެ ތެރޭގައި 6 ކުޑަކުދިން ހިމެނޭ ކަމަށްވެސް ބޭރުގެ ރިޕޯޓުތަކުން ބުނެއެވެ.

އެ ގޭގައި ރޯވި އަލިފާންގަނޑު ކޮންޓްރޯލްކުރަން އަވައްޓެރި ގެތަކުގެ މީހުން މަސައްކަތްކުރި ކަމަށް ރިޕޯޓްތަކުން ބުނެއެވެ. އެމީހުން އަލިފާން ނިއްވަން މަސައްކަތްކުރި އިރުވެސް އެ ގޭތެރޭގައި 5 މީހަކު މަރުވެފައި އޮތް ކަމަށް މަންޒަރު ދުށް މީހަކު ބުނެފައިވާކަމަށް ރިޕޯޓުކޮށްފައިވެއެވެ.

މީޑިއާތަކުގައި ރިޕޯޓުކޮށްފައިވާގޮތުން މި ހަމަލާއާއި ގުޅިގެން އެމެރިކާގެ ސެންޓްރަލް ކޮމާންޑްގެ ތަރުޖަމާނު ވަނީ ކުށެއް ނެތް ބަޔަކު އެމެރިކާގެ ހަމަލާއެއްގައި މަރުވުމުން ހިތާމަ ކުރާކަމަށް ބުނެފައެވެ. ނަމަވެސް އެހަމަލާ ނުދިން ނަމަ އަދި އިތުރު އެތައް ބަޔަކު މަރުވުމުގެ ފުރުސަތު ބޮޑުކަމަށް ތަރުޖަމާނު ބުނެފައިވެއެވެ. މި ހަމަލާ ދިން ވަގުތު ވެހިކަލްގައި ތިބީ ކިތައް ހަނގުރާމަވެރިން ކަމެއް އަދި އެނގިފައި ނުވާކަމަށް ތަރުޖަމާނު ބުންޏެވެ.

މި ވެހިކަލަށް އަމާޒުކޮށް އެމެރިކާ ސިފައިން ދިން ހަމަލާއަކީ ކާބުލް އެއާޕޯޓަށް ޓެރަރިސްޓު ހަމަލާއެއް ދޭން އުޅޭ ކަމުގެ ސިގުނަލްތަކެއް ލިބިގެން މިފަދަ ކަމެއް ހިނގިޔަ ނުދޭން ދިން ހަމަލާއެކެވެ. މިދިޔަ ހަފްތާގެ ބުރާސްފަތި ދުވަހުވެސް މީހަކު ވަނީ ޖާނުން ފިދާވެގެން ކާބުލް އެއާޕޯޓުގައި ބޮމުގެ ހަމަލާއެއް ދީފައެވެ. މި ހަމަލާގައި އެމެރިކާގެ 13 ސަރވިސް މެމްބަރަކާއި، އާންމުންގެ 170 މީހަކު ވަނީ މަރުވެފައެވެ.