ފާއިތުވި 24 ގަޑިއިރު ރާއްޖެއިން ކޮވިޑް-19ށް ޕޮޒިޓިވްވެފައިވަނީ 134 މީހުންކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ހާމަކޮށްފިއެވެ.

އެޗްޕީއޭއިން ހާމަކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ވަނީ 6750 ސާމްޕަލް ޓެސްޓްކޮށްފައެވެ. އޭގެތެރެއިން 134 ސާމްޕަލް ޕޮޒިޓިވްވިިއިރު މީގެތެރޭގައި ހިމެނެނީ މާލެ ސަރަހައްދުން 48 ސާމްޕަލެވެ. އަދި އަތޮޅުތަކުން 77 ސާމްޕަލާއި ރިސޯޓްތަކުން 9 ސާމްޕަލެވެ.

މިއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 79،659ށް އަރާފައެވެ. އަދި މިވަގުތު 1712 މީހުންނަށް ކޮވިޑް ޖެހިފައިވާއިރު މީގެތެރެއިން 16 މީހުންނަށް ފަރުވާދެމުން އަންނަނީ ހޮސްޕިޓަލްތަކުގައި އެޑްމިޓްކޮށްގެންނެވެ.

މިހާތަނަށް އައިއިރު ރާއްޖެއިން 77،713 މީހުން ވަނީ ބަލިން ރަނގަޅުވެފައެވެ. އަދި 222 މީހަކު ވަނީ މިބަލީގައި ނިޔާވެފައެވެ.

ކޮވިޑްގެ ހަތަރު ވަނަ ރާޅަށް ފަހު ރާއްޖޭގައި ކޮވިޑްގެ ހާލަތު އަންނަނީ ރަނގަޅުވަމުންނެވެ. ނަމަވެސް ބައެއް ދުވަސް ދުވަހު ކޭސްތަކުގެ އަދަދު އަންނަނީ މަތިވަމުންނެވެ. ހިނގަމުންދާ އޮގަސްޓް މަހަށް ބަލާއިރު މިހާތަނަށް 100ން ދަށުން ކޭސްތައް ރިޕޯޓްކޮށްފައިވަނީ ދެ ދެވަހެއްގައެވެ.

ކޮވިޑްގެ ހާލަތު ރަނގަޅުވަމުން އައުމާއެކު ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކަށްވެސް އަންނަނީ ލުއިތައް ދެމުންނެވެ. ނަމަވެސް އަދިވެސް ބަލިން ރައްކާތެރިވުމަށް ކުރަންޖެހޭ ކަންކަން ސަމާލުކަން ދިނުމަށް އަންނަނީ އިލްތިމާސްކުރަމުންނެވެ.