ފަޅުރަށްތައް ދޫކުރުމުގެ ބާރު ކައުންސިލްތަކަށް ލިބިދީފައިވާ ގޮތް ބަޔާންކުރާ ބިލު ކޮމިޓީއަށް
މިބިލް ސަރުކާރުގެ ފަރާތުން މަޖިލީހަށް ހުށަހަޅުއްވާފައިވަނީ ބާރަށު ދާއިރާގެ މެމްބަރ އަޙުމަދު ޢަބްދުﷲ
އަތޮޅުތަކުގެ ރަށްރަށް
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނައި އިސްލާހާ ތަޢާރަޒްވާ ކަންކަން ހުރުމާއެކު, ދިވެހިރާއްޖޭގެ ފަޅުރަށްރަށާބެހޭ ގާނޫނަށް އިސްލާހު ގެނައުމުގެ ބިލް ދިރާސާކުރުމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީއަށް ފޮނުވައިފިއެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި މި ބިލު މަޖިލީހުން ބަލައިގެންފައިވަނީ އެކަމަށްޓަކައި ނެގުނު ވޯޓުގައި ބައިވެރިވި 43 މެންބަރުންގެ އިއްތިފާގުންނެވެ.
ހޯމަ ދުވަހުގެ ޖަލްސާއަށް ސަރުކާރުގެ ފަރާތުން މި ބިލް ހުށަހަޅުއްވާފައިވަނީ ބާރަށު ދާއިރާގެ މެމްބަރު އަޙުމަދު ޢަބްދުﷲ އެވެ. ބިލް ހުށަހަޅުއްވަމުން މެންބަރު ވިދާޅުވީ, މި ބިލް ހުށަހަޅުއްވަނީ ކުރިން ގާނޫނު އޮތްގޮތުން ލާމަރުކަޒީ ގާނޫނަށް ގެނައި އިސްލާހުތަކާއި ގެނައި ބަދަލުތަކާ ފުށުއަރާ މާއްދާތަކެއް ގާނޫނުގައި ހުރުމުން, 2 ގާނޫނު އެއްގޮތްކުރުމަށް ކަމަށެވެ. އެގޮތުން ފަޅުރަށްރަށާބެހޭ ގާނޫނުގެ 13 މާއްދާއަކަށް އިސްލާހު ގެނައުމަށް ހުށަހަޅުއްވާކަމަށް މެންބަރު ވިދާޅުވިއެވެ.
އެ ބަދަލުތައް ގެންނަން ޖެހެނީ މިހާރު އަމަލުކުރަމުންދާ ލާމަރުކަޒީ ގާނޫނުގެ ދަށުން ކައުންސިލްތަކުގެ އިޚްތިޞާޞްގައިވާ ރަށްރަށުގެ ކަންކަން ކުރުމުގެ ބާރު ލިބިގެންވަނީ އެ ކައުންސިލަކަށް ކަމުގައިވާތީއެވެ. އަޙުމަދު ވިދާޅުވީ ގާނޫނަށް ގެނެވޭ ބަދަލުތަކުގެ ތެރޭގައި ކައުންސިލްތަކުގެ އިޚްތިޞާޞްގައި ހިމެނޭ ރަށްރަށް ވަރުވާއަށް ކުއްޔަށް ދިނުމާއި ވަކިކުރުމާ ގުޅޭގޮތުން ހިންގަންޖެހޭ ކަންކަން ކުރުމުގެ ބާރު ކައުންސިލްތަކަށް ލިބިދޭނެ ކަމަށެވެ. ހަމައެއާއެކު މިއިސްލާހު ގެނައުމުން, ދަނޑުވެރިކަމާބެހޭ ވުޒާރާއިން ކަނޑައަޅުއްވާ އުސޫލުތަކުގެ ތެރެއިން ރަށްރަށް ކުއްޔަށް ދިނުމުގެ ބާރު ކައުންސިލްތަކަށް ލިބިދޭނެ ކަމަށެވެ.
މީގެއިތުރުން ކުއްޔަށް ހިފާ ފަރާތަކުން ތިން ވަނަ ފަރާތަކަށް ރަށް ދޫކުރުމާއި އެކަމުގައި އަމަލުކުރަންވީ ގޮތް މި އިސްލާހުތަކުގެ ތެރޭގައި ހިމެނިގެންދާނެ ކަމަށް އޭނާ ވިދާޅުވިއެވެ. މިބިލަށް ބަހުސްކުރެއްވި ބައެއް މެމްބަރުން ވަނީ, އެ ރަށެއް ކައުންސިލްގެ އިޚްތިޞާޞުން ނެގުމުގެ ބާރު މިނިސްޓްރީއަށް ލިބޭ ގޮތަަށް ގާނޫނަށް ހުށަހަޅާފައިވާތީ ކަންބޮޑުވުން ފާޅުކުރައްވާފައެވެ.
އެގޮތުން އިންޑަސްޓްރިއަލް ބޭނުމަށް ދޫކުރަން ކަނޑައަޅާފައިވާ ފަޅުރަށަކީ ސިޓީއެއް ނުވަތަ ރަށެއްގެ އިޚްތިޞާޞްގެ ތެރޭގައި ހިމެނޭ ރަށަކަށް ވާނަމަ، އެ ރަށެއް ކައުންސިލްގެ އިޚްތިޞާޞުން ވަކި ކުރަން ޖެހޭނެ ކަމަށް ބަޔާންކޮށްފައިވާ މާއްދާގެ ސަބަބުން ކައުންސިލަށް ދޭން ޖެހޭ ބާރުތައް ހަނިވާ ކަމަށް އެ މެމްބަރުން ގަބޫލުކުރައްވައެވެ. އެއީ އެ އިސްލާހުގައި، ރަށްތައް އިޚްތިޞާޞުން ވަކިކުރާއިރު، ކައުންސިލްގެ ލަފާ ހޯދަން ޖެހޭނެ ކަމަށް ބަޔާންކޮށްފައިނުވާތީ ކަމަށް މެމްބަރުން ފާހަގަކުރެއްވިއެވެ.
