ޖޭޕީ އޮފީހު ބޭރުގައި "ޞާލިހު ޕާޓީ" އާއި "އެމްއެމްޕީ" ޖެހި މައްސަލަ ސުލޫކު ކޮމިޓީން ބެލުމަށް ނިންމައިފި

ރަައްޔިތުންގެ މަޖިލީހުގެ އިދާރާގައި ހުންނަ ޖުމްހޫރީ ޕާޓީގެ އޮފީހުގެ ބޭރުގައި "ޞާލިޙު ޕާޓީ" އަދި "އެމްއެމްޕީ" ނުވަތަ މޯލްޑިވްސް މިލިޓަރީ ޕާޓީ ލިޔެފައިވާ ކަރުދާސްގަަނޑެއް ތަތްކުރި މައްސަލަ ބެލުމަށް މަޖިލީހުގެ އިމްތިޔާޒު އަދި ސުލޫކީ ކޮމިޓީން ނިންމައިފިއެވެ.

ޖުމްހޫރީ ޕާޓީގެ އޮފީހުގެ ބޭރުގައި އެހެން ނަމެއް ތަތްކުރި މައްސަލައިގައި ޖުމްހޫރީ ޕާޓީގެ ފަރާތުން ވަނީ މަޖިލީހުގެ އިދާރާއަށް ސިޓީއެއް ފޮނުވާފައެވެ. އެކަމާގުޅިގެން ކޮމިޓީގެ ބައްދަލުވުމެއް ބުދަ ދުވަހު ވަނީ ބާއްވާފައެވެ. ކޮމިޓީގެ ބައްދަލުވުމުގައި މުޤައްރިރު, ކުޅުދުއްފުށި އުތުރު ދާއިރާގެ މެމްބަރު ޔާސިރު ޢަބްދުއްލަޠީފް ވަނީ މިސިޓީ އިއްވަވާފައެވެ.

Advertisement

ސިޓީގައި ބުނެފައިވަނީ ރައްޔިތުންގެ މަޖިލީހުގެ އިދާރާގެ ތެރެއިން ޖުމްހޫރީ ޕާޓީއަށް ދޫކޮށްފައިވާ އޮފީސް ކޮޓަރީގައި ހުންނަ އެޕާޓީގެ ނަން ބޯޑުގައި އެހެން ނަމެއް ކަރުދާހުގައި ލިޔެ ހިއްޕާފައިވާ މައްސަލައަކީ ޖޭޕީ އާއި ޖޭޕީއަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ މެމްބަރުންގެ އިމްތިޔާޒުތަކަށް އުނިކަން ގެނެސްދީ ޕާޓީގެ ޕާލަމެންޓަރީ ގްރޫޕްގެ މެމްބަރުންގެ ހުރުމަތް ކެނޑުމަށް ކޮށްފައިވާ ވަރަށް ހަޑިމުޑުދާރު ޢަމަލެއް ކަމުގައެވެ. މަޖިލީހުގެ ގަވާއިދުގައި މަޖިލީހުގެ ޙުރުމަތާއި ޤަދަރު ހިފެހެއްޓުމަކީ މަޖިލީހުގެ ރައީސްއަށް މަތިކޮށްފައިވާ ޒިންމާއެއްކަމަށް ވީހިނދު އެމައްސަލަ ހިނގައިދިޔަ ގޮތް މަޖިލީހުން ކަނޑައަޅާފައިވާ އުސޫލުން ބައްލަވައި ދެއްވުމަށާއި މިފަދަ އަމަލުތައް ތަކުރާރުވިޔަ ނުދިނުމަށް އަޅަންޖެހޭ އެންމެހާ ފިޔަވަޅުތައް އެޅުމަށް އެދޭކަމަށެވެ.

އަދި މިއަމަލު ހިންގި ފަރާތެއް ހޯދުމަށް ޖޭޕީގެ ޕާލަމަންޓްރީ ގްރޫޕުން ކުރިޔަށް ގެންދާ މަސައްކަތުގެ ބޭނުމަށް ސީސީޓީވީ ފުޓޭޖް ފޯރުކޮށްދިނުމަށްވެސް ޖޭޕީން ވަނީ ސިޓީގައި އެދިފައެވެ.

