މޮނިޓަރިންގެ ހާލަތުން އޭދަފުށި ނަގައިފި
22 އޯގަސްޓު 2021 | އާދީއްތަ 17:36މޮނިޓަރިން ހާލަތު އުވާލާފައިވަނީ އޮގަސްޓް 22 ވީ އާދިއްތަ ދުވަހުގެ މެންދުރު 1:26 ގައި
ބ. އޭދަފުށި،
ބ. އޭދަފުށި މޮނިޓަރިންގެ ހާލަތުން ނަގައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އެރަށް މޮނިޓަރިންގެ ހާލަތަށް ގެނެސްފައިވަނީ މިމަހުގެ 16 ވީ ހޯމަ ދުވަހެވެ. އަދި މޮނިޓަރިން ހާލަތު އުވާލާފައިވަނީ އޮގަސްޓް 22 ވީ އާދިއްތަ ދުވަހުގެ މެންދުރު 1:26 ގައެވެ.
އެޗްޕީއޭއިން ބުނީ މޮނިޓަރިން އުވާލީ ކޮވިޑް-19 އިން ރައްކާތެރިވުމުގެ ގޮތުން އާއްމު ސިއްހަތު ރައްކާތެރިކުރުމުގެ ގާނޫނުގެ 12 ވަނަ މާއްދާގެ ދަށުން ބަލަން ކަނޑައެޅުނު ކަންކަން ބެލުމުން، މޮނިޓަރިންގެ ހާލަތު އިތުރަށް ދަމަހައްޓަންޖެހޭ ސަބަބެއް މިވަގުތު ނެތުމުން ކަމަށެވެ.
މޮނިޓަރިންގެ ހާލަތުން ނެގި ނަމަވެސް ކޮވިޑް-19ން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަން ދިނުމަށް އެރަށުގެ ކައުންސިލުން އިލްތިމާސްކޮށްފައިވެއެވެ. ކޮވިޑް-19ގެ ހާލަތާއި ގުޅޭގޮތުން ކައުންސިލުން އާއްމުކޮށްފައިވާ ތަފާސްހިސާބުތަކަށް ބަލާއިރު، 21 އޮގަސްޓުގައި އެކަކު ބައްޔަށް ޕޮޒިޓިވްވެފައިވެއެވެ. މިހާތަނަށް 393 މީހުން ޕޮޒިޓިވްވެފައިވާއިރު، 313 މީހުން ބަލިން ރަނގަޅުވެފައިވެއެވެ.
މިފަހަކުން އަތޮޅުތަކުގެ ގިނަ ރަށްރަށުން އަންނަނީ ބޮޑެތި ކުލަސްޓަރތަކެއް ފެންނަމުންނެވެ. މާލެ ސަރަހައްދަށްވުރެ ގިނައިން އަތޮޅުތެރެއިން ކޭސްތައް އަންނަނީ ރިޕޯޓްކުރަމުންނެވެ.
