"ޗޭންޖް އެންޑީއޭ" ޕެޓިޝަނުގެ ދިރާސާ ހެދުމަށް ރިހެބިލިޓޭޝަން ސެންޓަރުތަކަށް ޒިޔާރަތްކުރަނީ
މައްޗަންގޮޅި ދެކުނު ދާއިރާގެ މެމްބަރު ހުށަހަޅުއްވާފައިވާ ޕެޓިޝަން ދިރާސާކުރުމުގެ މަސައްކަތް ކޮމިޓީން ފެށީ މިއަހަރުގެ މާރޗް މަހު
ނޭޝަނަލް ޑްރަޖް އެޖެންސީ (އެންޑީއޭ)
ރައްޔިތުންގެ މަޖިލީހަށް ހުށަހަޅާފައިވާ "ޗޭންޖް އެންޑީއޭ 2020" ޕެޓިޝަން ދިރާސާކުރުމަށް ރައްޔިތުންގެ މަޖިލީހުގެ ޕެޓިޝަން ކޮމިޓީން ރިހެބިލިޓޭޝަން ސެންޓަރުތަކަށް ޒިޔާރަތްކުރުމަށް ނިންމައިފިއެވެ.
މިޕެޓިޝަން ދިރާސާކުރުމުގެ މަސައްކަތްތައް ކުރިޔަށްދާ ގޮތާއި ގުޅޭގޮތުން ޕެޓިޝަން ކޮމިޓީން ނެރެފައިވާ ބަޔާނުގައި ބުނެފައިވަނީ މައްޗަންގޮޅި ދެކުނު ދާއިރާގެ މެމްބަރ އަހުމަދު ހައިތަމް ހުށަހަޅުއްވާފައިވާ މިޕެޓިޝަން ދިރާސާކުރުމުގެ މަސައްކަތް ކޮމިޓީން މިއަހަރުގެ މާރޗް މަހުގެ 31 ވަނަ ދުވަހު ފަށާފައިވާކަމަށެވެ. މި ޕެޓިޝަން ހައިތަމް ސްޕޮންސަރ ކުރައްވާ ހުށަހަޅުއްވާފައިވަނީ 1050 ސޮޔާއެކު އެވެ.
ކޮމިޓީން ނެރެފައިވާ ބަޔާނުގައި ބުނެފައިވަނީ ޕެޓިޝަންގެ މަސައްކަތް ކުރިއަށްދާ ގޮތާ މެދު ކޮމިޓީގެ މެމްބަރުންގެ މެދުގައި މަޝްވަރާކުރުމަށް ފަހު ނެޝަނަލް ޑްރަގް އޭޖެންސީ (އެންޑީއޭ) އަށާއި، އޭގެ ދަށުން ހިންގަމުން އަންނަ ރިހެބް ސެންޓަރުތަކަށް ޒިޔާރަތްކޮށް އެތަންތަނުގެ ހާލަތު ދެނެގަތުމުގެ މަސައްކަތްކުރަން ނިންމާފައިވާ ކަމަށެވެ.
އެގޮތުން ހުޅުމާލޭގައި ހުރި ހާފްވޭ ހައުސްއަށާއި، ގދ. ތިނަދޫ، ޏ. ފުވައްމުލައް، ސ. ހިތަދޫ، ހދ. ހަނިމާދޫ އަދި ކ. ހިންމަފުށީގައި ގާއިމްކޮށްފައިވާ ޑްރަގް ރިހެބިލިޓޭޝަން ސެންޓަރުތަކަށް މިހާރު ޒިޔާރަތްކޮށްފައިވާ ކަމަށް ބަޔާނުގައިވެއެވެ، މީގެ އިތުރަށް ކ. ގުޅީގައި ގާއިމްކޮށްފައިވާ ޑްރަގް އޮފެންޑަރސް ރިމާންޑް ސެންޓަރަށާއި، މާލޭގައި ހުންނަ އެންޑީއޭގެ މައި މަރުކަޒަށް ޒިޔާރަތްކުރަން ނިންމާފައިވާ ކަމަށް ވެސް ބުނެފައިވެއެވެ.
ކޮމިޓީގެ ބަޔާނުގައި ބުނީ މަސްތުވާތަކެތީގެ މައްސަލަތަކަކީ މުޖުތަމައަށް ދިމާވެފައިވާ އެންމެ ބޮޑު އިޖްތިމާއީ މައްސަލަ ކަމަށާއި، މިކަމުގެ ސަބަބުން އާއިލާތަކަށް ދިމާވެފައިވާ މައްސަލަތައް ހައްލުކުރަން އާއިލާތަކުން އިސްނަގައިގެން މަސައްކަތް ކުރާނެ ކަމަށެވެ.
އެންޑީއޭ ގެ މަސައްކަތްތައް ރިފޯމް ކުރުމަށް ގިނަ ބަޔަކު ގޮވަމުން ދަނިކޮށް ޕެޓިޝަނެއް މަޖިލީހަށް ހުށައަޅާފައިވަނީ ޝޯޝަލް މީޑިއާގައި އެ އެޖެންސީ އަށް ބޮޑެތި ފާޑުކިތުންތައް އަމާޒުވެފައި ވަނިކޮށެވެ. އެގޮތުން ޑްރަގް ރިހެބިލިޓޭޝަން ސެންޓަރުގައި ދެވޭ ފަރުވާ މިހާރަށްވުރެ ހަރުދަނާ ކުރަން ގޮވާލުމުގެ އިތުރުން، އެންޑީއޭގެ ބޯޑު ބަދަލުކުރަން ގޮވާލައި އިހްތިޖާޖުތަކެއްވެސް ކޮށްފައިވެއެވެ.
