"ވެމްކޯއިން މަސައްކަތްކުރަނީ ހަވާލުކުރާ މަސައްކަތްތައް މުސްތަޤިއްލުކަމާއެކު ނިންމުމަށް"
އޯގަސްޓް 21ން ފެށިގެން ގޭގެއަށް ވަދެގެން ކުނި ނެގުމުގެ މަސައްކަތް ކުރިއަށް ދާނެކަމަށް މުޢިއްޒު ވިދާޅުވެފައިވޭ
ވެމްކޯގެ މެނޭޖިންގ ޑިރެކްޓަރ އާދަމް މުޙައްމަދު
ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން މަސައްކަތްކުރަނީ މުސްތަޤިއްލުކަންމަތީގައި, ހަވާލުކުރާ މަސައްކަތްތައް ނިންމުމަށްކަމަށް ކުންފުނީގެ މެނޭޖިންގ ޑިރެކްޓަރ އާދަމް މުޙައްމަދު ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން އޭނާ ވިދާޅުވީ ޒަމާނުއްސުރެވެސް އެކުންފުނިން މަސައްކަތް ކުރަމުން އައީ ކުނީގެ މައްސަލަ ހައްލުކުރުމުގެ ބޮޑު ޒިންމާ އަދާކުރުމަށް, ވަގުތާއި ހާލަތާ ގުޅޭގޮތުން, މުސްތަޤިއްލުކަންމަތީ ފިޔަވަޅުތައް އަޅައިގެން ކަމަށެވެ. އެގޮތުން ކޮވިޑްގެ އެންމެ ނުރައްކާތެރި ހާލަތުގައިވެސް ފުލުހުންނާއި ސިފައިންނާ އެއްސަފެއްގައި ވެމްކޯގެ ވެށިފާރަވެރިން ކުރި މަސައްކަތަކީ ޤައުމު ބަލައިގެންފައިވާ އަގުހުރި މަސައްކަތްތަކެއްކަމަށެވެ.
ކުނީގެ މައްސަލައަކީ ރާއްޖެއަށް ދިމާވެފައިވާ ބޮޑު މައްސަލައެއްކަން ފާހަގަކުރައްވައި އާދަމް ވިދާޅުވީ މި މައްސަލަ ހައްލުކުރުމަށް އެކި އަމާޒުތައް ކަނޑައަޅާ, އަވަސް އަދި ނަތީޖާ ނިކުންނަ މަސައްކަތްތަކެއް ކުރުމަށް ކުންފުނިން މަސައްކަތް ފަށާފައިވާކަމަށެވެ. އެގޮތުން މި ވަގުތު ކުންފުނިން މައިގަނޑު ދެ އަމާޒެއް ހާސިލުކުރުމަށް މަސައްކަތް ކުރަމުންދާކަމަށެވެ. މި އަހަރުގެ އޮކްޓޯބަރު މަހުގެ ނިޔަލަށް، ތިލަފުށީ ގޮނޑުން ދުންއެރުން ހުއްޓުމަކަށް ގެނައުމަށް އޭޑީބީގެ ތަޖުރިބާކާރުންނާއެކު މެދުކެނޑުމެއްނެތި މަސައްކަތް ކުރަމުންދާއިރު، ވެމްކޯގެ އެހެނިގެން މަސައްކަތްތަކަށް ބުރުލެއް ނާރާތޯ ޔަޤީންކުރަމުންދާކަމަށް ވިދާޅުވިއެވެ. އަދި މާލެ ސަރަހައްދުގެ ޓްރާންސްފަރ ސްޓޭޝަން ތަރައްޤީކުރުމަށް ކުރާ މަސައްކަތަކީވެސް މިނިސްޓްރީތަކާއެކު ކުރަމުންދާ މަސައްކަތެއްކަމަށެވެ. ވެމްކޯއިން މަސައްކަތް ކުރަނީ އެއްވެސް ބައެއްގެ އަމުރަކާ ނުލައި، މުސްތަޤިއްލުކަންމަތީކަން ފާހަގަކުރައްވާ އާދަމް ވަނީ ކުންފުނީގެ މަސައްކަތްތަކުގެ މައުލޫމާތު ކަމާ ގުޅޭ ފަރާތްތަކާއި ހިއްސާކުރަނީ ވިޔަފާރިއަށް ހުއްޓުން އެރިޔަ ނުދިނުމާއި، ކަން ހިނގާގޮތް އެ ފަރާތްތަކަށް އަންގައިދޭން ބޭނުންވާތީކަމަށެވެ.
