ހަތަރު ދާއިރާއެއްގެ, އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން އޮކްޓޯބަރު 16 ވަނަ ދުވަހު ބާއްވަން އިލެކްޝަންސް ކޮމިޝަނުން ނިންމައިފިއެވެ.

އިލެކްޝަންސް ކޮމިޝަނުން ބުނީ ބައި-އިލެކްޝަން ބާއްވަން ނިންމި 4 ދާއިރާއަކީ ހދ. ނޭކުރެންދޫ ދާއިރާއާއި ރ. މަޑުއްވަރި ދާއިރާއާއި ނ. ކެނދިކުޅުދޫ ދާއިރާއާއި ނ. މަގޫދޫ ދާއިރާއެވެ.

އިލެކްޝަންސް ކޮމިޝަނުން ބުނީ ނޭކުރެންދޫ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުކަމަށް އިންތިޚާބުކުރަންޖެހޭ އަދަދަށްވުރެ މަދުން މީހުން ކުރިމަތިލާފައިވާތީއާއި، ރ. މަޑުއްވަރީއާއި ނ.ކެނދިކުޅުދޫ ދާއިރާގެ ބައިއިލެކްޝަނަށް ކުރިމަތިލުމުގެ ފުރުސަތު ހަމަވިއިރު އެއްވެސް ފަރާތަކުން ކުރިމަތިލާފައި ނުވާތީ މި 2 ދާއިރާއާއި، ނ. މަގޫދޫގެ ބައި-އިލެކްޝަން ބޭއްވުމަށް ނިންމާފައިވާކަމަށެވެ.

އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގެ ވޯޓުލުން މާލެ، ހދ. ނޮޅިވަރަމް، ނ. ކެނދިކުޅުދޫ، ނ. މަގޫދޫ، އއ. ފެރިދޫ އަދި ކ. ދިއްފުށީގައި މިމަހުގެ 7 ވަނަ ދުވަހު ވަނީ ކުރިއަށްގެންގޮސްފައެވެ. މީގެ ތެރެއިން މަގޫދޫގައި ކުރިއަށްގެންދިޔައީ އިންތިޚާބުގެ 3 ވަނަ ބުރެކެވެ. އެއީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިިޚާބުގެ ބައި އިލެކްޝަންގައި ވާދަކުރި ދެ ކެންޑިޑޭޓެއްގެ ވޯޓު އެއްވަރުވުމުންނެވެ.

މި އިންތިޚާބުގައި ޕީޕީއެމްގެ ކެންޑިޑޭޓުން ވާދަކުރީ ހދ. ނޮޅިވަރަމާއި، ނ. މަގޫދޫގެ އިތުރުން ކ. ދިއްފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށެވެ. މި ތިންގޮނޑި އިދިކޮޅު ޕީޕީއެމްގެ ކެންޑިޑޭޓުން ކާމިޔާބު ކޮށްފައި ވާއިރު ނ. ކެނދިކުޅުދޫ ކޮމިޓީއަށް އިންތިޚާބު ކުރަންޖެހޭ 2 ގޮނޑިއަށް އިންތިޚާބުވެފައި ވަނީ އެމްޑީޕީގެ ދެ ކެންޑިޑޭޓުންނެވެ. އއ. ފެރިދޫ އަންހެނުންގެ ކޮމިޓީއަށް 4 މެމްބަރުން އިންތިޚާބު ކުރަންޖެހޭއިރު އެރަށުގެ ބައި-އިލެކްޝަންގައި ވާދަކޮށްފައި ވަނީ ހަމައެކަނި އަމިއްލަގޮތުން ވާދަކުރި މެމްބަރުންނެވެ.