ކޮވިޑް-19ގެ ކޭސްތަކާއެކު މަހިބަދޫ މޮނިޓަރިންއަށް!

އދ.މަހިބަދޫއިން ކޮވިޑް-19ގެ ކޭސްތަކެއް ފެނުމާއި ގުޅިގެން އެރަށް މޮނިޓަރިންއަށް ލައިފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ކޮވިޑު-19 އާ ގުޅިގެން، ސިއްހީ ގޮތުން އިތުރަށް ބަލަންޖެހޭ ކަންކަން ބެލުމަށް މަހިބަދޫ 28 އޮގަސްޓްވީ ހޮނިހިރު ދުވަހުގެ ހެނދުނު 8:48 ގައި މޮނިޓަރިންގެ ހާލަތަށް ގެނެސްފައިވާ ކަމަށެވެ.

އެޗްޕީއޭއިން ބުނީ ކޮވިޑް-19އިން ރައްކާތެރިކުރުމަށް "އާންމު ސިއްހަތު ރައްކާތެރިކުރުމުގެ ގާނޫނުގެ" ގެ 12 ވަނަ މާއްދާގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިފައިވާ ގާނޫނީ އިޚްތިޔާރުތަކުގެ ތެރެއިން، މިކަން ކުރީ އިތުރަށް ބަލަންޖެހޭ ކަންކަން ބެލުމަށް ކަމަށެވެ. އަދި ވަކިގޮތެއް އަންގަންދެން އެ ރަށުން ފޭބުމާއި، ހުއްދަނެތި އެއްވެސް މީހަކު އެރަށަށް އެރުން މަނާވާނެ ކަމަށް އެޗްޕީއޭއިން ބުނެއެވެ.

އެޗްޕީއޭއިން ބުނީ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަންގާ އެންގުންތަކާއި އަދި ހިންގާ ހަރަކާތްތަކަށް އެއްބާރުލުން ދިނުމަށް އެދޭ ކަމަށެވެ.

މަހިބަދޫ ކައުންސިލުން ބުނީ މިމަހުގެ 24 ވީ އަންގާރަ ދުވަހު ފްލޫ ކްލިނިކުން ނެގި ސާމްޕަލެއް ޕޮޒިޓިވްވެފައިވާ ކަމަށެވެ. ކޮންޓެކްޓް ޓްރޭސިންގެ މަސައްކަތްތައް ކުރަމުންދާއިރު، ޑައިރެކްޓް ކޮންޓެކްޓުންގެ ގޮތުގައި ފާހަގަކުރެވުނު އިތުރު ދެމީހުން ބައްޔަށް ޕޮޒިޓިވްވެފައިވާ ކަމަށް ކައުންސިލުން ބުނެއެވެ. ބަލި ފެތުރިފައިވާ މިންވަރު ދެނެގަތުމަށް ކައުންސިލުން ދަނީ މަސައްކަތް ކުރަމުންނެވެ. އެހެންކަމުން މިދަނޑިވަޅުގައި އާއްމު ރައްޔިތުންގެ އެއްބާރުލުން ބޭނުންވާ ކަމަށާއި، ބަލިން ރައްކާތެރިވުމަށް އަޅާފައިވާ ހުރިހާ ފިޔަވަޅުތަކާއި އެއްގޮތަށް އަމަލުކުރުމަށް ކައުންސިލުން އިލްތިމާސްކޮށްފައިވެއެވެ.

މިއީ މަހިބަދޫ މޮނިޓަރިންގެ ހާލަތަށް ގެނައި ތިން ވަނަ ފަހަރެވެ.