އޯޑިއޯއެއް އޮތްނަމަ އާންމު ކުރައްވާ، ޝަރީއަތަށް ނުފޫޒެއް ނުފޯރުވަން: އަލީ ޒާހިރު
ރައީސް އޮފީހުން ޙުކުމް ލިޔެގެން ފަނޑިޔާރުގެއަށް ދާ އުސޫލުން މިހާރު ކަންކަން ނުހިނގާނެ
ރައީސް އޮފީހުގެ ޗީފް އޮފް ސްޓާފް އަލީ ޒާހިރު
ކުރީގެ ރައީސް އަބްދުﷲ ޔާމީނުގެ ޝަރީއަތަށް ނުފޫޒު ފޯރުވާފައި ނުވާނެ ކަމުގެ ޔަޤީންކަން ދެއްވާ ކަމަށާއި، އެފަދަ އޯޑިއޯއެއް އޮތްނަމަ އާންމު ކުރައްވަން އެދިވަޑައިގަންނަވާކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.
އަލީ ޒާހިރު މިހެން ވިދާޅުވީ އިދިކޮޅު ޕީޕީއެމް ޕީއެންސީ ކޯލިޝަންގެ މަޖިލިސް މެމްބަރުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާ ބައްދަލުކުރެއްވުމަށް ކަމަށް ވިދާޅުވެ ރައީސް އޮފީހަށް ވަޑައިގަތުމުން އެބޭފުޅުންނާ ބައްދަލު ކުރައްވައި ދެއްކެވި ވާހަކައިގައެވެ. އަލީ ޒާހިރު ވަނީ އިދިކޮޅުން ބައްދަލު ކުރެއްވުމުން އުފާ ކުރައްވާކަމަށް ވިދާޅުވެ، ރައީސް އޮފީހުގައި ބައްދަލުކުރެއްވުމަށް ކުރީބައިބައި އެދިވަޑައިގެންނަމަ، އިންތިޒާމުތައް އިތުރަށް ފުރިހަމަވީސްކަމަށް ވިދާޅުވެފައެވެ.
މި ބައްދަލުކުރެއްވުމުގައި ވާހަކަ ދައްކަވަމުން ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ، ކުރީގެ ރައީސް އަބްދުﷲ ޔާމީނުގެ ޝަރީއަތަށް ސަރުކާރުން ނުފޫޒު ފޯރުވާކަމަށް ކުރިން ވެސް އަޑުފެތުރިފައި އޮއްވައި، އެކަމަށް ބާރު ލިބިދޭ އޯޑިއޯތަކެއް ލީކުވެފައިވާ ކަމަށެވެ. އަދި ލީކުވެފައިވާ އޯޑިއޯތަކުގައި އަލީ ޒާހިރަށް ބޮޑެތި ތުހުމަތުތަކެއް ކުރެވޭއިރު، އަދިވެސް އެ ތުހުމަތުތަކަށް ބާރު ލިބިދޭ އިތުރު ރެކޯޑިންގތައް ހުރިކަމަށް ޝިޔާމް ވިދާޅުވިއެވެ. ޝިޔާމް ވަނީ އެ އޯޑިއޯތައް ނުކުތުމުގެ ކުރިން، ކަންކަން ޙައްލު ކުރެއްވުމަށް އެދިވަޑައިގަންނަވާފައެވެ.
އޭގެ އިތުރުން، މި ތުހުމަތުތަކާ ގުޅިގެން ރައީސް ޞާލިޙާއި، ރައީސް އޮފީހުން އެއްޗެއް ދަންނަވާފައިނުވާތީ އެކަމާ ކަންބޮޑުވެވަޑައިގަންނަވާ ކަމަށް ވެސް ޝިޔާމް ވިދާޅުވިއެވެ.
އެކަމާ ގުޅިގެން އަލީ ޒާހިރު ވަނީ އެއްޗެއް ދަންނަވާފައި ނުވަނީ މި މައްސަލައިގެ ބާވަތުން މިއީ އެއްވެސް އަސްލެއް އޮތް ކަމެއްކަމަށް ދެކިވަޑައިނުގަންނަވާތީކަމަށް ވިދާޅުވެފައެވެ. އަދި އެއްވެސް ފަނޑިޔާރަކަށް ނުވަތަ ޝަރީއަތަކަށް ނުފޫޒު ފޯރުވާފައި ނުވާނެ ކަމުގެ ޔަޤީންކަން ދެއްވައި އަލީ ޒާހިރު ވަނީ އެފަދަ މައުލޫމާތެއް ނުވަތަ އޯޑިއޯއެއް ލިބިވަޑައިގެންފައިވާނަމަ އާންމު ކުރެއްވުމަށް އެދިވަޑައިގެންފައެވެ. އަލީ ޒާހިރު ވަނީ އެފަދަ އެއްވެސް ކަމެއް ކުރައްވާފައި ނުވާނެ ކަމުގެ ޔަޤީންކަން އިދިކޮޅުން ވަޑައިގެން ބޭފުޅުންނަށް ވެސް އަރުވާފައެވެ.
އަލީ ޒާހިރު ވަނީ މީގެ ކުރިން ރައީސް އޮފީހުން ޙުކުމް ލިއެގެން ފަނޑިޔާރުގެއަށް ދާ އުސޫލުން މިހާރު ކަންކަން ނުހިނގާނެ ކަމުގެ ޔަޤީންކަން ވެސް އިދިކޮޅަށް އަރުވާފައެވެ.
އޭގެ އިތުރުން، މި މައްސަލައިގެ ތަހުގީގު ޖޭއެސްސީއާއި، ފުލުހުންނާއި، ކަމާ ގުޅުންހުރި ފަރާތްތަކުން ވީހާވެސް ބާރު މިނެއްގައި ނިންމެވުން އެދިލައްވާކަން ފާހަގަކުރައްވައި އަލީ ޒާހިރު ވަނީ ތަހުގީގަށް ފުރިހަމަ އެއްބާރުލުންވެސް ދެއްވާނެ ކަމަށް ވިދާޅުވެފައެވެ. އަދި ނިޒާމީ ގޮތެއްގައި އެހީތެރިވެދެވޭނެ ގޮތްތަކަށް މި މައްސަލަ އަވަހަށް ސާފުވެގެން ދިއުމަށް އެހީތެރިކަން ފޯރުކޮށްދެއްވާނެކަމަށް ވެސް އަލީ ޒާހިރު ވިދާޅުވިއެވެ. އަދި އިދިކޮޅުން ހިއްސާ ކުރެއްވި ކަންބޮޑުވުންތައް ރައީސާ ވެސް ހިއްސާ ކުރައްވާނެކަން އަލީ ޒާހިރު ފާހަގަކުރެއްވިއެވެ.
މި ބައްދަލުކުރެއްވުމުގައި ޝިޔާމްގެ އިތުރުން، މާވަށު ދާއިރާގެ މެމްބަރު މުޙައްމަދު ސައީދުއާއި، ދިއްގަރު ދާއިރާގެ މެމްބަރު ގައްސާން މައުމޫނުގެ އިތުރުންވެސް އިދިކޮޅުގެ ބައެއް މެމްބަރުން ބައިވެެރިވެވަޑައިގެންނެވިއެވެ.
