ޠާލިބާންގެ ބާރުގެ ދަށުގައިވާ އަފްޣާނިސްތާނަށް ސުލްހަ ގެނައުމުގެ މަސައްކަތުގައި ރަޝިޔާއާއި ތުރުކީން ގުޅިގެން މަސައްކަތްކުރުމަށް ދެ ގައުމުގެ ރައީސުން އެއްބަސްވެވަޑައިގެންފިއެވެ.
އެގޮތުން ރަޝިޔާގެ ރައީސް ވްލަޑްމިއަރ ޕުޓިންއާއި ތުރުކީގެ ރައީސް ޠައްޔިބް އުރުދުޣާންއާ ދެބޭފުޅުން ފޯނުން ވާހަކަދައްކަވައި, ވަނީ އަފްޣާނިސްތާނުގެ މަސްރަހާ ގުޅޭގޮތުން މަޝްވަރާކުރައްވާފައެވެ.
ދެ ބޭފުޅުންގެ ވާހަކަފުޅުގައި ޓެރަރިޒަމާއި ޑްރަގް ޓްރެފިކްކުރުމާ ދެކޮޅަށް މަސައްކަތްކުރުމުގެ މުހިންމުކަން ފާޅުކުރެއްވިކަމަށް, އެކަމާއި ގުޅިގެން ރަޝިޔާ ސަރުކާރުން ނެރެފައިވާ ބަޔާނުގައި ބުނެފައިވެއެވެ.
އުރުދުޣާން ވަނީ މީގެކުރިންވެސް އަފްޣާނިސްތާނުގައި ބާރުތައް ބަދަލުކުރުމުގެ ކަންކަން ސުލްހަވެރިކަމާއެކު ކުރިޔަށްދާނެކަމަށް އުންމީދުކުރައްވާކަމަށް ވިދާޅުވެފައެވެ. އަދި ކުރިން ކަންތައް ކުރިފަދައިން ޠާލިބާނުން މިފަހަރު ކަންކަން ނުކުރާނެކަމަށް އުންމީދުކުރައްވާ ކަމަށްވެސް ވަނީ ވިދާޅުވެފައެވެ.
ދެ ބޭފުޅުން ފޯނުން ދެއްކެވި ވާހަކަފުޅުގައި އުރުދުޣާން ވަނީ އަފްޣާނިސްތާނުގައި ދެން އެކުލެވޭ ސަރުކާރަކީ އަފްޣާނިސްތާނުގެ ހުރިހާ ދަރިކޮޅަކާއި ނަސްލެއްގެ ޝާމިލްވުމާއެކު އުފެދޭ ސަރުކާރަކަށް ވާންވާނެކަމަށް ވިދާޅުވެފައެވެ.
މީގެއިތުރުން އުރުދުޣާން ވަނީ ކާބުލްގެ އެއަރޕޯޓް ބެލެހެއްޓުމުގެ ކަންކަން ތުރުކީން މިހާރުވެސް ކުރިޔަށްގެންދާ ގޮތަށް ގެންދިޔުމަށް ބޭނުންފުޅުވާކަމަށް ވިދާޅުވެފައެވެ.
