އިލެކްޓްރޯނިކް މުޢާމަލާތްތަކަށް ގާނޫނީ ހައިސިއްޔަތު ދިނުމަށް ހުށަހަޅާފައިވާ ބިލުގެ ބަހުސް ފަށައިފި

އިލެކްޓްރޯނިކް ސޮއި އަދި ޓްރަސްޓްގެ ޚިދުމަތްތައް ހިމެނޭގޮތަށް، ދިވެހިރާއްޖޭގައި އަދި ދިވެހިރާއްޖޭން ބޭރުގައި ކުރެވޭ އިލެކްޓްރޯނިކް މުއާމަލާތްތަކަށް ގާނޫނީ ހައިސިއްޔަތު ދިނުމަށް ހުށަހަޅާފައިވާ ބިލުގެ އިބްތިދާއީ ބަހުސް ފަށައިފިއެވެ.

ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ސަރުކާރުގެ ފަރާތުން އިލެކްޓްރޯނިކް މުޢާމަލާތްތަކާބެހޭ ބިލު ހުށަހަޅުއްވާފައިވަނީ ދިއްދޫ ދާއިރާގެ މެންބަރު ޢަބްދުﷲ ވަހީދެވެ. ބިލު ހުށަހަޅުއްވަމުން މެންބަރު ވިދާޅުވީ ސަރުކާރުން މި ބިލު ހުށަހެޅުމުގެ ބޭނުމަކީ، އިގްތިޞާދީ އަދި އިޖްތިމާއީ ކަންކަން ފަސޭހަކޮށް ތަރައްގީކުރުމަށްޓަކައި، ވިޔަފާރީގެ މުއާމަލާތްތައް ކުރުމަށާއި އެނޫން ބޭނުންތަކުގައި، އިލެކްޓްރޯނިކް ޒަރީއާއިން މުއާމަލާތުކުރުމާއި، އެފަދަ މުއާމަލާތުގެ ޞައްހަކަން ކަށަވަރުކުރެވޭނެ ނިޒާމެއް ގާއިމުކޮށް، އިލެކްޓްރޯނިކް ޒަރީއައިން މުއާމަލާތު ކުރުމުގައި އަމަލުކުރާނެ އުސޫލުތައް ބަޔާންކޮށް، ޓްރަސްޓް ޚިދުމަތްތަކުގެ އުސޫލުތައް ކަނޑައެޅުން ކަމަށެވެ.

ބިލުގެ މަޤްޞަދުތަކުގެ ތެރޭގައި އިލެކްޓްރޯނިކް ސޮއި އަދި ޓްރަސްޓްގެ ޚިދުމަތްތައް ހިމެނޭގޮތަށް، ދިވެހިރާއްޖެއާއި ދިވެހިރާއްޖޭން ބޭރުގައި ކުރެވޭ އިލެކްޓްރޯނިކް މުޢާމަލާތްތަކުގެ ޞައްހަކަން ގާނޫނީ ގޮތުން ކަށަވަރުކޮށްދިނުން ހިމެނެއެވެ. އަދި ދިވެހިރާއްޖެއާއި ދިވެހިރާއްޖޭން ބޭރުގައި އިލެކްޓްރޯނިކް މުއާމަލާތްތައް ހިންގުމަށް މަގުފަހިކޮށްދީ، އެކަންކަމަށް ގާނޫނީ ގޮތުންހުރި ހުރަސްތައް ނައްތާލުން ވެސް މި ބިލުގެ މަޤްޞަދުތަކުގެ ތެރޭގައި ހިމެނެއެވެ.

ބިލުގައި ބުނީ ޑޭޓާ މެސެޖަކަށްވީތީ ހަމައެކަނި އެ ސަބަބުގެ މައްޗަށް ބިނާކޮށް ޝަރީޢަތެއްގައި ޑޭޓާ މެސެޖެއް ހެކީގެ ގޮތުގައި ބަލައިނުގަނެވޭނެ ގޮތަށް ހެއްކާބެހޭ އުސޫލުތައް ތަތުބީގުކޮށްގެން ނުވާނެ ކަމަށާއި، ޑޭޓާ މެސެޖެއްގެ ސިފައިގައިވާ މައުލޫމާތަށް ދޭންޖެހޭ ހެކީގެ ބުރަދަން ކަނޑައެޅުމުގައި އަމަލުކުރާނީ، ހެއްކާބެހޭ ގާނޫނުގައިވާ ގޮތުގެމަތިން ކަމަށެވެ.

"ޑޭޓާ މެސެޖު"އަކީ އިލެކްޓްރޯނިކް، މެގްނެޓިކް، އޮޕްޓިކަލް ނުވަތަ އެފަދަ ވަސީލަތެއް މެދުވެރިކޮށް ޖެނެރޭޓުކޮށްފައިވާ ނުވަތަ ފޮނުވާފައިވާ ނުވަތަ ލިބިފައިވާ ނުވަތަ ރައްކާކުރެވިފައިވާ މައުލޫމާތެކެވެ.

މީގެ އިތުރުން ބާބުގެ އެއްވެސް މާއްދާއެއްގައި ހިމެނޭ އެއްވެސް ކަމަކީ، ކޮންޓްރެކްޓާބެހޭ ޤާނޫނުގައި އެއްބަސްވުމެއް އެކުލަވާލުމުގައި ފުރިހަމަވާންޖެހޭނެ ކަމަށް ބަޔާންކުރާ އެއްވެސް ޝަރުތެއް ނުވަތަ އެޤާނޫނުގައި ކަނޑައަޅާފައިވާ އެއްވެސް ޤާނޫނީ އުސޫލެއް ނަފީކުރާނެ ކަމެއް ނޫން ކަމަށް ވެސް ބިލުގައި ބުނެއެވެ.