ފެނުނީ ނުރައްކާތެރި އެއްޗެއް ނޫން: އެމްއެންޑީއެފް
ޓޫރިޒަމް މިނިސްޓްރީއަށް ގޮތް ނޭނގޭ އެއްޗެއް ލިބުނީ މިއަދު ހެނދުނު
ވެލާނާގެ
ޓޫރިޒަމް މިނިސްޓްރީން ފެނުނު އެއްޗަކީ ނުރައްކާތެރި އެއްޗެއް ނޫންކަން ޔަގީންކޮށް، އެ އެތި ފުލުހުންނާ ހަވާލުކޮށްފިއެވެ.
އާދިއްތަ ދުވަހުގެ ހެނދުނުގެ ވަގުތެއްގައި އެ މިނިސްޓްރީއަށް ވަނީ ގޮތްނޭނގޭ ޕާރުސަލެއް ލިބިފައެވެ. އެ ޕާރުސަލް ލިބުމާއެކު އެމްއެންޑީއެފަށް އެކަން ރިޕޯޓުކޮށްފައިވެއެވެ. އަދި އެމްއެންޑީއެފްގެ ބޮމްބް ސްކޮޑުން ހަރަކާތްތެރިވާން ފެށިއެވެ.
މިކަމާ ގުޅިގެން އެމްއެންޑީއެފުން ބުނީ ޓޫރިޒަމް މިނިސްޓްރީން ފެނުނު ގޮތް ނޭންގޭ އެއްޗަކީ އެއްވެސް ގެއްލުމެއް އޮތް އެއްޗެއް ނޫން ކަމަށެވެ. އެކަން ޔަގީންކުރުމަށްފަހު އެ އެތި ފުލުހުންނާ ހަވާލުކޮށްފައިވާކަމަށް އެމްއެންޑީއެފުން ބުނެފައިވެއެވެ.
އެކަމާ ގުޅޭ އިތުރު ތަފްސީލެއް އެމްއެންޑީއެފުން ހާމަކޮށްފައެއް ނުވެއެވެ. އެމްއެންޑީއެފުން ވަނީ ގޮތް ނޭނގޭ ތަކެއްޗާ ހަވާލުނުވުމަށް އިލްތިމާސްކޮށްފައެވެ.
މެއި 6 ގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓް ޙަމަލާއަށްފަހު، ޚާއްސަ އިސްކަމެއް ދީގެން މިފަދަ ކަންކަން އެމްއެންޑީއެފުން ގެންދަނީ ބަލަމުންނެވެ. އެގޮތުން މާލޭގެ ރަށްދެބައިމަގުގައި ހުންނަ ބިހުރޯޒުކަމަނާ މިސްކިތުގެ ތެރޭގައި ގޮތްނޭނގޭ އެއްޗެއް އޮވެގެން ދާދި ފަހުން ސިފައިން އެ ސަރަޙައްދު ބަލާފައިވާއިރު، ސުޕްރީމް ކޯޓު ސަރަޙައްދުގައި އޮތް ކާރެއް ފެނިގެން ވެސް ސިފައިން ހަރަކާތްތެރިވެފައިވެއެވެ. ނަމަވެސް އެ ދެ ފަހަރުވެސް ގެއްލުމެއްވާ ޒާތުގެ އެއްޗެއް ފެނިފައެއް ނުވެއެވެ.
އޭގެ އިތުރުން، މެއި 6 ގެ ޙަމަލާއާ ގުޅިގެން ގްރޭޓަރ މާލެ ސަރަޙައްދުގެ އިތުރުން، މުޅި ރާއްޖޭގެ ސެކިއުރިޓީ ވަރުގަދަކޮށް ސިފައިން ހަރަކާތްތެރިވަމުންދެއެވެ. ވަކިން ޚާއްސަކޮށް އެއާޕޯޓުގެ ސެކިއުރިޓީ އިތުރަށް ވަނީ ވަރުގަދަކޮށްފައެވެ.
