މެލޭޝިޔާގެ ބޮޑުވަޒީރު ކަރަންޓީނު ވެވަޑައިގެންފި
30 އޯގަސްޓު 2021 | ހޯމަ 08:07ސަބްރީ ކަރަންޓީނުގައި ހުންނަވާނެ މުއްދަތު ހާމަކުރައްވާފައެއް ނުވޭ
މެލޭޝިޔާގެ ބޮޑުވަޒީރުގެ އިސްމާއީލް ސަބްރީ ބިން ޔައުގޫބް
މެލޭޝިޔާގެ ބޮޑުވަޒީރު އިސްމާއީލް ސަބްރީ ބިން ޔައުގޫބް ކަރަންޓީނު ވެވަޑައިގެންފިއެވެ.
ބޮޑުވަޒީރުގެ އޮފީހުން ހޯމަ ދުވަހު ނެރުނު ބަޔާނެއްގައި ބުނީ ކޮވިޑަށް ޕޮޒިޓިވްވި މީހަކާ ސަބްރީ ކޮންޓެކްޓް ވެވަޑައިގަތް ކަމަށެވެ. އެހެންކަމުން މިހާރު އެމަނިކުފާނު ހުންނެވީ ކަރަންޓީނުގައި ކަމަށެވެ.
ސަބްރީ ކަރަންޓީނުގައި ހުންނަވާނެ މުއްދަތު އެ އޮފީހުން ހާމަކޮށްފައިނުވާއިރު ސަބްރީ ކޮވިޑަށް ޕޮޒިޓިވް ވެވަޑައިގެންނެވިކަން ނުވަތަ ނޫންކަން ވެސް ހާމަކޮށްފައެއް ނުވެއެވެ.
މެލޭޝިޔާގެ ބޮޑުވަޒީރުގެ މަގާމަށް ސަބްރީ އައްޔަން ކުރެއްވީ މި އޮގަސްޓް މަހުގެ ތެރޭގައެވެ. މެލޭޝިޔާގެ ރަސްގެފާނު އަބްދުﷲ ރިއާޔަތުއްދީން އާ ސަރުކާރެއް އެކުލަވާލުމުގެ މަސައްކަތް ސަބްރީއާ ހަވާލުކުރެއްވީ އޭނާ ބޮޑުވަޒީރުކަމަށް އައްޔަންކުރުމަށް މެލޭޝިޔާގެ ޕާލަމެންޓުގައި ނެގި ވޯޓުގެ އަޣުލަބިއްޔަތުން ރުހުން ލިބުމާ ގުޅިގެންނެވެ.
ބޮޑުވަޒީރުގެ މަގާމަށް ސަބްރީ އައްޔަން ކުރެއްވުމާއެކު އެގައުމުގައި އަނެއްކާވެސް އުފެދޭނީ ޔުނައިޓެޑް މެލޭސް ނޭޝަނަލް އޮގަައިޒޭޝަން (ޔޫއެމްއެންއޯ)ގެ ވެރިކަމެކެވެ. ބޮޑުވަޒީރުގެ މަގާމަށް ސަބްރީ އައްޔަންކުރުމަށް މުހްޔިއްދީންގެ ޕާޓީން ވެސް ވަނީ ތާއީދުކޮށްފައެވެ.
61 އަހަރުގެ ސަބްރީ މީގެކުރިން ހުންނެވީ މެލޭޝިޔާގެ ބޮޑުވަޒީރުގެ މަގާމުން އިސްތިއުފާދެއްވި މުހްޔިއްދީން ޔާސީންގެ ނާއިބުގެ މަގާމުގައެވެ. ބޮޑުވަޒީރުކަމަށް ވަޑައިގެންނެވިތާ 18 ވަނަ މަހު މުހިއްޔިއްދީން އިސްތިއުފާ ދެއްވީ ގާނޫނުހަދާ މަޖިލީހުގެ ތާއީދު ގެއްލުމުންނެވެ. އޭނާ ވެރިކަމުގައި ހޭދަކުރެއްވި ކުރު މުއްދަތުގައި ގިނަ ފާޑުކިޔުންތަކެއް އަމާޒުވެފައިވާއިރު، އެންމެ ބޮޑަށް ފާޑުކިޔާފައި ވަނީ ކޮވިޑާ ގުޅިގެން އަޅާ ފިޔަވަޅުތަކާ ގުޅޭ ގޮތުންނެވެ.
ކޮވިޑާ ގުޅިގެން އިންތިޚާބެއް ނުބޭއްވޭނެ ކަމަށް ރަސްގެފާނު ސުލްތާން އަބްދުﷲ ސުލްތާން އަހުމަދު ޝާހު ވަނީ ނިންމަވާފައެވެ.
