ކޮމިއުނިޓީ ސަރވިސްގެ މަސައްކަތުން ޖޫރިމަނާ ފައިސާ އުނިކުރެވޭނެ އުސޫލު ބަޔާންކުރުން މުހިއްމު- ގަވާއިދު ކޮމިޓީ
ކޮމިޓީ ރިޕޯޓުގައި ވަނީ ކަމާ ގުޅޭ މުއައްސަސާތަކާ ބައްދަލުކޮށް ބައެއް ބޭފުޅުންގެ ހިޔާލު ހޯއްދެވުމަށްފަހު ކޮމިޓީއަށް ފާހަގަކުރެވުނު ކަންކަން ހުށަހަޅާފައި
މި މައްސަލައަކީ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ މައްސަލަ
ކޮމިއުނިޓީ ސަރވިސްގެ މަސައްކަތުން ޖޫރިމަނާ ފައިސާ އުނިކުރެވޭނެ އުސޫލު ގަވާއިދުގައި ބަޔާންކުރުން މުހިންމުކަމަށް ރައްޔިތުންގެ މަޖިލީހުގެ ގަވާއިދު ކޮމީޓީން ބުނެފިއެވެ.
ޢުމުރުން 18 އަހަރު ފުރުމުގެ ކުރިން ޤާނޫނު ނަންބަރު 5/2009 (އެއްގަމު ދަތުރުފަތުގެ ޤާނޫނު) އާ ޚިލާފުވެފައި ފަރާތްތަކަށާއި، އެކި ސަބަބުތަކާ ގުޅިގެން ލައިސަންސް ނުނަގައި އެއްގަމު އުޅަނދުފަހަރު ދުއްވުމުގެ ސަބަބުން ޖޫރިމަނާކޮށްފައިވާ ފަރާތްތަކަށް ލުއި ހޯދައިދިނުމަށް އެދި ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ މައްސަލަ ގަވައިދު ކޮމިޓީން ވަނީ ދިރާސާކޮށްފައެވެ.
ކޮމިޓީ ރިޕޯޓުގައި ވަނީ ކަމާ ގުޅޭ މުއައްސަސާތަކާ ބައްދަލުކޮށް ބައެއް ބޭފުޅުންގެ ހިޔާލު ހޯއްދެވުމަށްފަހު ކޮމިޓީއަށް ފާހަގަކުރެވުނު ކަންކަން ހުށަހަޅާފައެވެ. އެގޮތުން ކޮމިއުނިޓީ ސަރވިސްގައި ބައިވެރިވެވޭނެ ޙާލަތްތަކާއި، އެކަމުގައި ޢަމަލުކުރާނެ އުސޫލުތަކާއި، ކޮމިއުނިޓީ ސަރވިސަސްގެ ގޮތުގައި ކުރެވިދާނެ މަސައްކަތްތަކާއި އެ މަސައްކަތް ކުރެވިދާނެ ތަންތަން ކަނޑައެޅުމަކީ މުހިއްމު ކަމެއް ކަމަށެވެ.
ކޮމިއުނިޓީ ސަރވިސްގެ މަސައްކަތުން ޖޫރިމަނާ ފައިސާ އުނިކުރެވޭނެ އުސޫލު ގަވާއިދުގައި ބަޔާންކުރުން އެއީ މުހިއްމު ކަމެއް ކަމަށާއި، ކޮމިއުނިޓީ ސަރވިސްގެ މަސައްކަތަށް ނުކުތުން ޝަރުޠުކުރެވުމާއެކު، އެ ފަރާތްތަކަށް ލައިސަންސްނެގުމަށް ހުރަހެއް ނޯންނާނެކަން ބަޔާންކޮށް، ނުދައްކައިވާ ޖޫރިމަނާގެ ފައިސާ ބަހާލައިގެން ދެއްކޭނެ އުސޫލެއް ބަޔާންކުރުމަކީ ބޭނުންތެރި ކަމެއް ކަމަށެވެ.
މީގެ އިތުރުން މުޖްތަމަޢަށް ފައިދާކުރަނިވި މަސައްކަތެއް ކުރާ ފަރާތުން މަސައްކަތް ކުރަންޖެހޭނީ މަސައްކަތްކުރާ އިދާރާއަކުން ކަނޑައަޅާފައިވާ އުސޫލުތަކާ އެއްގޮތަށްކަން ނުވަތަ ކޯޓުން ކަނޑައަޅާ ހަމަތަކެއްގެ މަތިންކަން ތަފްޞީލްކޮށް ގަވާއިދުގައި ބަޔާންކުރަން ވާނެ ކަމަށް ކޮމިޓީން ބުނެއެވެ. އަދި ގަވާއިދުގެ މޮނިޓަރިންގ ބޮޑީއެއް ގޮތަށް، މޮނިޓަރކޮށް ބެލެހެއްޓުމަކީ ސިޓީ ކައުންސިލުތަކާއި ރަށު ކައުންސިލުތަކުން މޯލްޑިވްސް އިންލަންޑް ރެވެނިއު އޮތޯރިޓީއާ ގުޅިގެން ފަސޭހައިން ކުރެވިދާނެކަމެއް ކަމަށް ޤަބޫލުކުރެވޭކަމަށާއި، އެއީ ކޮމިއުނިޓީ ސަރވިސްގެ މަސައްކަތަށް އެ ސިޓީއެއްގައި ނުވަތަ އެ ރަށެއްގައި އޮތީ ކޮންކޮން މަސައްކަތްތަކެއްކަމާއި، އެކި ތަފާތު ގިންތިތަކުގެ މަސައްކަތް ކައުންސިލަށް އެނގެން އޮންނާނެ ކަމަށެވެ.
މި ރިޕޯޓުގައި ފާހަގަކޮށްފައިވާ އިތުރު ކަންކަމަށް ބަލާއިރު ގަވާއިދުގެ ދަށުން ޚިދުމަތްކުރަން ޖެހިފައިވާ ފަރާތަކުން ޚިދުމަތް ފުރިހަމަނުކޮށް ނުވަތަ ޖޫރިމަނާ ވެސް ނުދައްކާ ޙާލަތުގައި ޢަމަލުކުރާނެ ގޮތް ގަވާއިދުގައި ބަޔާންވެފައި އޮތުމާއެކު ގަވާއިދުގެ ދަށުން މުޖްތަމައަށް ފައިދާ ކުރަނިވި މަސައްކަތެއް ކުރުމަށް، ޙަވާލުކުރެވޭނެ އެންމެ ހަގު އުމުރަކީ ކޮބައިކަން ގަވާއިދުގައި ބަޔާން ކުރަންވާނެ ކަމަށެވެ.
ކޮމިޓީން ބުނީ މި މައްސަލައާ ގުޅިގެން ކޮމިޓީއަށް ފާހަގަކުރެވުނު ކަންކަމަށް ރިއާޔަތްކޮށް ގަވާއިދު އެކުލަވާލައި އެ ގަވައިދަށް އަމަލުކޮށްދެއްވުމަށް އެދި ކަމާގުޅޭ މުއައްސަސާތަކަށް ދެންނެވުމަށް ފެންނަކަމަށް 8 ޖުލައިގައި ބޭއްވި އެ ކޮމިޓީގެ މި އަހަރުގެ 12 ވަނަ ބައްދަލުވުމުގައި އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ނިންމާފައިވާ ކަމަށެވެ.
