މާލެ އާއި ވިލިމާލެ އާއި ތިލަފުއްޓާއި ގުޅީފަޅު ގުޅުވައިލާ ބްރިޖު މަޝްރޫއުގެ އެއްބަސްވުމުގައި ތިލަމާލެ ބްރިޖް އެއްބަސްވުމުގައި އަންނަ ބުރާސްފަތި ދުވަހު ސޮއިކުރަން ނިންމައިފިއެވެ.

ރާއްޖެއެމްވީއަށް ޕްލޭނިންގ މިނިސްޓްރީން ބުނީ ބުރާސްފަތި ދުވަހު އެ މަޝްރޫއުގައި ސޮއިކުރުމުގެ ކަންތައްތައް ސަރުކާރުން ހަމަޖެއްސުމުގެ މަސައްކަތް ކުރަމުންދާ ކަމަށާއި އެއްބަސްވުމުގައި ސޮއިކުރުމަށް ހަމަޖެހިފައިވަނީ އިންޑިއާގެ އެފްކޮން އިންފްރާސްޓްރަކްޗާ ލިމިޓެޑާއެކު ކަމަށެވެ.

ސަރުކާރުން މި މަޝްރޫއުގައި ސޮއިކުރުމަށް ތައްޔާރުވަމުން އަންނައިރު ތިލަމާލެ ބުރިޖް އެޅުމަށް މިއީ އެންމެ ރަނގަޅު ވަގުތު ކަމަށް ފިނޭންސް މިނިސްޓަރު އިބްރާހީމް އަމީރު ވަނީ ވިދާޅުވެފައެވެ. ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުން މިނިސްޓަރު އަމީރު ވިދާޅުވީ، ކޮންމެ ދަރަންޏަކީ އެއް ހަަމައަކުން ގުނޭނެ ދަރަންޏެއް ނޫން ކަމަށާއި، އިންޑިއަން އެގްޒިމް ބޭންކުން ބްރިޖް އެޅުމަށް ނަގާ ލޯނަކީ، 5 އަހަރުގެ ގްރޭސް ޕީރިއަޑަކާއެކު 1.57 އިންސައްތަ އިންޓަރެސްޓާއެކު ލިބޭ ލޯނެއް ކަމަށެވެ. ލޯނު ދައްކަން ދީފައިވާ މުއްދަތަކީ 15 އަހަރު ކަމަށެވެ. މުޅިއެކު 20 އަހަރު ލޯނު ދައްކަން ލިބޭއިރު، މިއީ މާރކެޓްގައި ލޯނު ލިބޭ ރޭޓަށްވުރެ ވަރަށް ބޮޑު ލުއިތަކަކާއެކު ލިބޭ ލޯނެއްކަން މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވީ ކޮވިޑްގެ ހާލަތުގައި ރާއްޖޭގެ އިޤްތިޞާދު މިހާ ދަށްވެފައި އޮތް ވަގުތެއްގައި ދައުލަތަށް ބޮޑު އާމްދަނީއެއް ނުލިބޭއިރު މިވަގުތު ލުއި ގޮތަކަށް ފަންޑު ލިބި މަސައްކަތް ފަށައިގަތުމަށް މިއީ އެންމެ ރަނގަޅު ދަނޑިވަޅު ކަމުގައެވެ. ދައުލަތަށް އާމްދަނީ ލިބޭނެ އެހެން ދޮރުތައް ވަރަށް ބޮޑަށް ހަނިވެފައިވާ ދަނޑިވަޅެއްގައި މިއީ ރާއްޖޭގެ އިގްތިސާދަށް ވަރަށް ބޮޑު ބޫސްޓެއް ލިބޭނެ ބްރިޖެއްގެ ގޮތުގައި މިނިސްޓަރު ފާހަގަކުރެއްވިއެވެ.

ފަންޑް ލިބިފައި އޮތް ދަނޑިވަޅުގައި މަސައްކަތްކޮށް ނިންމާލުމުން، އިޤްތިޞާދު އާއްމު ހާލަތަށް ދާއިރު ހުރިހާ ކަމަކުން އަރައިގަތުމަށް މަސައްކަތް ކުރެވޭނެ ކަމަށް މިނިސްޓަރު ވިދާޅުވިއެވެ. ގްރޭޓަރ މާލެ ބްރިޖަކުން ގުޅިގެން ދިޔުމުން، ކޮމާރޝަލް ޕޯޓް ވެސް ފީސިބްލް އެއްޗަށްކަށް ބަދަލުވެގެންދާނެކަން މިހާރު ހެދިފައި ހުރި ދިރާސާތަކުން ދައްކާ ކަމަށް މިނިސްޓަރު ވިދާޅުވިއެވެ. ކޮމާރޝަލް ޕޯޓާއި ބްރިޖްގެ އިންވެސްޓްމެންޓަކީ، މިހާރު ފަށައިގަންނަން މުހިއްމު ކަމެއްގެ ގޮތުގަައި މިނިސްޓަރު ފާހަގަކުރެއްވިއެވެ. އަދި 100 މިލިއަން ޑޮލަރުގެ ހިލޭ އެހީވެސް ލިބިފައި އޮތް މި ދަނޑިވަޅުގައި މަސައްކަތް ފަށައިގަތުން އެއީ އަމާޒު ކަމުގައި މިނިސްޓަރު ވިދާޅުވިއެވެ.