ލީކުވެފައިވާ، ފަނޑިޔާރުގެ އޯޑިއޯގެ މައްސަލައާ ގުޅިގެން މަޖިލީހުގެ އިދިކޮޅު މެންބަރުންގެ އިހުތިޖާޖެއް

ލީކުވެފައިވާ, ފަނޑިޔާރުގެ އޯޑިއޯގެ މައްސަލައާ ގުޅިގެން އެކަން ބެލުމަށް ގޮވާލައި، ރައްޔިތުންގެ މަޖިލީހުގައި އިދިކޮޅު މެންބަރުން އިހުތިޖާޖުކުރައްވައިފިއެވެ.

ލީކުވެފައިވަނީ މަނީ ލޯންޑަރިންގގެ ކުށް ސާބިތުވެ، 5 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީންގެ ފަރާތުން އެ ހުކުމް ސުޕްރީމް ކޯޓުގައި އިސްތިއުނާފު ކޮށްފައިވާއިރު، އިސްތިއުނާފު މައްސަލަ ތާވަލުކުރިތަނާ ޔާމީނަށް ހުކުމް ކުރެއްވި ފަނޑިޔާރަކާގުޅޭ އޯޑިއޯއެކެވެ.

އެ މައްސަލަ ބެއްލެވި 5 ގާޒީންގެ ބެންޗުގައި ހިމެނިވަޑައިގެންނެވި ގާޒީ ޙުސައިން ފާއިޒް ރަޝާދުކަމަށް ބުނާ ބޭފުޅަކު ވާހަކަ ދައްކަވާ މި އޯޑިއޯގައި އޭނާ ވަނީ ޔާމީނަށް ކޯޓުން ހުކުމް ކުރީ ގާޒީން "ރަހީނުކޮށްގެން"ކަމަށް ދޭހަވާ މޭރުމުން ވާހަކަ ދައްކަވާފައެވެ. އޭނާ ވަނީ ސިޔާސީ މީހުންގެ މައްސަލަ ބެލުމަކީ ފާޑެއްގެ ކަމެއް ކަމަށް ވިދާޅުވެ, ނުހައްގުން ހުކުމެއް ކޮށް ޖަލުގައި ދުވަސްތައް ހޭދަކުރަން ޖެހުމަކީ ރައީސް ޔާމީނަށް އޮންނަ ތާއީދު ވެސް އިތުރުވެގެން ހިނގައިދާނެ ކަމެއްކަމަށް ވިދާޅުވެފައެވެ.

މި އޯޑިއޯއަކީ ސައްހަ އޯޑިއޯއެއް ނޫންކަން އެކަމުގެ މައުލޫމާތު އެނގޭ ފަރާތަކުން ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ. އޭނާ ވިދާޅުވާ ގޮތުގައި މި އޯޑިއޯއަކީ ރައީސް ޔާމީނުގެ މައްސަލަ ތާވަލުކުރުމުން އެކަމުގެ ފޯކަސް ބަދަލުކޮށްލުމަށާއި، ޝަރީޢަތަށް ނުފޫޒު ފޯރުވުމުގެ ގޮތުން ބަޔަކު އަޑީގައި ތިބެގެން އުފައްދާފައިވާ އޯޑިއޯއެކެވެ.

މިކަމާ ގުޅިގެން ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ނައިފަރު ދާއިރާގެ މެންބަރު އަހުމަދު އަހުމަދު ޝިޔާމް ކުއްލި މައްސަލައެއް ހުށަހަޅުއްވާފައިވާއިރު، ކ. ރަސްފަރު ފަރަށް އެރި ޕެނަމާގެ އާގު ބޯޓާ ގުޅޭ ކުއްލި މައްސަލައެއް ހޯމަ ދުވަހުގެ ޖަލްސާއަށް މަކުނުދޫ ދާއިރާގެ މެމްބަރު މުހައްމަދު ރާއީ ވަނީ ހުށަހަޅުއްވައިފައެވެ.

މަޖިލީހުގެ ގަވައިދު ބުނާގޮތުން އެއް ޖަލްސާއަކަށް ދެ ކުއްލި މައްސަލަ ހުށަހަޅައިފިނަމަ ބަހުސް ކުރާނީ ގުރުއަތުން ދިމާވާ މައްސަލައަކަށެވެ. ގަވައިދާ އެއްގޮތަށް ގުރުއަތުލުމާއެކު ގުރުއަތުން ދިމާވެފައިވަނީ މެންބަރު ރާއީ ހުށަހެޅުއްވި ކުއްލި މައްސަލައަށް ބަހުސް ކުރުމަށެވެ. މި މައްސަލަ މަޖިލީހުން ވަނީ ބަލައިގެންފައެވެ.

މިއާއެކު އިދިކޮޅު މެންބަރުން އިހުތިޖާޖުކުރައްވައި މަޖިލީހުގެ ތަޅުމުގައި އަޑުގަދަ ކުރައްވައި މެންބަރުން ބަހުސް ކުރެއްވުމަށް ހުރަސްއެޅުމަށް މަސައްކަތް ކުރެެއްވިއެވެ. އިހުތިޖާޖުގައި މެންބަރުން މައިގަނޑު ގޮތެއްގައި ގޮވާލާފައިވަނީ ފަނޑިޔާރު ގެއަށް ސަރުކާރުން ނުފޫޒު ފޯރުވުން ހުއްޓުވައި ދިނުމަށެވެ.

އިދިކޮޅު މެންބަރުންނަށް ރައްދު ދިނުމުގެ ގޮތުން ސަރުކާރަށް ނިސްބަތްވެވަޑައިންނަވާ މެންބަރުން ވަނީ ނިޒާމީ ނުކުތާ ނަންގަވައި، އެއީ އިދިކޮޅުން ބަޔަކަށް ފައިސާ ދީގެން ކުރުވި ކަމެއް ކަމަށް ތުހުމަތު ކުރައްވާފައެވެ.

މި މައްސަލަ ހޫނުވެ، މަޖިލީސް ކުރިއަށް ނުގެންދެވުމާއެކު ރިޔާސަތުގައި އިންނެވި ވިލުފުށި ދާއިރާގެ މެންބަރު ހަސަން އަފީފް ވަނީ ޖަލްސާ ދިހަ މިނެޓަށް މެދުކަނޑުއްވާލައްވާފައެވެ.