ޖޭޕީގެ ސިޓީއާ ގުޅިގެން ރައްޔިތުންގެ މަޖިލީހުގެ ރައީސް ވަނީ މަޖިލީހުގެ އިދާރާއަށް މިކަން ބައްލަވައިދިނުމަށް އެދި ސިޓީއެއް ފޮނުއްވާފައެވެ.

މިމައްސަލާގައި ކޮމިޓީގެ މެމްބަރުންގެ ދެއްކެވި ވާހަކަފުޅުގައި މިކަމަކީ ސީރިޔަސް މައްސަލައެއްގެ ގޮތުގައި ކޮމިޓީން ބަލަންޖެހޭ މައްސަލައެއްގެ ގޮތުގައި ފާހަގަކުރެއްވިއެވެ. އަދި މުސްތަގުބަލުގައި މިފަދަ ކަމެއް ތަކުރާރުވިޔަ ނުދިނުމަށްވެސް މިމައްސަލަ ބެލުމުގެ މުހިންމުކަން މެމްބަރުން ވަނީ ފާހަގަކުރައްވާފައެވެ. މިކަމަކީ މަޖިލީހުގެ އިދާރާއާއި މެމްބަރުންގެ ގަދަރަށް އުނިކަން ލިބޭ ކަމެއްކަމަށް މެމްބަރުން ވަނީ ވިދާޅުވެފައެވެ.

ނަމަވެސް ސީސީޓީވީ ފުޓޭޖް ޖުމްހޫރީ ޕާޓީއަށް ލިބޭނެ ގޮތަށް އެދިފައިވާ އެދުމާމެދު މެމްބަރުންގެ މެދުގައި ވަނީ ޚިޔާލު ތަފާތުވެފައެވެ. އެއީ މަޖިލީހުގެ ސަލާމަތާވެސް ގުޅުންހުރިކަމަކަށްވާތީ ފުޓޭޖް ފޯރުކޮށްދިނުމަކީ އެންމެ އެދެވޭ ގޮތް ނޫންކަމަށް ބައެއް މެމްބަރުން ވިދާޅުވިއެވެ.

މިމައްސަލަ މުޅި ކޮމިޓީން ބެލުމަށް ތިނަދޫ ދެކުނު ދާއިރާގެ މެމްބަރު ޢަބްދުﷲ ސަނީފް ވަނީ ހުށަހަޅުއްވާފައެވެ. އަދި މިހުށަހެޅުމަށް މަޑުއްވަރީ ދާއިރާގެ މެމްބަރު އާދަމް ޝަރީފް ވަނީ ތާއީދުކުރައްވާފައެވެ. ކޮމިޓީން ފާސްކޮށްފައިވަނީ ވަކި މައްސަލައެއްގެ ގޮތުގައި މިމައްސަލަ އެޖެންޑާކޮށް މިކަން ހިނގާދިޔަ ގޮތް ކޮމިޓީން ބެލުމަށެވެ.

މަޖިލީހުގެ އިދާރާއިން ކޮންމެ ސިޔާސީ ޕާޓީއަކަށް އޮފީހެއް ދޫކޮށްފައި ހުންނައިރު ޖޭޕީއަށްް ދޫކޮށްފައިވާ އޮފީހުގެ ބޭރުގައި "ޞާލިޙު ޕާޓީ" އަދި "އެމްއެމްޕީ" ލިޔެފައިވާ ކަރުދާސްގަނޑެއް ތަތްކޮށްފައި ހުއްޓާ ފެނުނީ ޖުލައި މަހުގެ 7 ވަނަ ދުވަހުއެވެ. އެދުވަހުގެ ޖަލްސާ އަކީ މަޖިލީހުގެ ސުޕަރ މެޖޯރިޓީ އޮންނަ އެމްޑީޕީގެ ދެ ފެކްޝަނުގެ އަރައިރުން ބޮޑުވި ދުވަހެކެވެ.

އެ ކަރުދާސްގަނޑު ތަތްކުރީ ކޮންބައެއްތޯ ބެލުމަށް ސީސީޓީވީ ފުޓޭޖު ބަލައިދިނުމަށް ޖޭޕީން ވަނީ ހަމަ އެ ދުވަހު މަޖިލީހުގެ އިދާރާގައި އެދިފައެވެ.