އަފްޣާނިސްތާނުގެ ކާބުލް އެއަރޕޯޓަށް އިތުރު ހަމަލާތަކެއް އަމާޒުވުން ގާތްކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.

ބައިޑެން އެހެން ވިދާޅުވީ އަފްޣާނިސްތާނުން ފައިބަން ބޭނުންވާ މީހުން ބޭލުމުގެ މަސައްކަތް ކާބުލް އެއަރޕޯޓުގައި ހިނގަމުންދަނިކޮށް ކާބުލް އެއަރޕޯޓު ބޭރުގައި ޖާނުންފިދާވެގެން ދިން ބޮމުގެ ހަމަލާ އާއި ބުރާސްފަތި ދުވަހު ދިން ބަޑީގެ ހަމަލާތަކެއްގައި އެމެރިކާގެ 13 ސިފައިންނާއި އާންމުންގެ ގިނަ ބަޔަކު މަރުވެފައިވާ ދަނޑިވަޅެއްގައެވެ.

ބައިޑެން ވިދާޅުވީ، އެއަރޕޯޓު ސަރަހައްދުގައި އިތުރު ހަމަލާއެއް އަމާޒުވާން އުޅޭކަމުގެ މައުލޫމާތުތަކެއް ލިބިވަޑައިގެންފައިވާ ކަމަށެވެ. އެމެރިކާގެ ސްޓޭޓް ޑިޕާޓްމަންޓުން ވެސް މިހާރު ވަނީ އެ ސަރަހައްދުގައި ދިރިއުޅޭ އެންމެން އެ ސަރަހައްދުން ދުރަށް ދިއުމަށް އިލްތިމާސް ކޮށްފައެވެ.

ބުރާސްފަތި ދުވަހު ކާބުލް އެއަރޕޯޓަށް ދިން ހަމަލާގެ ޒިންމާ އައިއެސްގެ ޚުރާސަން ގްރޫޕުން ނަގާފައިވާއިރު، އެމެރިކާއިން ވެސް ވަނީ ބަދަލު ހިފުމުގެ ގޮތުން ޑްރޯން ހަމަލާތަކެއް އިރުމަތީ އަފްޣާނިސްތާނަށް އަމާޒުކޮށް ދީފައެވެ. މި ހަމަލާތަކުގައި ޚުރާސަން ޕްރޮވިންސްގެ އިސް 2 މީހަކު މަރާލާފައިވާކަމަށް ބީބީސީގައި ރިޕޯޓު ކޮށްފައިވެއެވެ. އަދި ކުރިއަށް އޮތް ތަނުގައި ވެސް މި ހަމަލާތަކުގެ ބަދަލު ހިއްޕަވާނެ ކަމުގެ އިންޒާރު ރައީސް ޖޯ ބައިޑެން ވަނީ ދެއްވާފައެވެ.

އައިއެސްގެ ޚުރާސަން ޖަމާއަތަކީ އެމެރިކާ އާއި ޠާލިބާނުންނާ ވެސް ދެކޮޅު ޖަމާއަތެކެވެ. މި ޖަމާއަތް އަފްޣާނިސްތާނުގައި އުފެދިފައިވަނީ 2015 ވަނަ އަހަރުއެވެ. މިއީ ޠާލިބާން ޖަމާއަތުގެ ތެރެއިން އެޖަމާއަތާ ހިތްހަމަ ނުޖެހިފައިތިބި ހަނގުރާމަވެރިން ބޭނުންކޮށްގެން އައިއެސްއިން އެ ސަރަހައްދުގައި އުފައްދާފައިވާ ޖަމާއަތެކެވެ.