ރަސްފަރީ ފަރަށް އުރުނު އާގު ބޯޓާ ގުޅިގެން މަޖިލީހަށް ކުއްލި މައްސަލައެއް
30 އޯގަސްޓު 2021 | ހޯމަ 07:15މި ބޯޓު ފުންކުރެވިފައިވަނީ އާދިއްތަ ދުވަހު 14:08 ގައި
ފަރަށް އެރި ބޯޓު ފުންކޮށްގެން ގެންދާ މަންޒަރު
ރަސްފަރީ ފަރަށް ބިޔަ އާގުބޯޓެއް އުރުނު ހާދިސާ ފުރިހަމައަށް ތަހުގީގުކޮށް، އެޅެން ހުރި ހުރިހާ ފިޔަވަޅެއް އެޅުމަށް ދިވެހި ސަރުކާރަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި މި މައްސަލަ ހުށަހަޅުއްވާފައިވަނީ މަކުނުދޫ ދާއިރާގެ މެންބަރު މުޙައްމަދު ރާއީއެވެ. މައްސަލަ ހުށަހަޅުއްވަމުން މެންބަރު ވިދާޅުވީ އިންޑިއާގެ ޓުޓިކޮރިން ބަނދަރުން ފުރައިގެން ސައުތް އެފްރިކާއަށް ދަތުރުކުރަމުން ދިޔަ، ޕެނަމާ ބޯޓެއްކަމުގައިވާ "ނެވިއޯ އަމަރީލިސް" ނަމަކަށް ކިޔާ ބިޔަ އާގުބޯޓު، 17 އޮގަސްޓުގައި ދިވެހިރާއްޖޭގެ ކަނޑުގެ ސަރަޙައްދަށް ވަދެފައިވާއިރު، 18 އޮގަސްޓުގެ މެންދުރުގެ ވަގުތެއްގައި މާލެ އަތޮޅު ރަސްފަރީގެ 17 ނޯޓިކަލް މޭލު ދުރުގައި އޮއްވައި އެ ބޯޓުގެ އިންޖީނު ހުއްޓި، 19 އޮގަސްޓުގެ ހެނދުނުގެ ވަގުތެއްގައި އެ ބިޔަ ބޯޓު ރަސްފަރީ ފަރަށް އަރާފައިވާ ކަމަށެވެ.
މެންބަރު ވިދާޅުވީ މިފަދަ ހާދިސާތަކަކީ ގައުމުގެ ސަލާމަތަށް ވެސް އޮތްބޮޑު ނުރައްކަލެއް ކަމަށެވެ. އަދި މިއީ ކިހިނެއް ކޮންގޮތަކަށް ހިނގާފައިވާ ހާދިސާއެއްތޯ ބަލައި ފުރިހަމައަށް ތަހުގީގުކޮށް މިކަމުގައި އިހުމާލުވެފައިވާ ފަރާތްތައް ދެނެގަނެ، މިފަދަ ހާދިސާއެއް ކުރިއަށް އޮތްތަނުގައި ހިނގިޔަ ނުދިނުމަށް އެޅެންހުރި ހުރިހާ ފިޔަވަޅެއް އެޅުމަށް ދިވެހި ސަރުކާރަށް ގޮވާލައި، ރައްޔިތުންގެ މަޖިލީހުގެ ގަވާއިދުގެ 17 ވަނަ މާއްދާގެ ދަށުން މައްސަލަ ހުށައަޅުއްވާ ކަމަށެވެ.
ކ. ރަސްފަރި ހުޅަނގު ފަރާތުން ފަރަށް އެރި ބޯޓު މިހާރު ފުންކުރެވިފައިވާއިރު އެމްއެންޑީއެފުން ބުނީ ކޯސްޓްގާޑާއި، ކަމާ ގުޅުންހުރި އެހެނިހެން އިދާރާތައް ގުޅިގެން ކުރި މަސައްކަތުން އާދިއްތަ ދުވަހުގެ 14:08 އެހާއިރު ބޯޓު ފުންކުރެެވިފައިވާ ކަމަށެވެ.
ކ. ރަސްފަރި ފަރަކީ ހިމާޔަތްކޮށްފައިވާ ފަރަކަށްވާތީ ބޯޓު ފުންކުރެވުނުހާ އަވަހަކަށް ފަރަށް ލިބުނު ގެއްލުންތައް ބެލުމަށް ސަރވޭތައް ފަށާނެ ކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އިން ބުނެފައިވެއެވެ. ބޯޓު ފުންކުރުމުގެ ކުރިން ވެސް މަތިން ފަރަށް ލިބުނު ގެއްލުން ބަލާފައިވާކަމަށް އީޕީއޭއިން ބުނެފައިވެއެވެ. އަދި ފަރަށް ލިބުނު ގެއްލުން ބަލައި، ބޮޑު އަދަދަކުން ބޯޓުގެ ވެރިފަރާތް ޖޫރިމަނާ ކުރާނެ ކަމަށް އީޕީއޭއިން ބުނެފައިވެއެވެ. ސަރވޭގެ ކުރިން ބޯޓު ފުރަން އެދޭނަމަ ޑިޕޮޒިޓެއްގެ ގޮތުގައި 100 މިލިއަން ރުފިޔާ ނަގާނެ ކަމަށް އީޕީއޭއިން ބުނެފައިވެއެވެ.
މި ހާދިސާ ހިނގުމުގައި ބޯޓުގެ ކެޕްޓަންގެ ވަރަށް ބޮޑު އިހުމާލެއް އޮތްކަން ފާހަގަކުރެވުނު ކަމަށް މި ހާދިސާ ހިނގި ގޮތް ތަހުގީގުކުރުމުގައި ހަރަކާތްތެރިވި ޓްރާންސްޕޯޓް މިނިސްޓްރީީގެ ޑެޕިއުޓީ މިނިސްޓަރ ހަމަދު އަބްދުލްޣަނީ ވިދާޅުވިއެވެ. މި ބޯޓަކީ އިންޑިޔާގެ ސޫތުކުޅިން ފުރައިގެން ދެކުނު އެފްރިކާއަށް ދަތުރުކުރަމުންދިޔަ ބޯޓެކެވެ. މި ބޯޓު ފަރަށް އެރީ ބޯޓުގެ އިންޖީނުގެ ޔުނިޓު ތިނެއްގެ ހޫނުމިން މަތިވުމުން އިންޖީނު ނިއްވާލުމުގެ ސަބަބުން އުޅަނދު އޮޔާ ގޮސްގެން ކަމަށް މިހާތަނަށް ހޯދުނު ހޯދުންތަކުން ދައްކައެވެ.
އުޅަނދު ފަރަށް އެރުމުން ސަލާމަތްކުރުމަށް އުޅަނދުގެ ކެޕްޓަން ކުރަންޖެހޭ ކަންކަން ކޮށްފައިނުވާކަމަށާއި، މިފަދަ މައްސަލައެއް ދިމާވިކަން އަންގާފައިނުވާކަމާއި، އަދި ކެޕްޓަންގެ ހައިސިއްޔަތުން އަޅަންޖެހޭ ފިޔަވަޅުތައް އަޅާފައި ނުވާކަން ފާހަގަވި ކަމަށް ޓްރާންސްޕޯޓް މިނިސްޓްރީން ބުނެއެވެ. ވަކިން ޚާއްސަކޮށް ނަގިލިލުން ފަދަ ކަމެއް ވެސް ކޮށްފައިނުވާ ކަމަށާއި، އަދި އެހީއަށް ވެސް އެދިފައިނުވާކަމަށް ހަމަދު ވިދާޅުވިއެވެ.
