ފަތުރުވެރިންނަށް ޚިދުމަތްދޭން އޮޕަރޭޓްކުރާ އެނދުގެ އަދަދު 50,040ށް
ރާއްޖޭގައި އޮޕަރޭޓްކުރެވޭ 54,652 އެނދުގެ ތެރެއިން 50,040 އެނދު ވަނީ މިހާރު އޮޕަރޭޓްކުރަން ފަށާފައި
ހުޅުމާލޭގެ ގެސްޓްހައުސްއެއް
ރާއްޖެ އަންނަ ފަތުރުވެރިންނަށް ޚިދުމަތްދޭން އޮޕަރޭޓްކުރާ އެނދުގެ އަދަދު 50,040ށް އަރާފައިވާ ކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާގޮތުން ރާއްޖޭގައި އޮޕަރޭޓްކުރެވޭ 54,652 އެނދުގެ ތެރެއިން 50,040 އެނދު ވަނީ މިހާރު އޮޕަރޭޓްކުރަން ފަށާފައެވެ. މިއީ 813 ޓޫރިސްޓު ފެސިލިޓީގައި އޮޕަރޭޓްކުރަމުންދާ އެނދުގެ އަދަދެވެ.
މިހާރު އޮޕަރޭޓްކުރަމުންދާ ފެސިލިޓީތަކަށް ބަލާއިރު، 156 ރިސޯޓުގައި 36,932 އެނދު ދަނީ އޮޕަރޭޓްކުރަމުންނެވެ. އަދި 142 ސަފާރީގައި 2،786 އެނދު ދަނީ އޮޕަރޭޓްކުރަމުންނެވެ.
އޭގެ އިތުރުން، 10 ހޮޓެލް ގައި 1,362 އެނދު, އަދި 505 ގެސްޓް ހައުސްގައި 8,960 އެނދު ދަނީ އޮޕަރޭޓްކުރަމުންނެވެ. އެގޮތުން ރާއްޖޭގެ 20 އަތޮޅެއްގެ 72 ރަށެއްގައި މިހާރު ގެސްޓް ހައުސްގެ އޮޕަރޭޝަންތައް ވަނީ ފަށާފައެވެ. އޭގެ ތެރެއިން އެންމެ ގިނަ އަދަދެއްގެ ފެސިލިޓީ އޮޕަރޭޓްކުރަމުންދަނީ ކ. އަތޮޅުގައެވެ.
ރާއްޖޭގައި އޮޕަރޭޓްކުރާ ގެސްޓް ހައުސްތަކަށް ދިއުމަށް ވަކި ޚާއްސަ އުސޫލުތަކެއް ހެލްތު ޕްރޮޓެކްޝަން އެޖެންސީން ކަނޑައަޅާފައިވާއިރު، ގެސްޓް ހައުސްތައް ހުންނަ ރަށުގެ ވެކްސިނޭޝަން ރޭޓަށް ބަލައި ބޮޑެތި ލުއިތައް ލިބޭގޮތަށް ވަނީ ހަމަަޖައްސާފައެވެ. އަދި ފަތުރުވެރިން އައުން އިތުރުވެފައިވާ މި ދަނޑިވަޅުގައި, ގެސްޓް ހައުސްތައް އޮޕަރޭޓްކުރަމުން ދަނީ އެންމެ ރަނގަޅަށްތޯ ބެލުމަށް އެކަމަށް ޚާއްސަ ޓީމެއް ޓޫރިޒަމް މިނިސްޓްރީގައި ވަނީ އެކުލަވާލާފައެވެ.
އޭގެ އިތުރުން ފޭކް ބުކިންގގައި މިހާރު ރާއްޖެއަށް ފަތުރުވެރިން އައުން އިތުރުވަމުންދާތީ އެކަން ހުއްޓުވުމަށް އިތުރު ފިޔަވަޅުތަކެއް އަޅަން ފަށާފައިވާކަމަށް އިމިގްރޭޝަން ކޮންޓްރޯލަރ މުޙައްމަދު އަޙުމަދު ޙުސައިން (ޙަނަފީ) ވަނީ ވިދާޅުވެފައެވެ.
ރާއްޖެއަށް މި އަހަރުގެ މިހާތަނަށް 700،000ށް ވުރެ ގިނަ ފަތުރުވެރިން އައިސްފައިވާއިރު، އެންމެ ގިނަ އަދަދެއްގެ ފަތުރުވެރިން އައިސްފައި ވަނީ ރަޝިއާ އިންނެވެ. އަދި ދެ ވަނައަށް އެންމެ ގިނަ އަދަދެއްގެ ފަތުރުވެރިން އަންނަމުން ދަނީ އިންޑިއާ އިންނެވެ.
