ރެހެންދި ޖަންބަލް ސޭލް 2017 މިއަދު ފަށާނެ
28 އެޕްރީލު 2017 | ހުކުރު 13:20މި ޖަންބަލް ސޭލް މިއަދުން ފެށިގެން އޭޕްރިލް 30 ވަނަ ދުވަހާއި ހަމައަށް ކުރިއަށް ދާނެ
ރެހެންދި ސްކޫލު
ރާއްޖޭގައި ދަރިވަރުންގެ އާބާދީ އެންމެ ބޮޑު އެއް ސްކޫލު ކަމަށްވާ ހުޅުމާލޭ ރެހެންދި ސްކޫލުން އިންތިޒާމްކޮށްގެން ކުރިއަށް ގެންދާ ޖަންބަލް ސޭލް ހުކުރު ދުވަހު ފަށާނެ އެވެ.
މިއީ ސްކޫލުގެ އެކި އެކި ހަރަކާތްތަކަށް ފަންޑްރައިޒް ކުރުމުގެ ގޮތުން ކުރިއަށްގެންދާ ސޭލްއެއް ކަމަށް ރެހެންދި ސްކޫލުއިން މައުލޫމާތުދެ އެވެ.
ސްކޫލުގެ ޓީޗަރުންނާއި ބެލެނިވެރިން ގުޅިގެން ކުރިއަށްގެންދާ މި ޖަންބަލް ސޭލް ހުކުރު ދުވަހުން ފެށިގެން އޭޕްރިލް 30 ވަނަ ދުވަހާއި ހަމައަށް ކުރިއަށްދާނެ ކަމަށާއި ކޮންމެ ދުވަހަކުވެސް ހަވީރު 4:00 އިން 18:00 އަދި 20:00 އިން 23:00 އަށް ސޭލް ކުރިއަށްދާނެ އެވެ.
މިސޭލްގައި ތަފާތު ގިނަ ބާވަތްތަކުގެ މުދާ އެއް ތަނަކުން ހެޔޮ އަގުގައި ލިބެން ހުންނާނެ ކަމަށް ރެހެންދި ސްކޫލުން މައުލޫމާތުދީފައިވެ އެވެ.
ރެހެންދި ސްކޫލުގައި ކުރިއަށްދާ މި ސޭލްގައި ކެންޓީނުގެ ޚިދުމަތްވެސް ލިބެން ހުންނާނެ ކަމަށާއި މިއީ ބެލެނިވެރިންނާއި ދަރިވަރުން އަދި ހުޅުމާލޭގައި ދިރިއުޅޭ ރައްޔިތުން ޒިޔާރަތްކޮށްލަން ވަރަށް ރަނގަޅު ޖަންބަލް ސޭލްއެއް ކަމަށްވެސް އެސުކޫލުން ބުންޏެވެ.
މީގެ ކުރިންވެސް ރެހެންދި ސްކޫލުން ވަނީ ތަފާތު ގިނަ ފަންޑްރައިޒިން ހަރަކާތްތައް ބާއްވާފައެވެ. އެގޮތުން 2016 ވަނަ އަހަރު ވަނީ ދެ ފަހަރެއްގެ މަތިން ޕީޓީއޭއިން އިންތިޒާމްކޮށްގެން އާންމުންގެ ބޮޑު ތަރުހީބަކާއި އެކު ނައިޓް މާރކެޓެއް ވެސް ބާއްވާފައެވެ.
