ރައީސް ޔާމީނަކީ އޯޑިއޯ އާއި ވީޑިއޯގެ އެންމެ އައުލާ މިސާލެވެ.

މީހަކު ދެއްކި ވާހަކައެއް ކަމަށް ބުނާ ފުލެއް ބިތެއް އަޑިއެއް ހަގީގަތެއް ނޭނގޭ އަޑެއް އިވިގެން ވާހަކަތަކެއް ކޮނޑު އަޅައިގެން އެރި އިރާއެކު އިދިކޮޅުން ދުވެގޮސް ރައީސުލްޖުމްހޫރިއްޔާގެ އޮފީސް ދޮށުގައި ބަނޑަހަ ޖަހައިފިއެވެ.

އިންސާފު ގާއިމު ކުރުމަށްޓަކައި ރައީސުލްޖުމްހޫރިއްޔާ ދެފައިންޕުޅު އެއްތާކު ނުޖައްސަވައި ކުރިހާ ތަހުގީގަކާއި ހުރިހާ ހެއްކަކާއި އުފުލުނުހާ ދައުވާޔަކާއި ބޭއްވުނުހާ އަޑުއެހުންތަކާއި އިއްވުނުހާ ހުކުމަށް ނުބަލައި ރައީސް ޔާމީނު ދޫކޮށްލަންވީޔޯލައެވެ. އެހިސާބުން އިންސާފު ގާއިމުވެ ރައީސް ޔާމީނަކީ ހިނގާ ބިނގާވެ އުޅޭ ހުދުމަލްމަލް ފޮތި ފޭއްޔަކަށް ނޫނީ ވިހި އަޑުބާ ބޯކިރު ނުވަތަ ހުކުރު މިސްކިތު ވަޅުފެނަށް ބަދަލުވީއެވެ. ގާނޫނީ ދައުލަތެއް ހިންގައި ރައްޔިތުންނަށް ލާބަޔާއި މަންފާ ހޯދައިދޭނެ ކަމަށް ބުނާ އިދިކޮޅު މީހުންގެ ހަމަ ހުންނަ ގޮތަކީ މިއީއެވެ.

އެންމެ ރަނގަޅެވެ. ބުނި ބުންޏަށް ނެރެގެން ތިޔައުޅޭ ވާނުވާ ނޭނގޭ ނުސާފު އޯޑިއޯއަށް ބުރަވެ ކުށެއްނެތް މީހެއްގެ ގޮތުގައި ނުވިތާކަށް ދައުލަތުން ބަދަލު ދީފައި ރައީސް ޔާމީނު ދޫކޮށްލީޔޯލައެވެ.

އަމިއްލަ ގެޔަށް ކަޅު ދަބަސްތަކުގައި ހަރާން ފައިސާ ވެއްދިކަމާއި، ފައިސާވިއްޔާ އަނބިމީހާ ވެސް ހަރާމެއް ހަލާލެއް ނުބަލާ ކަމަށް މުޅި ދުނިޔޭގެ ކުރިމަތީގައި ވިދާޅުވެފައި ވަނީ ތިޔަ ކަހަލަ ނުސާފު އޯޑިއޯ އަކުންނޫނެވެ. ގަޓުގައި މޭފުޅު ފުއްޕައި، އަޑުގައި ބުންވަރުލައި ސްޓޭޖުގެ އެންމެ މެދުގައި ހުންނަވައި ވިދާޅުވެފައިވާ މިބަސްފުޅުތަކުގެ އޯޑިއޯއާއި ވީޑިއޯއާއި އެއަޑު އެހި ކަންފަތްތަކާއި ދުށް ލޯތަކާއި ހެކިވެ ތިބި މީސްތަކުންނަށް ހަދަންވީ ގޮތެއް އިހަށް ބުނެދީބަލާށެވެ.

ރައްޔިތަކު ވޯޓެއް ލާނެ ޒާތުގެ ކެންޑިޑޭޓަކު ނުހޯދައި ތިޔަބޮޑު ހަޑީގައި ހޭވިގެން މަރުފަލި ޖަހަން ތިޔަ ބޮޑު ޕާޓީ ބޭތިއްބުމަކީ ރައީސް ޔާމީނު ދެންމެވި ގުއިރޯނު ކަމުގައި ވެދާނެއެވެ. އެކަމަކު އެރޯނުގައި އޮޅިގަނެގެން ތިބޭކަށް ތިޔައީވެސް ކުޑަގިފިލިން ވަސް ދުވާވަރުގެ ބޮޑެތި ސިންގާ މީހުން ވިއްޔާއެވެ.

އޯޑިއޯއާއި ވީޑިއޯއާއި އެކައުންޓްގައި އޮތް ފައިސާއަށް ބަލާފައި ކަން ކުރަންޏާ ކޯޓު ހުކުމެއް ނެތި އުމުރުދުވަހު ޖަލުގައި ބާއްވާ ވަރަށް ރައީސް ޔާމީނުގެ ލެގަސީ ވަނީ ހާޑްޑްރައިވް ތަކުގައި ރައްކާކުރެވިފައެވެ