ސަލާމަތީ ބާރުތައް ގުޅިގެން އިންޓެލިޖެންސްގެ އޮނިގަނޑު ހަރުދަނާކުރުމަށް ދަނީ މަސައްކަތް ކުރަމުން - ރައީސް
އިންޓެލިޖެންސްގެ އޮނިގަނޑަށް ބަދަލުގެނެސް މިކަމުގެ މަޢުލޫމާތު 17 އޯގަސްޓްގައި ވަނީ ހިއްސާކުރައްވާފައި
ދިވެހި ސިފައިންގެ 67 ވަނަ އަސާސީ ތަމްރީން ފުރިހަމަކުރި ސިފައިން ހުވާކުރުމަށް ބޭއްވި ރަސްމިއްޔާތު
ސަލާމަތީ ބާރުތައް ގުޅިގެން އިންޓެލިޖެންސްގެ އޮނިގަނޑު ހަރުދަނާކުރުމަށް ދަނީ މަސައްކަތް ކުރަމުންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ދިވެހި ސިފައިންގެ 67ވަނަ އަސާސީ ތަމްރީން ފުރިހަމަކުރި ސިފައިން ހުވާކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ވަނީ ދިވެހި ސިފައިންނަކީ މި ޤައުމުގެ އެންމެ ޝަރަފުވެރި އެއް މުއައްސަސާގެގޮތުގައި ސިފަކުރައްވާފައެވެ. އެގޮތުން ދިވެހި ސިފައިިން ޤައުމުގެ ރައްކާތެރިކަން ކަށަވަރުކުރުމާއި ރައްޔިތުންނަށް ޚިދުމަތްކޮށްދިނުމުގައި ގެންގުޅޭ އުސޫލުތަކަކީ ތަޢުރީފު ހައްޤު އުސޫލުތަކެއްކަމެއްކަމަށް ވިދާޅުވިއެވެ.
މިހާރުގެ ފިކުރީ އޮއިވަރު ބަދަލުވަމުންދާގޮތުން ސިފައިންނަށްވެސް ގިނަ ގޮންޖެހުންތަކެއް ކުރިމަތިވަމުންދާކަން ފާހަގަކުރައްވައި ރައީސް ވަނީ ދިވެހި ސިފައިންނަކީ މި ހުރިހާ ކަމަކަށް ލޯ ހުޅުވި, ޤައުމުގެ އަމަންއަމާންކަން ދެމެހެއްޓުމަށް ޤާބިލު ބަޔަކަށް ވުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އަދި ވަކިން ޚާއްސަކޮށް ޔުނީފޯމްއެޅި އެންމެ ސިފައިންގެ މީހަކު ޤަވައިދުތަކާއި ޚިލާފުވިޔަސް އެކަމުގެ ހިތި މުޅި މުއައްސަސާއަށް އުފުލަންޖެހޭނެކަން ހަނދާންކޮށްދެއްވިއެވެ.
ޒަމާނަށް އަންނަމުންދާ ބަދަލުތަކާއެކު އަމާޒުވާ ހަމަލާތައް ބަދަލުވަމުންދާކަން ރައީސް ފާހަގަކުރެއްވިއެވެ. އެގޮތުން ޓެރަރިޒަމްގެ ނުރައްކާ ބޮޑުވެފައިވާ މި ދަނޑިވަޅުގައި ސަލާމަތީ ބާރުތަކުގެ އިންޓެލިޖެންސް ނިޒާމު ވަރުގަދަކުރަން ޖެހޭކަމަށް އެމަނިކުފާނު ވިދާޅުވިއެވެ. މި އަމާޒުގެ ދަށުން ސަލާމަތީ ބާރުތަކުން ޚިދުމަތް ދިނުމުގައި, އެކުގައި މަސައްކަތްކޮށް އިންޓެލިޖެންސްގެ މަޢުލޫމާތު ފަސޭހައިން ޙިއްސާކުރުމަށް ބާރު އެޅުއްވިއެވެ. މި ވަގުތުވެސް މި އަމާޒަށް މަސައްކަތް ކުރަމުންދާކަން ފާހަގަކުރައްވައި, ރައީސް ވަނީ ޓެރަރިޒަމް ހުއްޓުވުމުގެ ޤާނޫނުގެ ދަށުން އިންޓެލިޖެންސްގެ އޮނިގަނޑަށް ބަދަލުގެނެސް މިކަމުގެ މަޢުލޫމާތު 17 އޯގަސްޓްގައި ހިއްސާކުރައްވާފައިވާކަމަށް ވިދާޅުވިއެވެ. އަދި ސަލާމަތީ ބާރުތައް ގުޅިގެން އިންޓެލިޖެންސްގެ އޮނިގަނޑު ހަރުދަނާކުރުމަށް މަސައްކަތް ކުރަމުންކަމަށް އެމަނިކުފާނު ވިދާޅުވިއެވެ.
ރައީސް ވަނީ ސިފައިންގެ ޚިދުމަތް ފޯރުކޮށްދިނުމުގައި ސިޔާސީ ނުފޫޒުން އެއްކިބާވެ، ހުރިހާ ރައްޔިތުންނަށް ހަމަހަމަ ކަންމަތީ ޚިދުމަތް ކުރުމުގައި ދެމިތިބުމަށް ގޮވާލައްވާފައެވެ. އަދި ސިފައިންނަކީ ޤައުމަށް ދިމާވާ ކުޑަ, އަދި ބޮޑު ކޮންމެ ކަމެއްގައިވެސް އެންމެ އިސް ސަފުގައި ހަރަކާތްތެރިވާ މުއައްސަސާކަމަށްވާއިރު ކުރިމަގުގައިވެސް މިގޮތުގައި ދެމިއޮންނާނެކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.
