"ކުރިއަށް އޮތް ރިވިއުގައި ޔޫކޭގެ އެމްބަރ ލިސްޓަށް ރާއްޖެ އަރާނެ"
25 އޯގަސްޓު 2021 | ބުދަ 09:59ރާއްޖެ ރެޑް ލިސްޓުން އުނިކުރެވި އެމްބަރ ލިސްޓަށް އަރާނެ ކަމަށް ލަފާކުރެވޭ
ރާއްޖެއަށް ދަތުރުކުރި ބްރިޓިޝް އެއަރވޭސްގެ ފްލައިޓެއް
އިނގިރޭސިވިލާތުގެ ސަރުކާރުން ދެން ހަދާ ޓްރެވަލް ރިވިއުގައި ޔޫކޭގެ އެމްބަރ ލިސްޓަށް ރާއްޖެ އަރާނެ ކަމަށް ލަފާކުރެވޭ ކަމަށް ކަމާގުޅޭ މާހިރުން ބުނެފިއެވެ.
ބޭރުގެ މީޑިއާތަކުން ރިޕޯޓުކޮށްފައިވާ ގޮތުގައި މިހަފްތާގެ ތެރޭގައި އިނގިރޭސި ސަރުކާރުން އެގައުމުގެ އައު ޓްރެވަލް ރިވިއުއެއް ހަދާނެއެވެ. އަދި މިރިވިއުގައި ރާއްޖެ ރެޑް ލިސްޓުން އުނިކުރެވި އެމްބަރ ލިސްޓަށް އަރާނެ ކަމަށް ލަފާކުރެވޭ ކަމަށް ވަނީ ބުނެފައެވެ. އަދި ރާއްޖޭގެ އިތުރުން ތުރުކީ ވެސް ޔޫކޭގެ އެމްބަރ ލިސްޓަށް އަރާނެ ކަމަށް މާހިރުން ދަނީ ބުނަމުންނެވެ.
މާހިރުން މިގޮތަށް ބުނެފައިވާއިރު، އިނގިރޭސިވިލާތުގެ ރައްޔިތުންނަށް ކަރަންޓީނު ނުވެ ދަތުރުކުރެވޭ ގައުމުތަކުގެ ތެރެއިން, ރެޑް ލިސްޓުގައި ރާއްޖެ ހިމެނެންޖެހޭ އެއްވެސް ސަބަބެއް މިހާރު ނެތްކަމަށް ދިވެހިރާއްޖޭން އިނގިރޭސިވިލާތަށް ކަނޑައަޅާފައި ހުންނަވާ ސަފީރު ޑރ. ފަރަޙަނާޒް ފައިޞަލް ވަނީ ވިދާޅުވެފައެވެ. އެގޮތުން އިނގިރޭސިވިލާތުން "ދަތުރުފަތުރުގެ ސަމާލު"ގެ ގޮތުގައި ކަނޑައަޅާ "ރެޑް ލިސްޓް"ގައި ރާއްޖެ ހިމަނާފައިވަނީ, އެ ގައުމެއްގައި ފެތުރެނީ ބަލީގެ ކޮން ވޭރިއެންޓެއްކަން ދެނެގަތުމަށް ހަދާ ޖިނޯމިކް ސީކުއެންސިން ޓެސްޓު ނުހަދާ އޮތުމުންކަމަށް އެޗްޕީއޭއިން މީގެ ކުރިން މައުލޫމާތުދިފައިވީ ނަމަވެސް މިހާރު އިނގިރޭސިވިލާތުން ބޭނުންވާ ޖީނޯމް ސީކުއެންސް ޑާޓާތައް ލިބެން ހުންނާނެކަން ޑރ. ފަރަޙަނާޒް ވަނީ ފާހަގަކުރައްވާފައެވެ.
ޑރ ފަރަޙަނާޒް ވަނީ ޖިސެއިޑް ވެބްސައިޓުގައި މިހާރު އެ މައުލޫމާތުތައް އަޕްޑޭޓް ކޮށްފައިވާ ކަމަށާއި ރާއްޖޭގައި މިވަގުތު ހުރި ކޮވިޑު ކޭސްތަކުގެ އަދަދު ވެސް ދަށްކަން ފާހަގަކުރައްވާފައެވެ. އަދި ގިނަ ގައުމުތަކާ އަޅާކިޔާއިރު ރާއްޖޭގެ ވެކްސިން ޖެހުމުގެ ރޭޓު ވެސް މަތި ކަމަށާއި އެހެންކަމާއެކު މިހާރު ޔޫކޭގެ ރެޑް ލިސްޓުގައި ރާއްޖެ އޮންނަންޖެހޭ ސަބަބެއް ނެތްކަމަށް ޑރ. ފަރަޙަނާޒް ވަނީ ވިދާޅުވެފައެވެ.
އިނގިރޭސިވިލާތަކީ ރާއްޖޭގެ ފަތުރުވެރިކަމުގެ ބޮޑު މާކެޓަކަށްވާއިރު، އެމްބަރ ލިސްޓަށް ރާއްޖެ ލެވި ރާއްޖެއަށް ދަތުރުކުރުމުގައި ހުރި ހުރަސްތައް އުވާލެވިއްޖެ ނަމަ އެގައުމުން ރާއްޖެއަށް އަންނަ ފަތުރުވެރިންގެ އަދަދު ބޮޑުތަނުން އިތުރުވެގެންދާނެއެވެ. އަދި މި އަހަރުގެ ނޮވެމްބަރު މަހު ލަންޑަން ގައި އޮންނަ ވޯލްޑް ޓްރެވަލް މާކެޓަށް ތައްޔާރުވުމުގެ މަސައްކަތްތައް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަނުން ކުރަމުން އަންނަ އިރު، އެމްބަރ ލިސްޓަށް ރާއްޖެ އަރައިފި ނަމަ ފެއަރ ގައި ބައިވެރިވެ ރާއްޖެ އާއި ރާއްޖޭގެ ފަތުރުވެރިކަމުގެ ވިޔަފާރިތައް އިޝްތިހާރުކުރުމުގެ ފުރުސަތު ފަސޭހަކަމާއެކު ލިބިގެންދާނެއެވެ.