މާފަންނު ރައްޔިތުންނާ އެއްކޮށް ބޭއްވި ބައްދަލުވުމުގައި ވާހަކަދައްކަވަމުން މޭޔަރު މުޢިއްޒު ވިދާޅުވީ އޯގަސްޓް 21ން ފެށިގެން ގޭގެއަށް ވަދެގެން ކުނި ނެގުމުގެ މަސައްކަތް ކުރިއަށް ދާނެކަމަށެވެ. އެކަމަށް ވެމްކޯއިން އެއްބަސްވެ އަމަލުނުކުރާކަމަށް ދެކެވޭ ވާހަކަތަކަށް ރައްދު ދެއްވައި އާދަމް ވަނީ އެ ފަދަ ގޮތަކަށް އެއްބަސްވެފައި ނުވާނެކަމަށް ވިދާޅުވެފައެވެ. މި ގޮތަށް ބަދަލު ގެންނަން ކުންފުނިންވެސް ބޭނުންވާކަމަށާއި، އެހެނަސް އެފަދަ ނިންމުމެއް ނިންމުމުގެ ކުރިން ޤައުމު ސިއްޙީ ކުއްލި ނުރައްކަލުގެ ޙާލަތެއްގައި އަދިވެސް އޮތުމުން އެޗްޕީއޭއާއި މަޝްވަރާކުރަން ޖެހޭކަމަށާއި, މި ސަބަބަށްޓަކައި މި ނިންމުން ނިންމާނީ ވެމްކޯއިން އަމިއްލައަށްކަމަށް ވިދާޅުވިއެވެ. އަދި މި މައްސަލައިގައި ސޯޝަލް މީޑިއާގައި ސިޓީ ކައުންސިލްގެ މެމްބަރުން ޖަދަލުކުރެއްވުމަކީ ޒިންމާދާރުކަން ކުޑަ އަމަލެއްގެ ގޮތުގައި އާދަމް ސިފަކުރެއްވިއެވެ. ސިޓީ ކައުންސިލުންވެސް ޒިންމާދާރުކަމާއެކު މަސައްކަތް ކުރާނެކަމަށް އުއްމީދު ކުރާކަމަށް ވިދާޅުވެ، ވެމްކޯގެ އެމްޑީ ވަނީ, ޚިޔާލު ތަފާތު ކައުންސިލުތަކާއެކުވެސް މަސައްކަތް ކުރުމަށް މަސައްކަތް ކުރާނެކަމުގެ ޔަޤީންކަން ދެއްވާފައެވެ.
މާފަންނު ރައްޔިތުންނާ އެއްކޮށް ބޭއްވި ބައްދަލުވުމުގައި ވާހަކަދައްކަވަމުން މޭޔަރު ވިދާޅުވީ މާލޭގެ މަގުތަކަށް ކުނި ނެރެފައި ބެހެއްޓުމަކީ މަގު ބޭނުންކުރާ ފަރާތްތަކަށް ގިނަ ދަތިތަކެއް ކުރިމަތިވާކަމެއްކަމަށެވެ. އަދި ނިއު ނޯމަލްއަކަށް އައިސްފައިވާއިރު އަލުން, ޚިދުމަތް ދޭ ގޮތަށް ބަދަލު ގެނައުމަކީ މުހިންމު ކަމެއްކަމަށެވެ. ވެމްކޯއިން މީގެ ކުރިންވެސް ވަނީ މޭޔަރުގެ ނިންމެވުމަކީ ވެމްކޯގެ މަޝްވަރާ ނެތި ނިންމެވި ނިންމެވުމެއް ކަމަށް ބުނެފައެވެ.
