އަންނަ އަހަރުގެ ރައްޔިތުންގެ މަޖިލީހުގެ ބަޖެޓަކީ 184.1 މިލިއަން ރުފިޔާކަމަށް އާންމު ކޮމިޓީން ފާސްކޮށްފިއެވެ.

އަންނަ އަހަރުގެ މަޖިލީހުގެ ބަޖެޓް ދިރާސާކުރުމަށް އާންމު ކޮމިޓީން ކުރިޔަށް ގެންދިޔަ ބައްދަލުވުންތައް ބާއްވާފައިވަނީ ސިއްރު ބައްދަލުވުންތަކެއްގެ ގޮތުގައެވެ. އެހެންކަމުން ބަޖެޓްގެ ތަފްސީލީ މައުލޫމާތުތަކެއް ސާފެއްނުވެއެވެ. ބަޖެޓް ފާސްކުރުމަށް އާންމު ކޮމިޓީން ހޯމަ ދުވަހު ބޭއްވި ބައްދަލުވުމުގެވެސް ބޮޑުބައި ކުރިޔަށް ގެންދިޔައީ ސިއްރުކޮށްގެންނެވެ. ބަޖެޓް ފާސްކޮށްފައިވަނީ އެކޮމިޓީގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.

މި އަހަރު މަޖިލީހުގެ ބަޖެޓުގެ ގޮތުގައި ކަނޑައަޅާފައިވަނީ 177.8 މިލިއަން ރުފިޔާއެވެ.

ރައްޔިތުންގެ މަޖިލީހުގެ ގަވާއިދުގެ 15 ވަނަ މާއްދާގެ ބ ގައި ބުނެފައިވަނީ ގާނޫނު އަސާސީގައި ބަޔާންކުރާ މަސްއޫލިއްޔަތުތައް އަދާކުރުމަށް ބޭނުންވާ ބަޖެޓު އެކުލަވާލައި، ދައުލަތުގެ ބަޖެޓުގައި ހިމެނުމަށް އާންމު ކޮމިޓީއަށް ހުށަހަޅައި ފާސްކުރަންވާނެއެވެ. އަދި މަޖިލީހުގެ އިދާރާގެ ބަޖެޓުގެ ގޮތުގައި މަޖިލީހުން ފާސްކުރާ ބަޖެޓުގައިވާ ފައިސާ، އެއްވެސް އުނިކުރުމެެއް ނެތި ދައުލަތުގެ އިދާރާއަށް ދޫކުރަންވާނެ ކަމަށް މަޖިލީހުގެ ގަވައިދުގައި ބަޔާންކޮށްފައިވެއެވެ.

މީގެއިތުރުން ޤާނޫނު އަސާސީގެ 96 ވަނަ މާއްދާގެ ހ ގައި ބަޔާންކޮށްފައިވާ ގޮތުގެމަތިން, އެންމެ ލަސްވެގެން ކޮންމެ އަހަރެއްގެ ނޮވެމްބަރ މަހުގެ 1 ވަނަ ދުވަހުގެ ކުރިން އެ އަހަރެއްގެ ދައުލަތުގެ ބަޖެޓް ރައްޔިތުންގެ މަޖިލީހަށް ފިނޭންސް މިނިސްޓަރ ހުށަހަޅުއްވަންވާނެ ކަމަށްވެސް ގަވާއިދުގައި ބުނެފައިވެއެވެ. އަންނަ އަހަރަށް ލަފާކުރާ ދައުލަތުގެ ބަޖެޓް މިއަހަރުގެ އޮކްޓޯބަރ މަހުގެ 31 ގެ ކުރިން މަޖިލީހަށް ހުށަހަޅުއްވާނެކަމަށް ފިނޭންސް މިނިސްޓަރ އިބްރާހީމް އަމީރު ވަނީ ވިދާޅުވެފައެވެ.

މިއަހަރަށް ރައްޔިތުންގެ މަޖިލީހުން ފާސްކޮށްފައިވަނީ 34.92 ބިލިއަން ރުފިޔާގެ ބަޖެޓެކެވެ. 33.4 ބިލިއަން ރުފިޔާގެ ހަރަދުގެ ގޮތުގައި ހިނގާނެކަމަށް ވަނީ އަންދާޒާކޮށްފައެވެ. ބަޖެޓް ޑެފިސިޓް ވާނެކަމަށް ލަފާކޮށްފައިވަނީ 12.3 ބިލިއަން ރުފިޔާއިންނެވެ.

ކޮވިޑާގުޅިގެން ޚަރަދުތައް ކުޑަކުރުމަށް ސަރުކާރުން ވަނީ ބާރުއަޅާފައެވެ.