އެމެރިކާ ސިފައިން އަފްޣާނުން ފޭބުން ލަސްކުރާނަމަ ހަމަލާ ދޭން ޖެހިދާނެ - ޠާލިބާން

އެމެރިކާ ސިފައިން ކަނޑައަޅާފައިވާ ތާރީޚުގެ ތެރޭގައި އަފްޣާނިސްތާނުން ނުފައިބައިފިނަމަ ހަމަލާ ދޭން ޖެހިދާނެ ކަމުގެ އިންޒާރު ޠާލިބާނުން ދީފިއެވެ.

މީގެ ކުރިން އެމެރިކާގެ ރައީސް ޖޯ ބައިޑެން ވަނީ މި މަހުގެ ނިޔަލަށް އެމެރިކާގެ ސިފައިން އަފްޣާނިސްތާނުން ބޭލުމަށް ނިންމާފައެވެ.

ޠާލިބާނުންގެ ސްޕޯކްސްޕާސަން ޑރ. ސުހައިލް ޝާހީން ވިދާޅުވީ، އެމެރިކާގެ ރައީސް ބައިޑެން މީގެ ކުރިން ނިންމަވާފައިވާ ގޮތަށް މި މަހުގެ ނިޔަލަށް އެމެރިކާގެ ސިފައިން އަފްޣާނިސްތާނުން ފައިބާނެ ކަމަށް އުންމީދު ކުރައްވާ ކަމަށާއި، އެހެން ނޫންނަމަ ކަންކަން ގޯސްވެދާނެ ކަމަށެވެ. އޭނާ އިތުރަށް ވިދާޅުވީ، އިނގިރޭސިވިލާތުގެ ސިފައިނާއި އެމެރިކާގެ ސިފައިން ކަނޑައަޅާފައިވާ ދުވަހަށް އެ ގައުމުން ނުފައިބައިފިނަމަ އެދެވެނީ ހަނގުރާމައެއް ފަށާނެ ކަމުގެ ސިގްްނަލެއް ކަމަށެވެ.

ޠާލިބާނުން މިފަދަ އިންޒާރެއް ދީފައި މިވަނީ އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން، ބައިޑެންގެ އަރިހުން ކުރިން ނިންމަވާފައިވާ މުއްދަތު ފަސްކުރުމަށް އެދިފައިވާ ދަނޑިވަޅެއްގައެވެ. މީޑިއާ ރިޕޯޓްތައް ބުނާ ގޮތުން ޖޯންސަން ވަނީ އަފްޣާނިސްތާނުގައި ތިބި ދެ ގައުމުގެ ރައްޔިތުންނާއި، ރެފިއުޖީން އަނބުރާ އެ ގައުމުތަކަށް ގެންދިޔުމަށް ވަގުތު ބޭނުންވާ ކަމަށެވެ.

ސުހައިލް ޝާހީން އިތުރަށް ވިދާޅުވީ އަފްޣާނުގެ ވެރިރަށް ކާބުލް އެއަރޕޯޓަށް އެއްވަމުންދާ ފަރާތްތަކުގެ ތެރެއިން ބަޔަކު މަރުވަމުންދާ ކަމުގެ ޚަބަރު ލިބެމުން އަންނަ ކަމަށާއި، އެކަން ގާތުން ބަލަމުންދާ ކަމަށެވެ. އަދި ޠާލިބާނުން ދެކެ ބިރުން ގައުމު ދޫކޮށް ދާން ބޭނުންވާ ފަރާތްތަކަށް އެ ފުރުސަތު އޮންނާނެ ކަމަށާއި، އެކަމަކު ޠާލިބާނުންގެ ވެރިކަމަކީ އެންމެނަށް ވެސް އަމާންކަމާއި ރައްކާތެރިކަން ލިބިގެންދާނެ ވެރިކަމެއް ކަމުގައެވެ.